Ia Tausiusi i Ē Mātua Oti ma Fafine ua Oti a Latou Tane i o Latou Puapuaga
E lē faigatā ona iloa ua tatou ola i se lalolagi lē alolofa. I le faasino atu i ituaiga o tagata o loo ola i le vaitaimi ʻo aso e gata ai,’ na tusi ai le aposetolo o Paulo e faapea: “E oo mai ai aso faigata. Auā e avea tagata ma e alolofa i latou ia i latou, . . . o e le lotoaiga.” (2 Timoteo 3:1-3) Maʻeu le moni o na upu!
O LE siʻomaga tauamio i o tatou aso, ua māfua ai ona leai se tigā alofa i loto o le toʻatele. Ua agaʻi ina matuā faaitiitia le naunau alofa o tagata mo le lelei o isi, ma i nisi o tulaga e oo lava i tagata o o latou lava aiga.
O lenei mea ua matuā aafia leaga ai lava le toʻatele o ē ua oo ina lē tagolima ona o tulaga eseese. Ua matuā faatuputeleina le aofaʻiga o fafine ua oti a latou tane ma tamaiti ua mātua oti ona o taua, mala faalenatura, ma le tuua e tagata o o latou aiga ina ia saʻilia se sulufaʻiga. (Failauga 3:19) Ua taʻua i se lipoti mai le United Nations Children’s Fund e faapea: “E sili atu i le miliona [tamaiti] ua mātua oti po ua vavae ese foʻi mai o latou aiga ona o taua.” Ua e silafia foʻi e uiga i le matuā toʻatele o tinā ua nonofo taʻitoʻatasi, po ua tuulafoaʻia i latou e a latou tane, po ua tatalaina faaipoipoga o loo fesagaʻi ma le galuega fitā o le tauivi ina ia ola ma le tausia e i latou lava o o latou aiga. Ua sili atu ona leaga le tulaga ona o le mea moni e faapea, o loo feagai nisi atunuu ma le matuā paʻū maulalo o le tamaoaiga, ma ona o lea ua pogai ai ona ola ma le matuā matitiva le toʻatele o o latou tagatanuu.
I le vaai atu i lenei mea, po o iai ea se faamoemoe mo i latou o aafia i puapuaga? E mafai faapefea ona faaitiitia mafatiaga o fafine ua oti a latou tane ma tamaiti mātua oti? Po o le a mafai ea ona tafiesea lenei faafitauli?
Tausiga Alofa i Taimi o le Tusi Paia
O le tausia o manaʻoga faaletino ma faaleagaga o fafine ua oti a latou tane ma tamaiti mātua oti, sa avea pea ma vaega autū o le tapuaʻiga i le Atua. Pe a seleseleina a latou saito po o fua o laau ʻaina, e lē tatau ona aoina e tagata Isaraelu mea e totoe i le fanua, i le ō atu ma toe aumai mea na galo i a te i latou. O mea e totoe i le fanua sa tatau ona tuu “mo le tagata ese, ma le ua āumatuā, ma le fafine ua oti lana tane.” (Teuteronome 24:19-21) Ua faamaʻoti mai e le Tulafono a Mose e faapea: “Aua le agaleaga i se fafine ua oti lana tane, po o se mātuaoti.” (Esoto 22:22, 23) O fafine ua oti a latou tane ma ē mātua oti, ua taʻua i le Tusi Paia, ua talafeagai ona faaatagiaina ai tagata e matuā matitiva, talu ai pe a maliu le tane po o le tamā po o mātua uma, atonu o tagata o le aiga lea e soifua mai o le a tuua na o i latou ma ua lē tagolima foʻi. Na taʻua e le augatamā o Iopu e faapea: “Na ou laveaiina le ua puapuagaina, ina ua valaau mai o ia, ma le ua aumatuā, atoa ma le ua leai sona fesoasoani.”—Iopu 29:12.
