Lipoti a Ē Faalauiloa le Malo

‘I le Maketi i Aso Faisoo’

NA FAAAOGĀ e le aposetolo o Paulo avanoa uma e faasalalau atu ai le feau o le Malo. Ina ia sailia i latou o ē ua tatau i ai, na lauga atu ai “i le sunako ia Iutaia . . . ua tautala foi ma e na feiloai ma ia i le malae [“maketi,” NW] i aso fai soo.”—Galuega 17:17.

O lena maelega ua avea o se faailoga tuese o tagata tapuai o Ieova talu mai le senituri muamua T.A. (Mataio 28:19, 20) I aso nei, ua faapena ona faaaogā e Molimau a Ieova metotia eseese a o latou maelega e fesoasoani atu i ē loto faamaoni ina ia mauaina le poto saʻo o le upu moni. (1 Timoteo 2:3, 4) Ua faataitaia lenei mea i se mea na tupu i Ausetalia o loo mulimuli mai.

I aso e lima o vaiaso taitasi, e feauauai ai Sid ma Harold i le vaavaaia o le la laulau o loo faaali ai lomiga faale-Tusi Paia i se nofoaga o nofoaafi i Sini. Ua pe ā nei ma le lima tausaga talu ona la folafolaina atu le tala lelei o le Malo o le Atua i lenei auala. O Sid, o lē ua 95 nei ona tausaga, ua faamatalaina mai e faapea: “Ina ua atoa le 87 o oʻu tausaga, na lē mafai ai ona ou toe aveina se taavale. Na avea lena ma mea na ou lē fiafia ai ona sa ou fiafia i le galuega molimau atu i le lautele. I se tasi aso a o oʻu i tafatafa o se nofoaga e masani ona iai turisi, e taʻua o Echo Point i Katoomba, na ou matauina ai se tagata tusiata o loo faatauina atu ni ana ata o ni laufanua eseese. Na ou matamata i ata ma ou iloaina ai, ʻE iai aʻu ata e sili atu o loo i laʻu ato talaʻi—ma e sili atu foi ona taugofie!’ O lea na ou filifili ai loa e fai saʻu laulau, e faatuina i se nofoaga e toatele ai turisi, ma ofoina atu ai i ē o feoai ane lomiga mananaia faale-Tusi Paia o loo tufatufaina e Molimau a Ieova.

“I tausaga e fa na mavae atu, na sifi atu laʻu laulau i Sini, ona ma galulue faatasi ai lea ma Harold. Ona ma feauauai lea e vaai le laulau ma galulue faatasi ai ma a ma faapotopotoga.” O Harold, lea ua 83 nei ona tausaga, ua faapea mai: “Mai le Aso Gafua i le Aso Faraile e matuā toaitiiti lava tagata e maua i fale. O lea la, o le tufaina atu o le feau o le Malo i lenei auala ua tuuina ai i maʻua i le nofoaga o loo iai tagata. E masani lava ona ma mauaina ai iuga e sili atu. E matuā matilatila ese lava le aofaiga o a ma lomiga na ofoina atu mo lenei atunuu.”

Ua faapea mai Sid: “E ui lava ina fesuiai pe ā ma le fa i le lima nofoaga ma te galulue ai i le faasologa o tausaga, ae lē umi lava ae iloa i maʻua e tagata. O nisi tagata e ō mai ia i maʻua mo ni lomiga. O isi e mananao e taliina a latou fesili. Ae o nisi e na ona mananao e talanoa mo ni nai minute. E na o le pau lava lea o le taimi e ō mai ai aʻu toe asiga ia te au,” o lana tala ata lea.

Ua faaopoopo mai Harold: “O le toatele o tagata e fiafia moni lava i le Tusi Paia. I le masina e tasi e toʻafā tagata na amata ona latou suesueina le Tusi Paia ma Molimau a Ieova o se iuga o lomiga na latou mauaina mai ia te i maʻua ma talu ai sa mafai ona ma taliina fesili mai le Tusi Paia. O na mea na tutupu na matuā faalaeiauina ai i maʻua.”

E pei o Sid ma Harold—ma pei o le aposetolo o Paulo—e faaaogaina ai e Molimau i so o se mea auala uma e mafai ai e faasalalau atu ai la latou feau tāua. O lea, ua faaauau ai ona talaʻia le “tala lelei . . . i le atu laulau uma.”—Mataio 24:14.