O le Auala e Talaʻi ai i Tagata e Ese la Latou Gagana
1. O le ā le avanoa e masani ona tulaʻi mai a o tatou talaʻi atu i oganuu ua tofia tatou i ai?
1 Sa valoia e Iesu o le a talaʻia le tala lelei i le lalolagi aoao “e fai ma molimau i atunuu uma.” So o se tasi e auai i le galuega talaʻi ma le aʻoaʻo atu, latou te amanaʻia le tāua o na fetalaiga a Iesu. (Mata. 24:14; 28:19, 20) A o tatou talaʻi atu ma faia soo, e tatou te ono feiloaʻi ma tagata e ese atunuu e ō mai ai ma e tautatala i se gagana e ese mai i la tatou gagana. E ao foʻi ona maua se avanoa e faalogo ai nei tagata i le feʻau o le Malo, ma tutū mausali mo le upu moni a o leʻi oo mai le aso tele ma le mātauʻutia o Ieova. (Mala. 3:18) E faapefea la ona tatou talaʻi i tagata e ese la latou gagana i le oganuu a la tatou faapotopotoga?
2. O le ā le auala tatou te faaaʻoaʻo ai iā Ieova pe a tatou talanoa i isi e ese a latou gagana?
2 Faaatagia Atu le Silafaga a Ieova iā i Latou e Tautatala i se Isi Gagana: Ina ia faaatagia atu le alofa lē faailoga tagata o Ieova i tagata uma i la tatou oganuu, e tatau ona iā i tatou se faanaunauga malosi e fesoasoani i tagata ia maua le poto saʻo e uiga i le Atua moni o Ieova, e tusa lava po o le ā le gagana e tautatala ai. (Sala. 83:18; Galu. 10:34, 35) E ui lava e tatou te taulaʻi patino atu i tagata e tautatala i le gagana a la tatou faapotopotoga, ae e ao foʻi ona tatou manatunatu i manaʻoga o i latou e tautatala i isi gagana ma vaai ni auala e taʻu atu ai iā i latou le feʻau o le Malo o le Atua. Afai tatou te lē manatu mamafa iā i latou e tautatala i isi gagana, ua lē talafeagai lea ma le fuafuaga a Ieova ina ia avatu se molimau i tagata o atunuu uma. E faapefea la ona tatou fesoasoani i tagata e lē tautatala i la tatou gagana?
3. O le ā le meafaigaluega aogā lea ua saunia mai mo i tatou, ma e faapefea ona tatou sauniuni e faaaogā?
3 Faaaogā le Tamaʻitusi Good News for People of All Nations: O lenei tamaʻitusi ua fuafuaina e faaaogā pe a tatou feiloaʻi i tagata e tautatala i se gagana e ese mai la tatou gagana. Ia ave lau tamaʻitusi lenei i mea uma e te i ai i so o se taimi. Ia faamasani i ona vala eseese, ma sauniuni e faaaogā. Ina ia faigofie ona suʻe vave i se vaega tonu ma faaaogā, faailoga gagana eseese e te tau i ai i le oganuu. Afai o maua ni lomiga i gagana nei, atonu o se mea lelei le iai o ni nai lomiga e tuu i le tagata pe a māeʻa ona faaaogā le feʻau o loo i le tamaʻitusi.
4. E faapefea ona faaaogā le tamaʻitusi Nations i la tatou faiva?
4 Afai e te feiloaʻi i se tagata i le faiva e tautala i se isi gagana ma e te lē mautinoa po o le ā le gagana e tautala ai lenei tagata, ia amata e ala i le faaali i ai o le faavaa o le tamaʻitusi. Faasino i ai le faafanua o le lalolagi i le pito i totonu o le faavaa, ona faasino lea iā te oe ma faasino i ai lou atunuu lea e te iai, ona taumafai lea e faailoa atu e te fia iloa po o fea e sau ai le tagata o le aiga ma po o le ā le gagana e tautala ai. A e iloa loa lana gagana, ona vaai lea i le lisi o gagana (table of contents), suʻe i le itulau o loo iai, faasino le tagata o le aiga i le fuaiupu o loo olaola tetele i le pito i luga o le itulau, ona faailoa atu lea e te manaʻo i le tagata o le aiga e faitau mai le feʻau o loo iai. Pe a māeʻa ona faitau, ona ofo lea i ai o se sāvali i lana gagana pe faasino i ai le vaega o le fuaiupu o loo vali lanu ʻefuʻefu, o loo taʻua ai e te fiafia e toe foʻi mai ma se lomiga ma le tagata i lana lava gagana. Ona faasino lea i ai o le faaupuga “o loʻu igoa” o loo olaola tetele, ma taʻu manino i ai lou igoa. Ona faasino lea i le faaupuga olaola tetele “lou suafa,” ma faatali i se tali mai a le tagata. Ia fai ni fuafuaga maʻoti mo se toe asiga.
