Pe a Ese le Gagana a le Tagata o le Aiga
1. Aiseā o loo faatupulaʻia ai pea le manaʻoga ia felagolagomaʻi i le auala e galueaʻiina ai le oganuu?
1 O loo faatupulaʻia pea i le lalolagi aoao le maua e tagata talaʻi o le Malo, o i latou e fiafia ae ese le gagana e tautatala ai mai le gagana o loo faaaogā e le faapotopotoga. Ina ia mafai ona tuuina atu se fesoasoani faaleagaga mo i latou, e tele lālā ua manatu e talafeagai ona faatutū ni vaega po o ni faapotopotoga i na gagana. E ono tele ni gagana e tautatala ai tagata o se vaipanoa e tasi, ma e ono iai ni faapotopotoga e eseese a latou gagana o loo talaʻi uma i lenā vaipanoa. E faapefea ona felagolagomaʻi faapotopotoga ina ia faamautinoa le sologa lelei o le auala e faia ai le talaʻiga?—1 Kori. 14:33.
2. A o talaʻi mai lea fale i lea fale, e faapefea ona tatou felagolagomaʻi ma se vaega po o se faapotopotoga e ese la latou gagana i la tatou oganuu?
2 Ia Lelei Fesootaʻiga: Pe a talaʻi i alatetele pe talaʻi foʻi lē fuafuaina, e ao i se tagata talaʻi ona ia lagona le saʻoloto e tautala atu i so o se tagata, e aofia ai ma i latou e ese le gagana e tautatala ai, ma ofo se lomiga i le gagana e fia faitau i ai le tagata. Ae peitaʻi, pe a ō atu i lea fale ma lea fale i vaipanoa o loo galueaʻiina e isi vaega po o faapotopotoga e ese a latou gagana, e tatau i se tagata talaʻi ona uaʻi atu i aiga e tautatala i le gagana a le faapotopotoga o loo ia auai i ai. Pe a talaʻi ni faapotopotoga eseese i se oganuu e tasi, e matuā tāua tele ona lelei faamaumauga. E ao i ovasia o le auaunaga ona lelei a latou fesootaʻiga, ina ia faatulaga lelei nei mataupu i se auala e malilie uma i ai. (Faata. 11:14) Peitaʻi, pe afai ae tau atu i se tagata e ese lana gagana a o faagasolo le talaʻiga mai lea fale i lea fale, ae e leai se faapotopotoga e tautatala i lenā gagana e lata ane, e tatau i le tagata talaʻi ona taumafai e avatu se molimau, ma fesoasoani pea i le tagata fiafia lea ua maua.
3. E faapefea ona tatou tali atu pe a tatou feiloaʻi i se oganuu e tasi ma se ʻautalaʻi mai se vaega po o se faapotopotoga e ese la latou gagana o loo galueaʻiina lea lava oganuu e pei ona tatou faia?
3 O le Galuega e Tasi: E faapefea ona taulimaina se tulaga e tulaʻi mai, pe a talaʻi faatasi faapotopotoga eseese i se oganuu e tasi i le aso lava lenā? E mautinoa lava, o le a faamuamua pea le alofa faa-Kerisiano nai lo gagana eseese nei, ma ia manatu mamafa tagata uma i manaʻoga o le oganuu. (Ioa. 13:34, 35) O lea la, o i latou o loo taʻimua, e ao ona faaalia le fetuutuunaʻi ma le alofa i le faia o se faaiʻuga, pe tatau ona ō atu le isi vaega e galulue mo sina taimi i se isi oganuu.—Iako. 3:17, 18.
4. O le ā le valoaga o loo faataunuuina i aso nei?
4 Na valoia e le Tusi Paia o le a faalogo tagata e eseese a latou gagana i le tala lelei. (Faaa. 14:6, 7) E ala i le felagolagomaʻi o i latou o loo aofia ai, e mafai ai ona ʻalofia le ō o tagata talaʻi mai vaega po o faapotopotoga eseese nei, i fale lava ia e tasi ae faaoo atu le tala lelei i tagata fou, e aofia ai ma i latou e tautatala i isi gagana.—Efe. 4:16.