Le Vaaiga Faa-Kerisiano i Aganuu o Falelauasiga

O LE maliu faafuasei e aunoa ma le faatalitalia o sē e pele ia i tatou, e matuā mafatia ai lava. E matuā aafia loloto ai lava le mafaufau ma oo ai foi i tiga tau i faalogona. E iai le eseesega o le maliu o sē e pele sa faataotolia i se maʻi tiga mo se taimi umi, ae e tumau pea lagona faanoanoa ona ua motusia le mafutaga ma se tasi.

E tusa lava po o le ā le tulaga na maliu ai lē e pele ia i tatou, e manaomia e ē o mafatia le lagolago atu ma se faamafanafanaga. E ono feagai foi se Kerisiano o mafatia ma ni sauaga mai ia i latou e finau mauai e faatino ni aganuu i falelauasiga e lē faale-Tusi Paia. E taatele lenei faiga i le tele o atunuu i Aferika faapena foi ma nisi vaega o le lalolagi.

O le ā e fesoasoani i se Kerisiano mafatia ina ia alofia ai aganuu i falelauasiga e lē faale-Tusi Paia? E faapefea i aumea talitonu ona lagolago atu i nei taimi faigata? O tali i nei fesili e ao ona manatu mamafa i ai i latou uma o loo saili e faafiafia Ieova, auā “o lenei lava le toaga i lotu e lelei ma le faamaoni i luma o le Atua o le Tamā lea, ina ia tauasiasi atu i e mātua oti ma fafine ua oti a latou tane i o latou tiga, ia leoleo foi o ia ia te ia, ina neʻi pisia mai o ia i le lalolagi.”—Iakopo 1:27.

Fesootai Ona o se Talitonuga

O le pogai autū lava e fesootai ai le tele o aganuu o falelauasiga o le talitonuga lea o loo ola pea ē ua oti i se nofoaga e lē iloa o loo iai tuaa. O le toatele o ē o faanoanoa, e faamalosia i latou e fai nisi ituaiga aganuu ona o le faamalieina o ē ua oti. A lē o lena foi latou te fefe neʻi lē fiafia o latou tuaoi ona o le talitonuga e ono oo mai ni mala i le nuu ona o le lē faia o nisi o tu e masani ai.

E lē tatau i se Kerisiano moni ona lolo atu i le fefe i tagata ma auai i ni aganuu e lē fiafia i ai le Atua. (Faataoto 29:25; Mataio 10:28) Ua faaalia e le Tusi Paia e lē o toe iloa e ē ua oti se mea, auā ua faapea mai: “Auā o e ua ola, ua latou iloa e oti i latou; a o e ua oti, latou te le iloa se mea . . . Auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:5, 10) O le mafuaaga lea, na lapataia ai e Ieova ona tagata i taimi anamua e ʻaua le taumafai e faamalie ē ua oti po o le fesootai foi ma i latou. (Teuteronome 14:1; 18:10-12; Isaia 8:19, 20) O nei upu moni mai le Tusi Paia e feteenai ma le tele o aganuu i falelauasiga e masani ai.

Ae Faapefea “Feusuaiga mo le Faamamāina”?

I nisi atunuu i Aferika tutotonu, e faatalitalia ai le paaga faaipoipo lea e mafatia e feusuai faaleituaiga ma se tauaiga vavalalata o lona toalua ua oti. Afai e lē faia lenei mea, ua talitonuina faapea o le a faaleaga e le tagata ua oti ia le aiga o loo ola. E taʻua lenei aganuu o “feusuaiga mo le faamamāina.” Peitai e faatulaga e le Tusi Paia so o se feusuaiga faaleituaiga lava i fafo mai o le faaipoipoga o le “faitaaga.” Talu ai o Kerisiano e ao ona ‘sosola ese i le faitaaga,’ latou te teea ai ma le lototele lenei aganuu e lē faale-Tusi Paia.—1 Korinito 6:18.