5. O le ā le isi gaoioiga e ao ona fai ina ia tausia lelei ai i latou e fiafia ae ese la latou gagana?
5 Isi Gaoioiga e Ao Ona Fai: E ao ona fai taumafaiga uma e toe asi ai i latou uma sa faaalia le fiafia i le feʻau o le Malo, po o le ā lava la latou gagana. Pe a tatou mautinoa o loo fiafia le tagata i le Atua ma lana Afioga, le Tusi Paia, e ao loa ona tatou faatumuina le pepa Please Follow Up (S-43) ma tuu atu i le failautusi ina ia faaoo atu i le ofisa o le lālā ina ia asiasi atu i lenei tagata fiafia se tasi e tautala i lana gagana. A uma lenā, ona faaoo atu lea e le ofisa o le lālā le pepa lea i le vaega e tautatala i le gagana lea. Pe a taunuu le pepa lea, ona faafesootaʻi loa lea o le tagata e aunoa ma se faatuai. E ono avatu e le failautusi se kopi o le pepa i le ovasia o le auaunaga ina ia iloa ai le fiafia ua faaalia e ni tagata e ese la latou gagana i le Tusi Paia. E faatoʻā faaaogā le pepa lenei pe a faaalia e se tagata le fiafia moni.
6. Afai tatou te feiloaʻi i se tagata fiafia e ese se gagana e tautala ai, o le ā le tiute tauave ua iā i tatou?
6 Mai i le taimi e auina atu ai le pepa S-43 seʻia oo ina faafesootaʻi le tagata fiafia e se tagata talaʻi e tofia i ai o sē e tautala i lana gagana, e ono umi se taimi e va ai. O le mea lea, ina ia faia taumafaiga e faaauau ai pea le fiafia na faaalia, o le tagata talaʻi lea na saunia le pepa S-43 e ono faaauau pea ona atiina aʻe le fiafia seʻia oo ina faafesootaʻi le tagata e se tasi e tautala i lana gagana. I nisi taimi, e ono mafai ona fai se suʻesuʻega ma le tagata fiafia. Peitaʻi, a o faagasolo le taimi lea seʻia oo ina asiasi i ai se tagata e tautala i lana gagana, e faapefea ona maua e le tagata talaʻi ni lomiga i le gagana a le tagata lea ua faaalia le fiafia?
7. O le ā le sauniuniga ua iai e mafai ona maua ai lomiga i le gagana a i latou tatou te ono feiloaʻi?
7 Lomiga i Isi Gagana: E lē tatau i faapotopotoga ona iai se aofaʻiga tele o lomiga i isi gagana. Peitaʻi, afai e manatu le ovasia o le auaunaga o loo iai ni tagata mai i se gagana patino ua faaalia le fiafia, e ono manatu le ovasia e talafeagai ona iai ni nai lomiga i le gagana lenā e faaaogā e le ʻautalaʻi. Afai e leai ni lomiga o maua i le faapotopotoga, e ono mafai ona ota. E ono umi se taimi faatoʻā taunuu mai lomiga i nisi gagana. Afai o le tulaga lenā, o loo iai le sauniuniga ua avanoa e maua mai ai ni kopi o ni lomiga i le www.watchtower.org. E anoanoaʻi lomiga i le faitau selau o gagana lea e mafai ona maua vave e le tagata talaʻi po o le tagata fiafia foʻi. E maualuga le manatu o le a aogā lenei sauniuniga i le faaauauina pea o le fiafia e faaalia mai e i latou e ese gagana e tautatala ai.
8. O le ā le vaega a le faapotopotoga e fai i le atiina aʻe o le fiafia o i latou e tautatala i se isi gagana?
8 Vaega a le Faapotopotoga e Fai: I nisi taimi e ono toʻatele ai ni tagata e ese se latou gagana e nonofo i se vaipanoa, ae e leai se faapotopotoga e latalata ane o lo’o faaaogāina lenā gagana i a latou sauniga. O tagata fiafia la e tautatala i se isi gagana, e ao ona valaaulia e auai i a outou sauniga. Pe a talia ma le māfana i latou ma faaalia i ai le fiafia, e ono faalaeiauina ai i latou e auai mai pea lava pea. E ono lē faigofie i le amataga ona o le gagana ma aganuu, peitaʻi, e leai ni pa puipui o le alofa moni faa-Kerisiano i le faalapotopotoga a Molimau a Ieova i le lalolagi aoao. (Sefa. 3:9; Ioa. 13:35) Pe e lelei lau tautala i se isi gagana? Afai e lelei ma e te naunau e toe asiasi atu i asiga i lenā gagana, faamolemole logo le failautusi a le tou faapotopotoga ina ia logo le ofisa o le lālā e faatatau i lenei tulaga. E fesoasoani tele pe a manaʻomia e le ofisa o le lālā se tagata talaʻi e atiina aʻe ma faaauau le fiafia e tulaʻi mai.