I le amatamataga lava o le faapotopotoga Kerisiano, o le tausia o i latou na pagatia ma matuā manaʻomia moni lava le fesoasoani ona o le toesea o mātua po o le tane, sa o se vala iloga o le tapuaʻiga moni. Ona o le manatu mamafa mo le lelei o tagata faapena, na tusi ai le soo o Iakopo e faapea: “O lenei lava le toaga i lotu [“ituaiga o tapuaʻiga,” NW ] e lelei ma le faamaoni i luma o le Atua o le Tamā lea, ina ia tauasiasi [“tausiusi,” NW ] atu i e mātua oti ma fafine ua oti a latou tane i o latou tiga, ia leoleo foi o ia ia te ia, ina neʻi pisia mai o ia i le lalolagi.”—Iakopo 1:27, LF.
E lē gata i le taʻua o ē mātua oti ma fafine ua oti a latou tane, sa faaalia foʻi e Iakopo le manatu mamafa i isi o ē matitiva ma lē tagolima. (Iakopo 2:5, 6, 15, 16) Sa faaalia e le aposetolo o Paulo lea lava magafagafa. Ina ua tuuina atu i a te i laʻua ma Panapa lo la tofiga e talaʻi, sa aofia ai i faatonuga na la maua e faapea, ‘ia manatua o e matitiva.’ Sa mafai ai ona faapea mai Paulo ma le lotofuatiaifo lelei: “O le mea foi lea na ou naunau i ai e fai.” (Kalatia 2:9, 10) Ua faamauina i faamatalaga o gaoioiga a le faapotopotoga Kerisiano ina ua faatoʻā uma lava ona faavaeina e faapea: “Ua leai foi so latou e mativa. . . . ua tufatufa ia te i latou taitoatasi e faatatau i le mativa o le tagata.” (Galuega 4:34, 35) Ioe, o le faatulagaga na faavaeina i Isaraelu i le tausia o ē mātua oti, o fafine ua oti a latou tane, ma ē ua lē tagolima, sa faaauau pea lava i le faapotopotoga Kerisiano.
O le mea moni, o le fesoasoani na saunia, sa talafeagai ma ōgatusa ma tupe a faapotopotoga taʻitasi. Sa lē faamaʻimauina tupe, ma o i latou sa matitiva moni na avatu i ai le fesoasoani. Sa leai se Kerisiano e ao ona faaaogā ma le lē tatau lenei faatulagaga, ma sa leai ni avega mamafa lē talafeagai e ao ona tuuina atu i le faapotopotoga. Sa faamanino lelei mai lenei mea i le faatonuga a Paulo lena o loo faataatia mai i le 1 Timoteo 5:3-16. Ua tatou iloa mai iinā e faapea, afai na mafai e tauaiga o ē ua matitiva ona fesoasoani i a i latou, e tatau la ona latou amoina lena avega tauave. Sa iai tulaga patino e manaʻomia ona ausia e fafine ua oti a latou tane ina ia mafai ai ona maua le fesoasoani. O nei mea uma ua faaatagia mai ai le faatulagaga atamai ua faaaogāina e Ieova mo le tausiga o i latou ua matitiva. Peitaʻi, ua faaalia foʻi i lenei faatulagaga le tatau ona faatinoina le vaaiga paleni ina ia aua ai neʻi faaaogā sesē e se tasi agalelei ua faaalia.—2 Tesalonia 3:10-12.
Tausia o Ē Mātua Oti ma Fafine ua Oti a Latou Tane i Aso Nei
O mataupu silisili na mulimuli ai auauna a le Atua i aso ua mavae, o loo faatatauina pea i faapotopotoga a Molimau a Ieova pe a oo ina faaalia le manatu mamafa ma le tuuina atu o le fesoasoani i a i latou o mafatia i puapuaga. O le alofa faaleuso o se uiga iloga lea, e pei ona taʻua e Iesu e faapea: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Pe afai o loo mafatia nisi i le mativa po ua lavevea foʻi i se mala po o āuga o taua po o fetauaʻiga a atunuu lava latou, e naunau le ʻauuso atoa faava-o-atunuu e saʻili ni auala e fesoasoani ai i le itu faaleagaga ma le faaletino. Seʻi o tatou mātauina nisi o mea na tutupu i aso nei e faaalia ai mea ua faia e tusa ai ma lenei tulaga.