Manatu i le mea na tupu i se fafine ua oti lana tane e suafa ia Mercy.a Ina ua maliu lana tane i le 1989, sa mananao tauaiga ia te ia e fai le feusuaiga mo le faamamāina ma se tauaiga tamaloa. Sa ia teena, ma faamatala atu e feteenai le aganuu ma le tulafono a le Atua. I le lē malilie lava, sa tuua ai o ia e tauaiga ina ua uma ona latou fasiina o ia i a latou faamatalaga. I le masina mulimuli ane ai na latou suʻe maeʻaeʻa ai lona fale, to ese apa sa ato ai lona fale. Na latou faapea atu: “O aʻe a la lau lotu e tausi oe.”

Sa faamafanafana atu le faapotopotoga ia Mercy e oo lava i le toe fau o se fale fou mo ia. Sa matuā faagaeetia ai lava tuaoi i lenei mea ma oo ai ina filifili nisi e ō mai e auai i le galuega, o le faletua lava o le matai Katoliko na muamua mai ma lau e ato ai le fale. Sa faamalosia le fanau a Mercy i lana amio faamaoni. Talu mai lena taimi e toʻafā o i latou ua faia se tuuina atu ia Ieova le Atua ma e toatasi sa auai talu ai nei i le Aʻoga mo Toleniga i le Faiva.

Ona o le aganuu o le feusuaiga mo le faamamāina, ua iu ai ina faaipoipo nisi Kerisiano ma se tagata lē talitonu ona o nei omiga. Mo se faataitaiga, na fai faavavevave se faaipoipoga a se tasi tane ua 70 ona tausaga ma se teine talavou e aiga i lana avā ua maliu. O le faia o lenei mea, e mafai ai ona ia fai atu ua ia faia le feusuaiga mo le faamamāina. Peitai, o lenei gaoioiga e feteenai ma le fautuaga a le Tusi Paia e ao i Kerisiano ona faaipoipo “tau lava i le ua i le Alii.”—1 Korinito 7:39.

Leoina o le Tino Maliu i le Po Atoa

I le tele o atunuu, e potopoto ai ē ua faavauvau i le aiga o lē ua maliu ma e feala lava i le po atoa. E masani lava i ē faia lenei leo ona fai ni faigaʻai ma ni musika leoleoā. E talitonuina o lenei faiga e faamalie ai le tagata oti ma ia puipuia ai le aiga o loo ola mai faiga faataulaitu. E ono fai ni lauga faaviivii e faamalie ai le tagata ua maliu. A uma se lauga, ona usu lea e tagata faanoanoa se pese lotu a o lei tulai mai le isi e lauga. E ono faaauau ai lava lenei faiga seia ao.b

E lē auai se Kerisiano moni i lena faiga faaaganuu o le ala i le po atoa, auā ua faaalia e le Tusi Paia e faapea o ē ua oti e lē toe mafai ona fesoasoani pe faaleaga mai foi i ē o ola. (Kenese 3:19; Salamo 146:3, 4; Ioane 11:11-14) E taʻusalaina foi e le Tusi Paia ia faiga faaagaga. (Faaaliga 9:21; 22:15) Peitai ane, e ono faigata i se avā ua oti lana tane ona taofia isi i le faia o faiga faaagaga. Latou te ono maumauaʻi e faia le leo i le po atoa i lona aiga. O le ā e ono fai e aumea Kerisiano e fesoasoani ai i se Kerisiano mafatia e fesagaia lenei puapuaga ua faaopoopo atu?

E masani lava i toeaina o le faapotopotoga ona lagolago atu i le Kerisiano ua mafatia e ala i le feutagai ma tauaiga ma tuaoi. O le maeʻa o ia feutagaina, e ono ioe ai nei tagata e tuua filemu le aiga ma toe faapotopoto mai mo le falelauasiga i le isi aso. Ae faapefea pe afai e iai nisi e finau mauaʻi mai pea? O le faaauau pea ona fai se feutagaina e ono iu ai i se vevesi. “E le tatau ona faamisa le auauna a le Alii, ae e tatau ona pulea lelei o ia i omiga leaga.” (2 Timoteo 2:24, NW) O lea la afai e faamalosi ona ō mai tauaiga ia e lē fia gauai mai ma pulea le mea atoa, atonu e leai se mea e mafai ona fai e le tinā Kerisiano ua oti lana tane ma lana fanau e taofia ai lena tulaga. Peitai e lē mafai ona latou auai i so o se faiga faalotu lava e faia i totonu o lo latou fale, ona e latou te usitai i le faatonuga a le Tusi Paia: “Aua tou te amo faalegatasi ma e le faatuatua.”—2 Korinito 6:14.

