Pe E te Talisapaia le Faalapotopotoga a Ieova?
“O loo faapea ona fetalai mai o Ieova, O le lagi o loʻu nofoa lea, o le lalolagi o le mea e tu ai oʻu vae lea.”—ISAIA 66:1.
1, 2. (a) O le ā le faamaoniga vaaia o le faalapotopotoga a Ieova e mafai ona e faasino i ai? (e) O fea o loo afio ai Ieova?
PE E te talitonu e iai se faalapotopotoga a Ieova? Afai o lou talitonuga lena, aisea ua e talitonu ai faapea? Atonu e te tali mai: ‘O lea e iai lo tatou Maota o le Malo. O loo iai sa tatou faapotopotoga ua lelei ona faamaopoopoina ma iai se au toeaina. O loo iai lo tatou ovasia matagaluega ua tofia lelei o lē o loo ia asiasia i tatou e lē aunoa. O loo tatou auai atu i fonotaga ma tauaofiaga ua faamaopoopoina lelei. O loo iai so tatou ofisa o le lālā a le Sosaiete o le Olo Matamata i lo tatou atunuu. O le mea mautinoa, o nei mea uma ma le tele o isi mea e faamaonia ai o loo iai se faalapotopotoga o loo faagaoioia a Ieova.’
2 O na vala o ni faamaoniga ia o le iai o se faalapotopotoga. Ae pe afai e faaautū atu la tatou vaai ma le talisapaia i na o mea o loo iinei i le lalolagi, o lona uiga la e lē o ia i tatou le malamalamaga atoatoa o le faalapotopotoga a Ieova. Na fetalai Ieova ia Isaia e faapea, o le lalolagi ua na o se mea lea e tū ai Ona aao, peitai o le lagi o loo iai Lona nofoalii. (Isaia 66:1) O lē fea “lagi” lea sa faasino atu i ai Ieova? I lo tatou vanimonimo? I se vateatea i tua atu? Pe i se isi ituaiga o olaga? O loo tautala Isaia e uiga i le “afioaga paia ma le matagofie” o Ieova, ma o loo faamatala e le faisalamo nei lagi e faapea o “le mea o loo afio ai o ia.” O lea, o le “lagi” o loo taʻua i le Isaia 66:1 e faasino atu i le afioaga agaga lē vaaia o loo afio ai Ieova i le tulaga silisili, po o le pito i sili ona maualuga.—Isaia 63:15; Salamo 33:13, 14.
3. E mafai faapefea ona tatou manumalo mai masalosaloga?
3 O lea la, pe afai tatou te mananao moni e malamalama ma talisapaia le faalapotopotoga a Ieova, e tatau ona tatou vaai atu i le lagi. Ma o iina o loo tulai mai ai se faafitauli mo nisi. Talu ai e lē vaaia le faalapotopotoga faalelagi a Ieova, e faapefea la ona tatou iloa o loo iai moni lava? O nisi ua oo lava ina iai se taimi e lē mautonu ai, ua tau mānatu, ‘E mafai faapefea ona tatou mautinoa?’ E mafai faapefea e le faatuatua ona manumalo ai i masalosaloga? E lua auala autū, o le faia o se suesuega totino loloto o le Afioga a le Atua ma le auai e lē aunoa ma faia se sao i sauniga faa-Kerisiano. Ona mou ese atu ai lea o le masalosalo i le upu moni. Ua iai nisi auauna a le Atua sa iai ni o latou masalosaloga. Seʻi o tatou talanoaina le tulaga o le auauna a Elisaia ina ua osofaia Isaraelu e le tupu o Suria.—Faatusatusa i le Ioane 20:24-29; Iakopo 1:5-8.
O Lē na Vaai i ʻAu Faalelagi
4, 5. (a) O le ā le faafitauli na iai i le auauna a Elisaia? (e) Na faapefea ona tali atu Ieova i le tatalo a Elisaia?