E lē tele ni mea o manatua e Pedro e uiga i lona tinā, o lē na maliu ina o na o le tasi ma le ʻafa tausaga lona matua. Ina ua lima tausaga o Pedro, na maliu ai foʻi lona tamā. O lea na tuua ai na o Pedro ma ona uso. Sa asiasi atu muamua Molimau a Ieova i lo latou tamā, o lea, na amata ai loa e Pedro ma ona uso matutua uma ona faia se suʻesuʻega faale-Tusi Paia i le aiga.
Ua faamatala mai e Pedro e faapea: “O le vaiaso lava na sosoo ai, na amata ai ona matou auai i sauniga. A o matou auaufaatasi ma uso, sa mafai ona logo i o matou tino le alofa na latou faaalia mai i a i matou. Sa avea le faapotopotoga ma malu mo aʻu ona sa faaalia mai e uso ma tuafāfine le alofa ma le tigā alofa i a te aʻu, sa pei lava i latou o ni oʻu mātua.” E manatua e Pedro le valaauliaina o ia e se tasi toeaina i lona fale. Iinā sa talatalanoa ai ma fiafia faatasi Pedro ma le aiga. “O mafaufauga nei e lē galo i a te aʻu,” o le tala lea a Pedro o lē sa amata ona talaʻi atu lona faatuatuaga ina ua 11 ona tausaga, ma na papatisoina ina ua 15. I le fesoasoani atu i ai o i latou i le faapotopotoga, na faapena foʻi ona agaʻigaʻi ai i luma ona uso matutua i le ala faaleagaga.
E faapena foʻi le tulaga o Tavita. Na tuulafoaʻiina o ia ma lona tuafafine masaga ina ua teteʻa o la mātua. Sa tausia i laʻua e mātua o lo la tinā ma le uso o lo la tinā. “Ina ua ma matutua ma iloa le tulaga na oo i a i maʻua, sa lofitūina i maʻua i faalogona o le lē saogalemu ma le faanoanoa. Sa ma manaʻomia se mea e mafai ona ma tua i ai. Na avea le uso o loʻu tinā ma Molimau a Ieova, ma ona o lenei mea, na aʻoaʻoina ai i maʻua i upu moni o le Tusi Paia. Sa faasalafa mai e uso i a i maʻua lo latou alofa ma uiga faaleuō. Sa latou matuā fiafia i a i maʻua ma faalaeiauina i maʻua ina ia ausia o ma sini ma faaauau pea ona auauna i a Ieova. Ina ua tusa ma le sefulu oʻu tausaga, e ave ai aʻu e se auauna o le faiva e ma te ō i le faiva i le fanua. Sa totogia e se tasi uso tupe sa ou manaʻomia pe a ou auai i tauaofiaga. Sa fesoasoani mai foʻi se tasi i a te aʻu ina ia mafai ona ou faia ni foaʻi tauofo i le Maota o le Malo.”
Na papatiso Tavita ina ua 17 ona tausaga, ma mulimuli ane sa ia auauna ai i le ofisa o le lālā o Molimau a Ieova i Mekisikō. E oo lava i le taimi nei, ua ia faailoa mai e faapea: “E iai nisi o toeaina o ē e saosaolaumea i le aʻoaʻoina o aʻu ma saunia fautuaga aogā mo aʻu. O le auala lenei ua ou manumalo ai i le faalogona o le lē saogalemu ma le tuua toʻatasi.”
Ua faamatala mai e Apelu o se toeaina i se faapotopotoga i Mekisikō e i ai nisi o fafine ua oti a latou tane o ē e manaʻomia se fesoasoani e faapea: “Ua ou mautinoa o le manaʻoga e sili ona malosi o loo iai i fafine ua oti a latou tane, o le lagolagosua tau i faalogona ootia. I nisi taimi e oo ai i a i latou ni mafatiaga; ma lagona ai le tuua toʻatasi. O lea la, e tāua tele le avatu o le lagolagosua, ma faalogologo atu i a i latou. E matou [toeaina o le faapotopotoga] te asiasi atu e lē aunoa i a i latou. O se mea lelei le faaalu o le taimi e uaʻi atu ai i o latou faafitauli. E fesoasoani lenei mea e latou te lagonaina ai ua faamāfanafanaina i latou faaleagaga.” Ae peitaʻi, e manaʻomia foʻi le fesoasoani tautupe i nisi taimi. Na faamatala mai e Apelu i se taimi ua mavae e faapea: “O lea ua matou fausia nei se fale mo se tuafafine ua oti lana tane. E matou te faaaluina nisi o Aso Toonaʻi ma taimi o aoauli i le vaiaso e galulue ai i lona fale.”
