Ia Faaalia le Naunau Moni i Isi—E Ala i le Talaʻi ma le Lē Manatu Faapito
1 Na vaaia e Ioane i se faaaliga se agelu o lele i le taulotoaʻiga o le lagi, e folafola le tala lelei e faavavau i tagata o “atunuu uma, ma ituaiga, ma gagana eseese, ma nuu.” (Faaa. 14:6) Po o tatou mulimuli i le faaaʻoaʻoga a le agelu e talaʻi ma le lē manatu faapito? E aunoa ma le mafaufau i ai, e ono iai ni o tatou manatu faaituʻau pe faailoga lanu. O o tatou uiga agaʻi i tagata e feiloaʻi i ai, e aafia ai lo tatou faailoaina atu o le tala lelei iā i latou. E manaʻomia ai la ona tatou alolofa naunau, pe a talaʻi i tagata e eseese atunuu e ō mai ai.
2 Iloilo la Outou Oganuu: Po o iai ni tagata ese po o ni tagata sulufaʻi i la outou oganuu? E tatou te ono lē uaʻi atu iā i latou na. Ia tausolomua e saʻili i latou ma taumafai e faamasani lelei i ai. O ā o latou manaʻoga ma mea e manatu mamafa i ai, o mea e fiafia ma lē fiafia i ai ma o latou popolega? Ia taumafai e fetuunaʻi lau faatomuaga o le feʻau o le Malo e tusa ai ma o latou tulaga. (1 Kori. 9:19-23) I le pei o Paulo, e ao ona tatou manatu o le matafaioi le taʻu atu o le tala lelei i tagata uma i la tatou oganuu, e aofia ai ma ē e ō mai se isi atunuu, e eseese aganuu, e tautatala i se isi gagana, pe tamaoaiga foʻi.—Roma 1:14.
3 E faapefea la ona e molimau atu i se tasi e tautala i se isi gagana? Ia faaaogā lelei le tamaʻi tusi, Good News for People of All Nations. E te ono ave foʻi ni sāvali po o ni polosiua o loo tusia i gagana o loo taatele i la outou oganuu. (Tagaʻi i La Tatou Faiva o le Malo, Iulai 2003, itu. 8, pala. 2-3.) E lē gata i lea, ua faia e nisi tagata talaʻi ni taumafaiga e aʻoaʻo se faafeiloaʻiga ma se taulimaga faigofie i isi gagana. E masani ona fiafia tagata e faalogo mai i se tasi o taumafai e tautala atu i la latou gagana, e tusa pe na o sina taumafaiga itiiti, ma e ono tosina mai ai i latou i le tala lelei.
4 Ia Faaaʻoaʻo iā Ieova: O le talaʻi atu i tagata o so o se atunuu, ua tatou faaaʻoaʻo ai i lo tatou Atua lē faailoga tagata o Ieova, “o lē finagalo ina ia faaolaina o tagata uma lava, ma ia oo ina iloa lelei le upu moni.”—1 Timo. 2:3, 4.