4 Na aauina atu i le po e le tupu o Suria se autau malosi o fitafita i Totana e puʻe mai Elisaia. Ina ua tulai le auauna a Elisaia i le taeao lava ma alu atu i fafo, atonu pe ina ia mānava sina ea fou i luga o le taualuga mafola o lo la apitaga i le itu i Sasaʻe Tutotonu, pagā sona faateʻia na iai! O se autau tele a Suria o solofanua ma kariota o le taua ua siʻoina le aai, o loo faatalitali mo le puʻeina o le perofeta a le Atua. Na alaga atu le auauna ia Elisaia: “Aue! le alii e, pe faapefea se mea tatou te fai aʻi?” E foliga mai, i le matuā toʻa mālie ma le mautinoa, na tali atu ai Elisaia: “Aua e te fefe, auā e toatele ua ia te i tatou i e ua ia te i latou.” Atonu na tau mānatu le auauna, ‘O fea o iai i latou? E lē o mafai ona ou iloa atu i latou!’ I nisi taimi atonu e faapena foi lo tatou faafitauli—ua lē taulau ona vaai i mata o le malamalama, pe iloa atu, ʻau faalelagi.—2 Tupu 6:8-16; Efeso 1:18.
5 Sa tatalo Elisaia ina ia faapupulaina mata o lana auauna. O le ā na sosoo ai? “Ona faapupulaina lea e Ieova o mata o le taulealea, ona iloa ai lea e ia, faauta foi, ua tumu le mauga i solofanua ma kariota afi, ua latou vagavagai ia Elisaia.” (2 Tupu 6:17) Ioe, na ia vaaia ʻau faalelagi, o ʻau faaagelu o loo faatalitali e puipuia le auauna a le Atua. O lea na ia malamalama ai loa i le mafuaaga na toʻa lelei ai Elisaia.
6. E mafai faapefea ona tatou malamalama i le faalapotopotoga faalelagi a Ieova?
6 Po o ia i tatou ea i nisi taimi le faafitauli i le malamalama i mea e pei o lea sa iai i le auauna a Elisaia? Po o tele ea ina tatou vaai atu i le na o le itu faitino mai o mea ia o loo faamataʻuina ai i tatou po o le galuega faa-Kerisiano i nisi o nofoaga? Afai o le tulaga lena, pe mafai ea ona tatou faatalitalia se faaaliga faapitoa e faamalamalamaina i tatou? E leai, auā ua ia i tatou se mea sa lei mauaina e le auauna a Elisaia—o se tusi atoa o loo taʻu mai ai le tele o faaaliga, le Tusi Paia, lea e mafai ona aumaia ai ia i tatou le malamalamaga e uiga i le faalapotopotoga faalelagi. Ua aumaia foi e lena Afioga faagaeeina mataupu silisili o loo fai ma taiala e faasaʻoina ai o tatou mafaufauga ma olaga o loo tatou ola ai. Peitai, e ao ona tatou faia se taumafaiga e sailia le faautauta ma ati ae le agaga talisapaia mo faatulagaga a Ieova. Ma e mafai ona tatou faia lena mea e ala i suesuega totino, faatasi ai ma le tatalo ma le manatunatu loloto.—Roma 12:12; Filipi 4:6; 2 Timoteo 3:15-17.
Suesue Ina ia Iloa Lelei
7. (a) O le ā le faafitauli atonu o loo fetaiai ma nisi e tusa ai o suesuega totino i le Tusi Paia? (e) Aisea e aogā ai taumafaiga mo suesuega totino?