O le mataupu silisili lenei e faatatau foi i le taimi o le tanuga. E lē auai Molimau a Ieova i pese, tatalo, po o nisi lava tu masani e taitaia e se faifeau o lotu sese. Afai e manatu tauaiga Kerisiano vavalalata e talafeagai le auai i le sauniga, e leai se latou vaega e faia ai.—2 Korinito 6:17; Faaaliga 18:4.

O Sauniga o Falelauasiga e Mamalu

O sauniga o falelauasiga e faia e Molimau a Ieova e lē aofia ai ni tu e taumafai e faamalie ai lē ua maliu. E faia se lauga faale-Tusi Paia a lē o le Maota o le Malo, o le fale maliu, o le aiga o lē ua maliu, ia po o luga foi o le tuugamau. O le fuafuaga o le lauga ia faamafanafana i ē ua mafatia e ala i le faamalamalama o le mea o fai mai ai le Tusi Paia e uiga i le oti atoa ma le faamoemoe o le toetu. (Ioane 11:25; Roma 5:12; 2 Peteru 3:13) E ono usu se pese e faavae mai i le Tusi Paia, ona faaiu ai lea o le sauniga i se tatalo faamafanafana.

E lei leva atu nei sa faia ai se sauniga o se falelauasiga faapea mo se tasi o Molimau a Ieova ma o ia o le tuafafine laitiiti o Nelson Mandela, le peresitene o Aferika i Saute. Ina ua maeʻa le sauniga, sa matuā faafetai atu le peresitene i le failauga. E toatele tagata mamalu ma ofisa maualuluga sa auai. Na faapea mai se minisita sa auai: “O le falelauasiga pito i mamalu lenei ua ou auai.”

Pe Talia Ofu o le Faanoanoa?

E faanoanoa Molimau a Ieova i le maliu o sē e pele ia i latou. E ono maligi o latou loimata, pei lava foi o Iesu. (Ioane 11:35, 36) Ae latou te lē manatu e talafeagai le faaali atu o lo latou matuā faanoanoa i luma o le lautele i ni faiga i le vaaiga a tagata. (Faatusatusa i le Mataio 6:16-18.) I le tele o isi atunuu, e faatalitalia le fafine ua maliu lana tane e ofuina ni ofu faapitoa o le faanoanoa e faamalie ai lē ua maliu. O nei ofu e ao ona ofuina mo ni masina ia po o le tausaga foi pe a mavae le falelauasiga, ma o le taimi e tatala ese ai e ao ona fai ai se isi faigaʻai.

O le lē taulau ona faaalia o gaoioiga o le faanoanoa e manatu i ai o se faiga lē faaaloalo mo le tagata oti. Ona o lenei mafuaaga, ua tutuliesea ai Molimau a Ieova mai o latou lava aiga ma fanua e taʻitaʻi o ituaiga i ni vaega o Swaziland. Peitai, e tausia pea nei Kerisiano faamaoni e o latou uso faaleagaga o loo i isi vaipanoa.

Na aumaia se faaiuga a le Faamasinoga Maualuga i Swaziland e lagolagoina Molimau a Ieova, sa faapea mai e ao ona faataga i latou e toe foi i o latou aiga ma fanua. O se tasi mea na tupu, sa faataga ai se fafine Kerisiano e nofo i lona fanua ina ua uma ona ia avatu se tusi ma se lipine puʻe leo lea sa matuā faamanino mai ai lava e lana tane ua maliu ina ia aua neʻi ofuina e lana avā ni ofu o le faanoanoa. O lea la, sa mafai ona ia faamaonia atu o loo ia faaaloalo i lana tane.

