Na Latou Faia le Finagalo o Ieova

Na Faaaluina e Iesu le Taimi Faatasi ma Tamaiti

NA LATALATA atu ina iu le tolu ma le ʻafa tausaga o le faiva a Iesu. Na lē o toe umi ae ulu atu loa o ia i Ierusalema ma puapuagatia ai i se maliu tiga. Sa malamalama lelei o ia i le mea sa tuu mai i luma, auā na ia taʻu atu i ona soo e faapea: “Ua tuuina atu le Atalii o le tagata i lima o tagata, latou te fasioti foi ia te ia.”—Mareko 9:31.

E mautinoa sa manao Iesu e faaaogā tatau uma aso, itula, ma minute taitasi sa totoe. Sa manaomia pea e ona soo le fesoasoani. Na silafia e Iesu e faapea sa manaomia pea e i latou se fautuaga mamafa e tusa ai ma le manaomia o le lotomaulalo ma le lamatiaga o loo iai pea o le faatausuai. (Mareko 9:35-37, 42-48) Sa latou manaomia foi ni taiala e faatatau i faaipoipoga, talagā faaipoipoga, ma le nofofua. (Mataio 19:3-12) I le iloaina e faapea na lei toe umi ae maliu, e mautinoa sa talanoa tuusao atu Iesu i ona soo faatasi ai ma se uiga o le faanatinati. Sa matuā tāua le taimi—o le mea moni lena na māfua ai ona sili atu ona mataina le mea lea na faia e Iesu na sosoo ai.

E Taliaina e Iesu Tamaiti

Ua faapea mai le tala a le Tusi Paia: “Ona latou au mai lea o tamaiti ia te ia, ina ia paʻi ane o ia ia te i latou.” Ina ua vaaia e soo lenei mea, na latou taʻuina atu loa lo latou lē malilie. Atonu sa latou manatu faapea sa matuā tāua Iesu pe ua pisi tele ma ua leai ai se taimi e uaʻi atu ai i tamaiti. Seʻi faaāta i le mafaufau le faateia o soo, ina ua toatamai Iesu ia i latou! Na ia fetalai atu ia te i latou: “Ina tuu mai ia o tamaiti e o mai ia te au, aua le vavao ia te i latou; auā e faapei o i latou nei o e o i le malo o le Atua.” Ona faaopoopo atu lea o Iesu: “E moni, ou te fai atu ia te outou, Ai se le talia le malo o le Atua faapei o se tamaitiiti, e le sao lava ia i ai.”—Mareko 10:13-15.

Na silafia e Iesu uiga lelei i tamaiti. E masani ona sogasoga e fia iloa ma tuuina atu lo latou faatuatuaga i isi. O le a latou taliaina o latou mātua e oo lava i lo latou puipuia o i latou pe a faifaia e isi tamaiti. O o latou uiga masani o le gauaigofie, faigofie ona aʻoaʻoina e aogā ona faaaoao i ai i latou uma o ē mananao e ulu atu i le Malo o le Atua. E pei ona fetalai Iesu: “E faapei o i latou nei o e o i le malo o le Atua.”—Faatusatusa i le Mataio 18:1-5.

Peitai sa lei faaaogaina e Iesu nei tamaiti e na ona fai ma faataitaiga. Ua faamanino mai e le tala faapea sa fiafia moni Iesu e miomio ma tamaiti. Ua lipotia mai e Mareko ia Iesu e faapea na “siitia lea e ia o i latou i ona lima, ua faaee foi ona aao i luga ia te i latou, ma faamanuia ia te i latou.” (Mareko 10:16) E na o le tala lava a Mareko o loo aofia ai faamatalaga mafana faapea na “siitia lea e ia [Iesu] o i latou i ona lima.”a O lea, sa faia ai e Iesu le mea e sili atu na i lo mea na faatalitali e tagata matutua, o ē na latou aumaia nei tamaiti ia Iesu ina ia tau lava ina “paʻi” atu i ai.

O le ā le uiga o le ‘faaee o aao’ o Iesu i luga o tamaiti? E leai se faauigaga iinei e faapea o se sauniga faalelotu, e pei o se papatisoga. Ae o nisi o mea na tutupu, o le faaeeina atu o lima sa uiga i le faaeeina atu o se tofiga i isi, a o isi taimi sa na ona faailogaina ai le tuuina atu o se faamanuiaga. (Kenese 48:14; Galuega 6:6) O lea e foliga mai sa na ona ofoina atu e Iesu se faamanuiaga i tamaiti.

I so o se tulaga lava, o loo faaaogā ai e Mareko se upu e malosi atu mo le “faamanuiaga” (ka·teu·lo·geʹo), e faauiga atu i le tele o le malosi. Ona o lea, ua manatu ai e faapea na faamanuiaina e Iesu tamaiti ma le naunautai, alofa mutimutivale, ma le mafana. E manino la, na lei manatu o ia i tamaiti o se avega mamafa ma faamaimau ai le taimi.

Lesona mo i Tatou

O uiga o Iesu sa feagai ai ma tamaiti faapea ma tagata matutua sa lē taufaafefe pe manatu faatauvaa. Na taʻua e le isi lomiga e faapea: “Ai e atagofie ma ata ma le olioli o ia.” E lētioa ona faigofie i so o se tagata ona faalatalata atu ia te ia. I le toe tepa i le faaaoaoga a Iesu, e mafai ona tatou fesili ifo ia i tatou lava, ‘Pe o faigofie ea ona faalatalata mai isi ia te au?’ ‘Po ua ou foliga atu ea ua pisi naua ua lē manatu atu ai i gaoioiga ma popolega o isi?’ O le atiina ae o se naunau moni i tagata o le a uunaia ai i tatou e faaavanoa atu i tatou lava, e pei ona sa faia e Iesu. O le a lagonaina e isi lo tatou naunau moni ma o le a mafuta mai ai i latou ia i tatou.—Faataoto 11:25.

E pei ona faaalia mai e le tala a Mareko, sa fiafia Iesu e faatasi ma tamaiti. E mautinoa, sa faaalu lona taimi e maimoaina ai i latou a o taaalo, lea na ia faasino atu i ai i se tasi o ana faataitaiga. (Mataio 11:16-19) Atonu o nisi o tamaiti ia sa faamanuia e Iesu Keriso sa laiti tele e talisapaia po o ai o ia ae o ā foi ana aʻoaʻoga. Peitai e lei faapogai ai o ia e lagona faapea ua maimau lona taimi. Sa ia faaalu le taimi faatasi ma tamaiti talu ai sa ia alofa ia i latou. Atonu o le toatele o tamaiti lea sa feagai ma Iesu a o faagasolo lana faiva na mulimuli ane uunaia e tali atu i lona alofa e ala i le avea ma ona soo.

Pe afai na faaaluina e Iesu le taimi e faatasi ai ma tamaiti i vaiaso tāua mulimuli o lona soifuaga, e mautinoa e mafai ona faaavanoa foi se taimi mai a tatou faasologa pisi mo i latou. E tatau ona tatou manatu mamafa faapitoa ia i latou e iai o latou manaoga faapitoa, e pei o tama ma teine ua mātua oti. O le mea moni, o le a agaigai i luma tamaiti uma pe afai e uaʻi atu i ai, ma o le finagalo o Ieova le tuuina atu ia te i latou o le alofa ma le fesoasoani uma tatou te mafaia.—Salamo 10:14.

[Faaopoopoga i lalo]