7 O suesuega totino e lē masani aʻi ona avea o se vala fiafia mo le toatele o tagata, e pei o i latou na e lē tāitai ona fiafia e suesue i le aʻoga pe lē tāitai ona iai so latou avanoa e faia ai ni suesuega. Peitai, pe afai tatou te mananao e malamalama ma talisapaia le faalapotopotoga a Ieova i o tatou mata o le malamalama, e ao ona tatou ati ae se faanaunauga e fia suesue. Pe mafai ona e olioli e taumafa i se taumafataga manogi e aunoa ma ni sauniuniga na fai i ai? O le a taʻu atu ia te oe e so o se tagata kuka lava e faapea, e tele ni galuega e alu i le sauniunia o se taumafataga manogi. Ae atonu e na o se ʻafa itula pe lē atoa foi e taumafaina ai. Peitai ane, o aogā e maua mai suesuega totino e mafai ona aogā i le olaga atoa. O suesuega totino e mafai ona avea o se mea e faifai mālie lava ona fiafia i ai pe a oo ina tatou vaaia le agaigai i luma ua mafai ona tatou faia. Ua saʻo ai le faapea mai o le aposetolo o Paulo, e tatau ona tatou uaʻi atu pea ia i tatou lava ma la tatou aʻoaʻo atu, ma ia faaauau ona tatou faaleleia le faitauina o le Tusi Paia i le lautele. O ni taumafaiga faifai pea e manaomia, ae o aogā e mafai ona faavavau.—1 Timoteo 4:13-16.
8. O le ā le uiga o loo viiviia mai e le Faataoto?
8 Na faapea mai se tagata poto o aso anamua: “Loʻu atalii [po o le afafine] e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua.”—Faataoto 2:1-5.
9. (a) E faapefea ona faatusatusa atu le aogā o le auro i “le poto saʻo e uiga i le Atua”? (e) O ā meafaigaluega tatou te manaomia ina ia maua ai le poto saʻo?
9 Pe e te iloa po o ai e ana le tiute tauave o le faia o ni taumafaiga? Mātau le faaaogā soo o le fuaitau “afai e te.” Ma ia mātau le faaupuga, “afai e te suesue i ai, pei ona suesue i le oloa lilo.” Seʻi manatu i tagata eli auro o ē sa tele ni senituri o latou eli mo le ario ma le auro i Aferika i Saute, Mekisikō, Polivia, ma isi atunuu. Sa latou galulue mamafa, e faaaogā piki ma suō, e vane ese ai le papa mai le mea o loo latou mauaina ai uamea tāua. Sa matuā tāua ia i latou le auro, o lea i se tasi o nofoaga e eli ai le auro i Kalefonia, i le Iunaite Setete o Amerika, na latou vaneina ai ni lua i lalo o le eleele e tusa le uumi ma le 367 maila (591 kilomita), ma oo atu ai i se loloto e tusa ma le tasi le maila (1.5 kilomita)—ina ia mauaina lava le auro. Ae, pe mafai ona e taumafaina se auro? Pe inu se auro? Pe mafai ea ona faaolaina ai oe i se toafa pe afai ua e tāli oti i le matelaina i le fiaʻai ma le fiainu? E leai, o lona aogā e lē tumau ma e fua i le aogā e manatu ai i ai le tagata, e fesuisuiai pea, e pei ona atagia mai i maketi o fefaatauaiga a atunuu eseese o le lalolagi. E ui i lea, ua maliliu ai tagata mo le sailia. O lea la, o le ā le tele o ni taumafaiga e tatau ona fai ina ia maua ai le auro faaleagaga, “le poto saʻo e uiga i le Atua”? Seʻi manatu i ai, o le poto e uiga i le Alii Pule Silisiliese aoao, o lana faalapotopotoga, ma ana fuafuaga! I lenei itu, e mafai ai ona tatou faaaogaina piki ma suō faaleagaga. O lomiga faale-Tusi Paia na e fesoasoani ia i tatou e eliina ai le Afioga a Ieova ma malamalama i lona uiga.—Iopu 28:12-19.