E matuā aogā tele lenei mea i le uluai faataatitia lelei o faatonuga mo le falelauasiga a o lei maliu se tasi, ae maise lava nofoaga e taatele ai faiga e lē faale-Tusi Paia. Manatu i le faaaoaoga a Victor, e nofo i Cameroon. Sa ia tusia lelei ma faamanino le polokalame o lona falelauasiga. I lona aiga e toatele tagata aloaia e auai i le aganuu o faiga e faaaloalo ai i le tagata ua maliu, e aofia ai le tapuaiga i le atigipoo o le tagata. Ona o Victor la o se tagata aloaia o le aiga, na ia iloa e ono faia faapea i lona atigipoo. O lea na ia faia ai faatonuga manino i le auala e taulimaina ai e Molimau a Ieova lona falelauasiga. Ona o lenei mea sa matuā faigofie ai lava mea mo lana avā o loo ola ma lana fanau, ma na avatu ai se molimau lelei i le nuu.

Alofia le Faataitai i Aganuu e Lē Faale-Tusi Paia

O nisi ua iai le poto o le Tusi Paia ae e fefefe e foliga atu o latou e ese. Ina ia alofia sauaga, ua latou taumafai e faafiafia i o latou tuaoi e ala i le faafoliga atu o loo latou faia le leo mo ē ua maliliu. A o faapea atu o se mea lelei le asiasi atu i lē ua mafatia ma avatu se faamafanafanaga totino, e lē manaomia ai i lenei mea le faia o se tamaʻi falelauasiga i le aiga o lē ua maliu i po uma lava a o lei oo i le falelauasiga moʻi. O le faia o lenei mea e ono tautevateva ai isi, ona e ono avatu ai ia i latou le manatu faapea o ē o faia nei mea e lē talitonu moni i le mea o fai mai ai le Tusi Paia i le tulaga o ē ua maliliu.—1 Korinito 10:32.

Ua uunaia e le Tusi Paia ia Kerisiano ina ia faamuamua le tapuaiga i le Atua i o latou olaga ma ia faaaogā tatau o latou taimi. (Mataio 6:33; Efeso 5:15, 16) Ae peitai, i nisi nofoaga, e taofia ai gaoioiga a le faapotopotoga a lē mo se vaiaso po o le sili atu foi ona o se falelauasiga. E lē na o Aferika e tupu ai lenei faafitauli. E faatatau i se tasi falelauasiga, na faapea mai se lipoti mai Amerika i Saute: “Sa matuā paʻū maulalo lava tagata na auai i sauniga faa-Kerisiano e tolu. E lei lagolagoina le auaunaga i le fanua mo le sefulu o aso. E oo lava i tagata i fafo o le faapotopotoga ma tagata o loo fai a latou suesuega faale-Tusi Paia sa faateʻia ma lē mautonu i le vaai atu i o tatou uso ma tuafāfine o auai i gaoioiga o le falelauasiga.”

O nisi vaipanoa, e ono valaaulia ai e le aiga mafatia na o ni nai uo vavalalata i lo latou aiga pe a maeʻa le falelauasiga mo se taumafataga māmā. Ae i le tele o vaega o Aferika, e ō atu ai le faitau selau sa auai i le falelauasiga i le aiga o lē ua maliu ma faatalitalia se faigaʻai tele, lea e masani ona fai ai taulaga i manu. O nisi o loo auai mai i le faapotopotoga ua faataʻitaʻi i nei aganuu, ua foliga mai ai o loo latou faia lenei aganuu e faamalie ai i lē ua maliu.

O sauniga o falelauasiga e faia e Molimau a Ieova e lē avatua ai ni avega taugata i ē o mafatia. O lea la e lē talafeagai ona fai se faatulagaga faapitoa mo ē o auai e aumai ni tupe e faatupe ai se falelauasiga taugata. Afai e lē gafatia e le tinā mativa ua oti lana tane ia tupe faaalu, e lē taumatea o le a fiafia isi i le faapotopotoga e fesoasoani. Afai e lē lava lena fesoasoani, e ono faatulaga e toeaina le saunia o le fesoasoani faaletino mo ē ua tatau i ai.—1 Timoteo 5:3, 4.

