Ia Matuā Faaaogā Lelei Lou Olaga

SA FAATAOTOLIA i le fale le tamā, ua toetoe lava a oti i le kanesa. O lona atalii sa i le falekamuta, o loo teuina faalelei meafaigaluega a lona tamā. A o ia taulimaina meafaigaluega, sa ia tomānatu e faatatau i mea matagofie sa faia e lona tamā e faaaogā ai nei meafaigaluega. E ui o le falekamuta e sosoo ma le fale, ae na ia iloaina e lē toe ulu atu lava lona tamā i lena fale, na te lē toe uuina meafaigaluega na sa ia tomai tele i le faaaogaina. Ua mavae atu lena vaitaimi.

Sa manatunatu le atalii i le mau i le Failauga 9:10: “O mea uma ua e iloa e faia e ou lima, ina faia ia ma lou malosi; auā e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” Sa ia iloa lelei lena mau. Sa ia faaaogaina soo pe a ia aʻoaʻoina isi i mea moni o i le Tusi Paia faapea o le oti o se tulaga o le lē toe gaoioi. O lea la ua ootia nei lona loto i le uiga moni o upu a Solomona—e tatau ona tatou faaaogā lelei o tatou olaga ma olioli i o tatou aso a o tatou mafaia auā o le a oo mai le taimi e tatou te lē toe mafai ai ona faia faapea.

Ia Olioli i le Olaga

I le tusi atoa o Failauga, sa apoapoai ai e le tupu poto o Solomona lana au faitau ia maua le olioli i le olaga. I le mataupu e 3, mo se faataitaiga ua taʻua ai: “Ua ou iloa e leai se mea lelei ia te i latou, na ona ia olioli le tagata, ma ia fai mea lelei i lona olaga nei. I le ma lea, ia taitasi le tagata ma ʻai, ma inu, ma fiafia i mea lelei i ana galuega uma; o le mea foaiina mai lea e le Atua.”—Failauga 3:12, 13.

Sa faagaeeina Solomona e le Atua ia toe taʻua lenei manatu: “Faauta i le mea ua ou iloa; o le mea lelei ma le matagofie i le tagata e ʻai, ma inu, ma fiafia i le lelei mai ana galuega uma na te faia i lalo o le la, i aso uma o lona ola ua foaiina e le Atua ia te ia; auā o mea ia e fai māna.”—Failauga 5:18.

Sa ia faalaeiau atu foi faapena i talavou faapea: “Le taulealea e, ina olioli ia i lou tama itiiti, ia fiafia foi lou loto i aso o lou taulealea [po o le tamaitai talavou], ma ia e savali i ala ua e loto i ai, ma mea e vaai i ai ou mata.” (Failauga 11:9a) Maeu le lelei o le olioli i le mea e gata ai i le malosi o le talavou!—Faataoto 20:29.

‘Ia Manatua Lē na Faia Oe’

O le mea moni, e lei manatu Solomona faapea e atamai ona sailia mea uma ia e ono manaia i o tatou loto po o mata. (Faatusatusa i le 1 Ioane 2:16.) Ua manino mai i faamatalaga ua ia tusia o loo sosoo ai: “A ia e iloa e faamasinoina oe e le Atua ona o na mea uma [gaoioiga ia e ono faamalieina ai ou faanaunauga].” (Failauga 11:9e) Po o le ā lava lo tatou matutua, e tatau ona tatou manatua faapea o loo matauina e le Atua mea o loo tatou faia i o tatou olaga ma e na te faamasinoina i tatou ma le tonu.

Pagā le valea o le manatu faapea e mafai ona tatou ola i se olaga e taulai atu na o i tatou lava ae tuu le tuutoina i le Atua seia oo ina tatou matutua! E mafai ona iu lo tatou ola i so o se taimi lava. E tusa foi pe lē iu o tatou ola, o le auaunaga i le Atua e oo atu ina lē faigofie i le tulaga matua. O le iloaina o lenei mea moni, ua tusi ai Solomona e faapea: “O lenei, ia e manatua le na faia oe i ona po o lou taulealea, a o lei oo mai aso leaga, a o lei oo mai foi tausaga e te faapea ai, E leai soʻu fiafia i ai.”—Failauga 12:1.

O le faasolo atu i le olaga matua e iai ona faafitauli. I faaupuga faafaatusa, ua sosoo ai ona faamatalaina e Solomona āuga o tausaga matua. E tete lima ma ogalima, vaivai vae, ma oo ina tau leai ni nifo. Ua oo atu ina sinā le lauao ma toulu. E teiteigofie pe a moe lea e oo lava i le tagi a se manulele e ala ai. O lagona—vaai, faalogo, paʻi, sogisogi, ma le tofo—ua mou uma atu. O le vaivai o le tino ua taitaiina atu ai i le fefe i le paʻū ma o isi e “matatau” i aualatele. Ma faasolo atu ai lava ina oti le tagata.—Failauga 12:2-7.

O le olaga matua e patino lona leaga mo i latou o ē na lē taulau ona ‘manatua Lē na Faia i latou’ a o talavou. Ona o le faamaumau o lona olaga, o lea tagata ‘e leai sona fiafia’ i ona tausaga mulimuli. O se olaga e lē faaleatua e ono faaopoopo atu i faafitauli ma tiga o le olaga matua. (Faataoto 5:3-11) E faanoanoa ai, auā pe a vaai atu i le lumanai, o i latou na e latou te lē iloa so latou lumanai ae na o le tuugamau.

Olioli i le Olaga Matua

E lē o le uiga o lenei mea faapea o i latou e matutua ua lē mafai ona olioli i le olaga. I le Tusi Paia, o loo fesootai le olaga matua ma faamanuiaga a le Atua, “e faaopoopoina ai ia te oe o aso e tele, ma tausaga e te ola ai.” (Faataoto 3:1, 2) Sa taʻu atu e Ieova i lana uo o Aperaamo: “A o oe, . . . e tanumia oe pe a e matuā toeaina lava.” (Kenese 15:15) E ui i lagona lē lelei o tausaga matua, ae sa maua lava e Aperaamo le filemu ma le toafimalie i ona tausaga mulimuli, i le toe vaai atu i tua ma le loto malie i se olaga tuutoina atu ia Ieova. Na ia toe vaai atu foi i le lumanai ma le faatuatua i se “aai ua faavaeina,” le Malo lea o le Atua. (Eperu 11:10) O lea la, na maliu o ia ‘ua matuā toeaina ma faamalieina.’—Kenese 25:8.

O lea sa timai mai Solomona e faapea: “Afai e ola se tagata i tausaga e tele, [ia] . . . olioli i ia tausaga uma.” (Failauga 11:8) O lea pe tatou te talavou pe matutua, o le olioli moni e fesootai atu i la tatou faiā ma le Atua.

A o tuuese e le tama talavou meafaigaluega mulimuli lava a lona tamā, sa ia manatunatu e faatatau i nei mea. Na ia manatunatu i tagata uma na ia iloaina o ē na taumafai e matuā faaaogā lelei le olaga ae sa lē mafai ona latou maua le fiafia ona sa leai sa latou faiā ma Lē na Foafoaina i latou. Maeu la le foliga talafeagai tele ina ua uma ona tuuina atu o faalaeiauga ia olioli i le taimi o soifua ai se tasi, ona taaofai lea e Solomona mea i upu nei: “Seʻi tatou faalogo ia i le iuga o ia mea uma, Ia e mataʻu i le Atua, ma e anaana i ana poloaiga; auā o mea ia e tatau i tagata uma”!—Failauga 12:13.