Eli mo le Malamalamaga
10. O le ā na vaaia e Tanielu i se faaaliga?
10 Seʻi o tatou faia sina eli faaleagaga ina ia amata ai ona maua le poto e uiga i le faalapotopotoga faalelagi a Ieova. Mo le tatalaina o le malamalamaga, seʻi o tatou liliu atu i le faaaliga a Tanielu e faatatau i Lē ua mai anamuā ona aso o loo tietie i lona nofoalii. Ua tusi Tanielu: “Na ou vaavaai ina seia tuu mai o nofoālii, ua tietie mai foi Lē ua mai anamuā ona aso, ua sinasina lona ofu e pei o le kiona, ma ona lauao e pei o le fulufulu mamoe e lelei; o lona nofoālii o le afi mumū ia, ua se afi ua mu ana mea e taavalevale aʻi. Ua tafe mai le afi ua alu atu nai ona luma, ua afe ni afe o e auauna ia te ia, e mano ni mano o e laulaututū i ona luma; ua nofoia le faamasinoga, ma ua fofola tusi.” (Tanielu 7:9, 10) O ai i latou nei e afe ni afe o ē na auauna atu ia Ieova? I mau faasino o loo i autafa o le fuaiupu i le New World Translation, o loo faaaogā e pei o ni “piki” ma “suō,” ua tataʻi atu ai i tatou i mau e pei o le Salamo 68:17 ma le Eperu 1:14. Ioe, o i latou o loo auauna, o agelu ia i le lagi!
11. E mafai faapefea e le faaaliga na vaaia e Tanielu ona fesoasoani ia i tatou e malamalama ai i upu a Elisaia?
11 E lē o fai mai le tala a Tanielu faapea na ia vaai atu i agelu faamaoni uma lava o faatinoina le poloaiga a le Atua. Atonu e faitau miliona nisi e lē o iai. Ae mautinoa ua mafai nei ona tatou talisapaia le mafuaaga na faapea atu ai Elisaia: “E toatele ua ia te i tatou i e ua ia te i latou.” E ui sa lagolagoina le autau a le tupu o Suria e agelu lē faamaoni, o temoni, ae na matuā toatele atu ai ʻau faalelagi a Ieova!—Salamo 34:7; 91:11.
12. E mafai faapefea ona e iloa atili mea e uiga i agelu?
12 Atonu pe e te fia malamalama atili e uiga i nei agelu, e pei o le matafaioi o loo latou faia i le auauna atu ia Ieova. O le upu Eleni mo le agelu, e mafai ona tatou iloa ai o i latou o ni avefeau auā o le uiga foi o le upu, o le “avefeau.” Peitai, e iai ma nisi mea se tele atu e faaopoopo i o latou tiute. Ae ina ia iloa po o ā na mea, e tatau ona e eli. Afai o e mauaina le Insight on the Scriptures, e mafai ona e suesue i le mataupu “Angels” (Agelu), po o lou saili atu i ni mataupu ua teʻa i Le Olomatamata e faatatau i agelu. O le a e maofa i le iloaina o le tele o mea e mafai ona e aʻoaʻoina e uiga i nei auauna faalelagi a le Atua ma oo ai ina e talisapaia la latou lagolagosua. (Faaaliga 14:6, 7) Ae peitai, i le faalapotopotoga faalelagi a le Atua, e iai nisi meaola agaga o loo auauna mo ni fuafuaga faapitoa.
Le Mea na Vaaia e Isaia
13, 14. O le ā na vaaia e Isaia i se faaaliga, ma na faapefea i lenei mea ona aafia ai o ia?
13 Seʻi tatou toe eli atili atu i le faaaliga a Isaia. Pe a e faitauina le mataupu e 6, i le fuaiupu 1 e oo i le 7, e tatau ona e maofa. Ua faapea mai Isaia, na ia ‘iloa atu Ieova o afio i le nofoālii,’ ma ‘sa tutū serafi i luga aʻe o ia.’ Sa latou alalaga atu e faatatau i le mamalu o Ieova, ma viiviia lona paia. E tatau ona faagaeetia oe i le faitauina o lenei tala. O le ā le tali atu a Isaia? “Ona ou faapea atu ai lea, Aue aʻu nei! auā ai aʻu a fano [i Seoli]; auā o aʻu o le tagata laugutu leaga, o aʻu foi matou te mau faatasi ma le nuu laugutu leaga; auā lava ua iloa i oʻu mata le Tupu o Ieova o ʻau.” Maeu sona maofa i lena faaaliga! Po o e maofa ai?