9. O afea e tatau ai i tagata talaʻi ona aʻoaʻoina se isi gagana, ma o le ā le mea e ao ona fai?
9 Aʻoaʻoina o se Gagana: Pe afai e te fesoasoani i nisi e tautatala i se isi gagana, e sili ona lelei le faalaeiau o i latou e auai i se faapotopotoga e tautatala i la latou gagana pe afai e iai se faapotopotoga o latalata ane. Peitaʻi, afai e lē faigofie lea tulaga, e ono filifili nisi tagata talaʻi e aʻo lea gagana ona mafai ai lea ona avatu se fesoasoani sili ona lelei mo tagata fiafia. Afai e leai se faapotopotoga o latalata ane, e ono manatu le ofisa o le lālā e faapea ona o le toʻatele o tagata o le vaipanoa ma i latou ua ō mai i ai e tautatala i se isi gagana, e ao la ona fai se aʻoga e aʻoaʻoina ai lea gagana. Afai e fai lenei fuafuaga, e ono faafesootaʻi e le ofisa o le lālā faapotopotoga e latalata ane e faatatau i le manaʻoga ua tulaʻi mai, ona fai lea o se faasilasilaga e faatatau i le aʻoga e aʻo ai le gagana. O i latou e talosaga e auai i le aʻoga e aʻoaʻo ai se isi gagana, e ao ona iai le sini e siitia atu i le vaega po o le faapotopotoga ina ia fesoasoani i ē o loo tautatala i lea gagana.
10. O afea e ono amata ai se vaega e ese se gagana e tautatala ai, ma e faapefea ona fua le tatau ma le lē tatau ona fai?
10 Faatulagaina o se Vaega: Ina ia mafai ona faatulaga se vaega i se isi gagana, e fā manaʻoga tāua e ao ona ausia. (1) Ia lava le toʻatele o tagata fiafia ma ia iai ni faamaoniga o le a faatuputupulaʻia pea. (2) Ia iai se vaega itiiti o le ʻautalaʻi e iloa lea gagana, ia po o loo aʻoaʻoina foʻi le gagana lea. (3) Ia iai se toeaina po o se auauna o le faiva e agavaa, e avanoa e taʻimua ma mafai ona faia se sauniga e tasi pe sili atu i le gagana lea i vaiaso taʻitasi. (4) E ao ona iai se ʻautoeaina e loto malilie e lagolagoina lenei vaega. Pe a ausia loa nei manaʻoga i se tulaga talafeagai, ona tusi atu lea o le ʻautoeaina i le ofisa o le lālā e faamatala i ai lenei vaega, ma talosaga atu ina ia talia i latou o se faapotopotoga e lagolagoina le vaega e ese le gagana e tautatala ai. (Tagaʻi i le tusi Faamaopoopo i le itulau 106-107.) O le toeaina po o le auauna o le faiva lea e taʻimua, o le a avea ma “ovasia o le vaega“ po o le “auauna o le vaega” e gafa ma le vaavaaia o le vaega.
11. Aiseā o se faaeaga ai le fesoasoani i tagata e ese se gagana e tautatala ai i la tatou oganuu?
11 O le talaʻi i tagata e ese le gagana e tautatala ai i la tatou oganuu, o se vaega tāua o le galuega talaʻi i le lalolagi aoao lea na amata e lo tatou Faaaʻoaʻo, o Iesu Keriso. Tau ina ia tatou faataunuuina ma le maelega la tatou vaega ma mātauina le auala o loo faaauau ai pea ona lūlūina e Ieova nuu uma ma aumai i totonu i latou e manaʻomia mo ia. (Ha. 2:7) Maʻeu lo tatou faamalieina ai i le lagolagoina atoatoa o lenei taumafaiga. Tau ina ia faamanuia mai Ieova i a tatou taumafaiga autasi e fesoasoani i tagata e ese la latou gagana i oganuu a a tatou faapotopotoga, i lo tatou manatuaina lea po o ā lava pa puipui o iai ona o gagana a tagata, e mafai lava e le Atua ona faatupuina!—1 Kori. 3:6-9.