E uiga i lona lava poto masani i le saunia o fesoasoani mo tamaiti mātua oti ma fafine ua oti a latou tane, ua faapea mai ai se toeaina o se tasi faapotopotoga: “Ou te talitonu e matuā sili atu ona manaʻomia e tamaiti mātua oti le alofa faa-Kerisiano na i lo o fafine ua oti a latou tane. Ua ou mātauina e sili atu ona foliga mai o loo i a i latou le lagona e faapea ua tuulafoaʻiina i latou na i lo o tamaiti ma talavou o loo iai uma o latou mātua. E latou te manaʻomia le tele o faailoaga o le alofa faaleuso. E lelei pe a vaavaai mo i latou pe a uma sauniga ina ia iloa ai po o ā mai i latou. E iai se uso ua uma ona faaipoipo na avea o ia ma sē mātua oti ina o laʻitiiti lava. Ou te faafeiloaʻia pea ma le māfana o ia i sauniga, ma e vaai mai loa i a te aʻu oso mai fusi aʻu. Ua faamalosia ai i lenei feiloaʻiga le alofa moni faaleuso.”
O Ieova na te “Laveai . . . Lē Mativa”
O le faatuatua i a Ieova o le faavae lena i le feagai ai ma tulaga o fafine ua oti a latou tane ma ē ua mātua oti. Ua faapea mai e uiga i a te ia: “O Ieova na te tausia tagata ese; e fai ma lagolago mo le ua aumatuā ma le fafine ua oti lana tane.” (Salamo 146:9) O le vaifofō atoatoa o faafitauli faapenei, e na o le Malo o le Atua i aao o Iesu Keriso. I le faamatalaina faavaloaga o lena pulega e ala i le Mesia, na tusi ai le faisalamo e faapea: “E laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani. E alofa atu ia i le ua vaivai ma le ua mativa; e faaola lava e ia e ua matitiva.”—Salamo 72:12, 13
A o lalata mai le iʻuga o lenei faiga o mea, e mautinoa lava le faateteleina o omiga o loo fesagaʻi ma Kerisiano uma. (Mataio 24:9-13) Ua iai i aso uma se manaʻoga mo Kerisiano ina ia faaalia le manatu mamafa o le tasi i le isi ma ia “maua e outou o le alofa naunau o le tasi i le tasi.” (1 Peteru 4:7-10) E manaʻomia e tane Kerisiano, aemaise lava toeaina ona manatu mamafa ma ia tigā alofa i a i latou ua mātua oti. E mafai foʻi e fafine taʻumatuaina i le faapotopotoga ona lagolagosua i fafine ua oti a latou tane ma ia avea i latou ma puna o faamāfanafanaga. (Tito 2:3-5) O le mea moni, e mafai ona saosaolaumea tagata uma e ala i le faaalia o le manatu mamafa i isi o ē o loo puapuagatia.
E lē ‘punitia [e Kerisiano moni] lo latou loto alofa’ pe a latou ‘vaai atu i lo latou uso ua mativa.’ E latou te matuā mataalia e utagia le apoapoaʻiga a le aposetolo o Ioane e faapea: “Laʻu fanau e, aua neʻi tatou alolofa tau o le upu ma le gutu, a o le amio ma le faamaoni.” (1 Ioane 3:17, 18) O lea seʻi o tatou “tausiusi i e mātua oti ma fafine ua oti a latou tane i o latou tiga.”—Iakopo 1: 27.
[Faamatalaga faaopoopo i le itulau 11]
“Aua neʻi tatou alolofa tau o le upu ma le gutu, a o le amio ma le faamaoni.”—1 Ioane 3:18
[Ata i le itulau 10]
O Kerisiano moni e tausia tamaiti ua mātua oti ma fafine ua oti a latou tane i le tulaga faaletino, faaleagaga, ma tau i faalogona