E lē o taimi uma e feteenai ai aganuu o falelauasiga ma mataupu silisili o le Tusi Paia. Ae pe a feteenai, e maumauaʻi Kerisiano e gaoioi ia talafeagai ma le Tusi Paia.c (Galuega 5:29) E ui lava e aumaia ai e lenei mea ia puapuaga faaopoopo, e toatele auauna a le Atua e mafai ona latou tautino mai sa latou feagai ai ma le manuia ma nei tofotofoga. Sa latou faia faapea faatasi ai ma le malosi mai ia Ieova, ‘le Atua o faamafanafanaga uma,’ atoa ma le fesoasoani alofa mai aumea talitonu o ē sa faamafanafanaina i latou i o latou puapuaga.—2 Korinito 1:3, 4.

[Faaopoopoga i lalo]

[Pusa i le itulau 23]

Faamanuiaina Ona o lo Latou Tumau Mausali

O Sibongili o se fafine Kerisiano lototele e nofo i Swaziland ua oti lana tane. Ina ua mavae le maliu talu ai nei o lana tane, sa ia teea le faia o aganuu e manatu i ai le toatele e faamalie ai lē ua oti. Mo se faaaoaoga, e lei selemamāina lona lauulu. (Teuteronome 14:1) E toavalu tagata o le aiga sa matuā feita lava ona o lenei mea ma latou selemamā faamalosia lona lauulu. Sa latou taofia foi Molimau a Ieova mai le asiasi atu i le aiga e faamafanafana atu ia Sibongili. Peitai, o isi tagata o ē fiafia i le feau o le Malo sa latou fiafia e asiasi atu ia te ia ma avatu tusi o faamafanafanaga sa tusia e toeaina. I le aso sa faatalitalia Sibongili e na te ofuina ai ni ofu faapitoa o le faanoanoa, sa tupu ai se mea na faateʻia ai. Sa talo e se tagata aloaia o le aiga se faatasiga e talanoa ai le tetee o Sibongili e fai aganuu e masani ai o le faanoanoa.

Na lipoti mai e Sibongili e faapea: “Sa latou fesili mai pe faataga aʻu e loʻu talitonuga faalotu e faaali atu le faanoanoa e ala i le ofu o ofu uli o le faanoanoa. Ina ua uma ona faamatala atu loʻu tulaga, sa latou taʻu mai ia te au e latou te lē faamalosia aʻu. O le mea sa ou ofo ai, ona sa latou faatoese uma mai lava i lo latou soona faia o aʻu atoa ma lo latou selemamāina o loʻu ulu e aunoa ma loʻu loto i ai. Sa latou fai mai uma lava e faamagalo i latou.” Mulimuli ane, sa faaalia mai e le uso laitiiti o Sibongili lona talitonuga e faapea o Molimau a Ieova o loo iai le lotu moni, ma talosaga mai mo se suesuega faale-Tusi Paia.

Manatu i le isi faaaoaoga: O se tamaloa Aferika i Saute e suafa ia Peniamina faatoʻā 29 tausaga lona matua ae ia faalogo loa i le maliu faafuasei o lona tamā. O le taimi lena, e na o Peniamina lava o lo latou aiga e Molimau. I le taimi o le sauniga o le tanuga, e faatalitalia ai tagata uma e ui atu i tafatafa o le tuugamau ma asu atu se luuga palapala i le pusa maliu.d A maeʻa le tanuga, ona selemamā lea o ulu o tauaiga vavalalata uma lava. Ona e lei auai Peniamina i nei tu masani, sa faapea mai tuaoi ma tagata o le aiga o le a faasalaina o ia e le agaga o lona tamā ua oti.

Na faapea mai Peniamina: “Ona sa tuu atu loʻu faatuatuaga ia Ieova, e leai se mea na tupu ia te au.” Sa matauina e tagata o le aiga le leai o se mea sa tupu ia te ia. Ina ua mavae se taimi, na amata ai e nisi o i latou ona suesueina le Tusi Paia ma Molimau a Ieova ma papatisoina e faailoa atu ai lo latou tuuina atu i le Atua. O le ā le mea ua tupu ia Peniamina? Ua ia ulu atu i le galuega faaevagelia faataimi atoa. I nai tausaga ua mavae atu, na ia maua ai le faaeaga o le auauna i faapotopotoga o Molimau a Ieova o se ovasia femalagaai.

[Faaopoopoga i lalo]