14 Na mafai la faapefea e Isaia ona tatalia lenei faaaliga mamalu? Ua ia faamatala mai faapea na oo ane se serafi ma laveaiina o ia ma faapea ane: “Ua aveeseina ai lau amio leaga, ua faamagaloina foi lau agasala.” (Isaia 6:7) Sa mafai e Isaia ona faatuatua atu i le alofa mutimutivale o le Atua ma uaʻi atu i fetalaiga a Ieova. Nei la, pe e te lē fia iloa atili nisi mea e faatatau i nei foafoaga agaga o loo iai i ni tulaga maualuluga? O le ā la e tatau ona e faia? Ia eli mo ni faamatalaga atili. O se tasi o fesoasoani o le faaaogā lea o le Watch Tower Publications Index, i le mulimuli atu i ona faasinotusi i le tele o isi lomiga e maua mai ai faamatalaga e faamaninoina ai.
O le ā na Vaaia e Esekielu?
15. O le ā e faamaonia ai e maufaatuatuaina le faaaliga na vaaia e Esekielu?
15 Seʻi o tatou taliu atu i le isi ituaiga o foafoaga agaga. Sa faaeaina Esekielu e vaaia se faaaliga faagaeeina a o faaaunuua o ia i Papelonia. Tatala lau Tusi Paia i le Esekielu mataupu 1, i fuaiupu muamua e tolu. Ua faapefea ona amata le tala? Po o faapea mai ea, ‘I aso lava la ua leva, i se nuu mamao lava . . . ’? E leai, e lē o se tala faafagogo lenei mea i se taimi tau matemate. Ua faapea mai le fuaiupu 1: “O le tolugafulu o tausaga, o lona fa o masina, o le aso lima o le masina, na ou i ai ma le tafeaga e lata ane i le vaitafe o Kepara, ua avanoa mai le lagi, ona ou iloa lea o faaaliga mai le Atua.” O le ā e te matauina i lenei fuaiupu? O loo aumaia ai le taimi tonu lava ma le nofoaga saʻo. O nei auiliiliga e faasino atu i le tausaga lona lima o le faaaunuuaina o le tupu o Ioakina, i le tausaga e 613 T.L.M.
16. O le ā na vaaia e Esekielu?
16 Na oo ane le aao o Ieova ia Esekielu, ma amata ai ona ia vaaia se faaaliga matautia o Ieova o loo afio i le nofoālii i totonu o se kariota telē faalelagi o loo iai ni ona uili taavavale tetele ma mata o loo soo ai mea e liʻo ai. O faamatalaga tatou te naunau i ai e faapea e fa meaola, e taitasi le meaola ma tū i luga o mea taavavale taitasi. “O lo latou tino lenei, o le faatusa o le tagata i latou. Taitasi foi o i latou ma ona mata e fa, taitasi foi ma ona apaau e fa. O le faatusa foi o latou mata, ua ia te i latou e fa o mata o le tagata, ma mata o le leona i le itu taumatau; ua ia te i latou foi e fa mata o le povi [“poʻa,” NW] i le itu tauagavale; ua ia te i latou foi e fa mata o le aeto.”—Esekielu 1:5, 6, 10.
17. O ā e fai ma sui o mata taʻifā o kerupi?
17 O ā nei meaola e fa? O Esekielu lava ia ua taʻu maia ia i tatou faapea o ni kerupi. (Esekielu 10:1-3, 14) Aisea na taʻifā ai o latou mata? E fai ma sui o uiga matilatila e fa o le Alii Pule Silisiliese o Ieova. O mata o le aeto sa fai ma faailoga o le atamai, tofā mamao. (Iopu 39:27-29) O le ā na fai ma sui o mata o le povi poʻa? Ona o le matuā malosi o loo iai i le ua ma tauʻau, ua iloa ai e mafai e se povi poʻa o loo tau ona liaʻi i luga se solofanua ma le tagata o loo tietie ai. E mautinoa, o le povi poʻa o le faatusa lea o le malosi e lē gata mai o Ieova. Ua faaaogā le leona e fai ma faailoga o le faamasinotonu e faia ma le lototele. Ma le mea mulimuli, o mata o le tagata ua talafeagai ona fai ma sui o le alofa o le Atua, auā ua na o le tagata lava le foafoaga faalelalolagi e mafai ona faaalia mai ma le atamai lenei uiga.—Mataio 22:37, 39; 1 Ioane 4:8.
18. Ua faapefea ona fesoasoani mai le aposetolo o Ioane ina ia tatou iloa lelei le faalapotopotoga faalelagi?
18 O loo iai isi faaaliga e mafai ona fesoasoani ia i tatou e faamaeʻa ai le ata. O nei faaaliga e aofia ai faaaliga na vaaia e Ioane o loo faamatalaina i le tusi o le Tusi Paia o le Faaaliga. O Ioane, i le pei o Esekielu, ua ia vaaia foi Ieova o afio i le nofoālii mamalu faatasi ma kerupi. O ā mea o loo faia e kerupi? O loo latou toe faaleo atu le folafolaga a serafi na o loo i le Isaia mataupu e 6, i le faapea mai: “E paia, e paia, e paia le Alii le Atua e ona le malosi uma lava, o le na soifua, o loo soifua foi, o le a afio mai!” (Faaaliga 4:6-8) Ua vaaia foi e Ioane se tamai mamoe i tala ane o le nofoālii. O ai atonu o loo fai mona sui? O le Tamai mamoe lava a le Atua, o Iesu Keriso.—Faaaliga 5:13, 14.
19. E ala i lenei suesuega, o le ā ua e iloa lelei e faatatau i le faalapotopotoga a Ieova?
19 O lea e ala la i nei faaaliga, o le ā ua tatou iloa lelei ai? Ua iloa ai o le faatumutumuga o le faalapotopotoga faalelagi o loo afio ai Ieova le Atua i lona nofoālii faatasi ma le Tamai mamoe, o Iesu Keriso, o ia o le Upu, po o le Lokou. Ona tatou vaaia lea o se ʻau faalelagi o agelu, o loo aofia ai serafi ma kerupi. O i latou o le vaega o se faalapotopotoga tele, ma le autasi o loo faatinoina fuafuaga a Ieova. Ma o se tasi o na fuafuaga o le talaʻia lea o le tala lelei i le lalolagi aoao i lenei taimi o le iuga.—Mareko 13:10; Ioane 1:1-3; Faaaliga 14:6, 7.
20. O le ā le fesili o le a taliina i le mataupu o loo sosoo mai?
20 Ma le manatu faaiu, ua tatou iai faatasi ma Molimau a Ieova i le lalolagi o loo latou faatasitasi i o latou Maota o le Malo ina ia aʻoaʻoina le auala e faia ai le finagalo o le Alii Pule Silisiliese. E mautinoa, ua mafai nei ona tatou talisapaia faapea, o loo toatele atu i latou o loo tatou faatasi nai lo i latou o loo faatasi ma Satani ma fili o le upu moni. O loo tumau pea le fesili, O le ā le faiā a le faalapotopotoga faalelagi ma le talaʻia o le tala lelei o le Malo? O le mataupu o loo sosoo mai o le a iloiloina ai lena mataupu ma isi mataupu.
Fesili mo le Autaluga
◻ Ina ia talisapaia le faalapotopotoga a Ieova, o le ā e tatau ona tatou iloa lelei?
◻ O le ā le mea na oo i le auauna a Elisaia, ma na faapefea ona faalaeiauina o ia e le perofeta?
◻ O le ā le manatu e tatau ona tatou manatu ai i suesuega totino?
◻ Ua faapefea ona aumaia e Tanielu, Isaia, ma Esekielu auiliiliga o le faalapotopotoga faalelagi?
[Ata i le itulau 13]
O aogā o suesuega totino e sili mamao atu nai lo aogā o se taumafataga ua saunia lelei
[Ata i le itulau 15]
O le faaaliga i ʻau faalelagi o le tali lena a Ieova i le tatalo a Elisaia