Ia Tumau Atoatoa ma le Mautinoa

Le New World Translation Ua Talisapaia e le Faitau Miliona i le Lalolagi Aoao

E 12 tausaga, 3 masina, ma aso e 11 na faaaluina i se galuega sili ona fitā. Ae peitaʻi, iā Mati 13, 1960, na faamāeʻa ai le vaega faaiʻu o le tusi mo se faaliliuga fou o le Tusi Paia. Na faaigoaina o le New World Translation of the Holy Scriptures.

E tasi le tausaga mulimuli ane, na lomia ai e Molimau a Ieova lenei faaliliuga i se tusi atoa e tasi. Sa lolomia lenā lomiga i le 1961 i ni ona kopi e tasi le miliona. I aso nei, ua silia ma le selau miliona kopi ua lolomia, ma avea ai le New World Translation o se tasi o Tusi Paia e sili ona lautele lona tufatufaina atu. Ae o le ā na māfua ai ona uunaʻia Molimau e sauniunia lenei faaliliuga?

Aiseā ua Manaʻomia ai se Faaliliuga Fou o le Tusi Paia?

Ina ia mafai ona malamalama ma folafola atu le feʻau o le Tusi Paia, ua faaaogā ai e Molimau a Ieova i le gasologa mai o tausaga le tele o faaliliuga eseese faa-Peretania o le Tusi Paia. E ui ina iai ni itu e aogā ai nei faaliliuga, ae ua masani lava ona lapelapea i uputuu faalotu ma talitonuga a Kerisinetoma. (Mataio 15:6) O lea na iloa ai e Molimau a Ieova le manaʻomia ona iai o se faaliliuga o le Tusi Paia, o loo faamatalaina ai ma le tonu mea sa iai i uluaʻi tusitusiga faagaeeina.

O le uluaʻi laasaga i le faataunuuina o lenei manaʻoga na faia lea iā Oketopa i le 1946, ina ua faatulaʻi mai e Nathan H. Knorr, o se sui o le Vaega Pule o Molimau a Ieova, se manatu mo le faia o se faaliliuga fou o le Tusi Paia. Iā Tesema 2, 1947, na faatulaga ai le Komiti o le Faaliliuga o le Tusi Paia a le Lalolagi fou, ina ia latou sauniunia se faaliliuga o le a pipii atu i uluaʻi tusitusiga, o le a tuufaatasia uma ai manatu mai faamaumauga fou uma na aoaoina e tagata atamamai mai manusikulipi o le Tusi Paia ia e leʻi leva talu ona mauaina, ma o le a faaaogāina ai le gagana o loo taatele ona malamalama i ai tagata faitau i aso nei.

Ina ua lomia le vaega muamua—le New World Translation of the Christian Greek Scriptures—i le 1950, na manino mai ai le ausia e le ʻaufaaliliu o o latou sini. O mau o le Tusi Paia sa leʻi malamalama lelei i ai i le taimi muamua, ua matuā manino mai lava. Mo se faataʻitaʻiga, seʻi manatu i le mau lavelave i le Mataio 5:3: “Amuia ē matitiva i le agaga.” (King James Version) Sa faaliliuina faapea: “Amuia i latou e manatu mamafa i o latou manaʻoga faaleagaga.” O le timaʻiga a le aposetolo o Paulo faapea “e leai se mea e faaeteete ai fua” (King James Version) na faaliliuina: “Aua neʻi popole i se mea.” (Filipi 4:6) Ma le faasino atu o le aposetolo o Ioane i “le faanaunauga malosi o le tino” (Douay Version) ua faitauina, o “le tuʻinanau o le tino.” (1 Ioane 2:16) E manino la, ua tatalaina mai e le New World Translation se malamalamaga fou.

Na matuā maofa tagata eseese e popoto faapitoa. Mo se faaaʻoaʻoga, na taʻua e le tagata Peretania, e atamai i mataupu faale-Tusi Paia, o Alexander Thomson e faapea, e matilatila le New World Translation ona o le saʻo aʻiaʻi i lona faaaogāina o le gagana faataimi nei (present tense) i le faa-Eleni. Seʻi faataʻitaʻi: Ua faitauina le Efeso 5:25 “O outou tane, ia outou alolofa atu [“pea,” NW] i a outou lava avā” na i lo le tau ina faapea mai “O outou tane, ia alolofa i a outou avā.” (King James Version) Na taʻua e Thomson e tusa ai o le New World Translation e faapea: “E leai lava se isi faaliliuga e foliga o loo sili atu ona faaalialia mai ai lenei vala sili ona mataʻina i se tulaga saʻo atoatoa ma le faia pea.”

O le isi vala matilatila o le New World Translation o lona faaaogāina lea o le suafa totino o le Atua, o Ieova, i vaega uma e lua o le Tusi Paia, o Tusitusiga Eperu ma Tusitusiga Eleni. Talu ai e latalata i le 7,000 taimi o loo aliali mai ai le suafa o le Atua i le na o le vaega ua taʻua e isi o le Feagaiga Tuai, ua manino mai la o loo finagalo Lē na Foafoaina i tatou ina ia faaaogā e ona tagata tapuaʻi lona suafa ma ia latou manatu iā te ia o se peresona. (Esoto 34:6, 7) Ua mafai e le faitau miliona o tagata ona latou faia faapea ona o le New World Translation.

Ua Faaliliuina le New World Translation i le Tele o Gagana

Talu mai lava ona iai le New World Translation i le gagana Peretania, ua moomoo Molimau a Ieova i le lalolagi aoao ina ia latou mauaina lenei faaliliuga i gagana a o latou lava atunuu—ma ua iai ni māfuaaga lelei. I nisi atunuu, sa faigatā ona maua ni faaliliuga o le Tusi Paia i a latou lava gagana talu ai sa lē fiafia i latou na galulue i sosaiete na tufatufaina le Tusi Paia (Bible Societies), e vaai atu ua faaaogāina e Molimau a Ieova a latou Tusi Paia. E lē gata i lea, o na faaliliuga o le Tusi Paia i a latou lava gagana, e masani ona punitia ai aʻoaʻoga e matuā tāua. O se faaaʻoaʻoga lelei lava, o le faaliliuga a se gagana e tautatala ai tagata i le itu i saute o Europa, lea o loo nanā ai se faasinoga tāua lava i le suafa o le Atua, e ala i le suia o fetalaiga a Iesu “Ia paia lou suafa” i upu “Tau ina ia faamamaluina oe e tagata.”—Mataio 6:9.

I le 1961, na amata ai e le ʻaufaaliliu ona latou faaliliuina tusitusiga faa-Peretania o le New World Translation i isi gagana. I le na o le lua tausaga mulimuli ane, ae māeʻa loa ona faaliliuina le New World Translation of the Christian Greek Scriptures i isi gagana e ono. E oo ane i lenā taimi, e tolu vaefā le aofaʻiga o Molimau i le lalolagi aoao ua mafai ona latou faitauina lenei Tusi Paia i a latou lava gagana. Peitaʻi, na tele pea isi galuega sa tatau ona fai pe afai e mananaʻo Molimau a Ieova ina ia oo atu se kopi o lenei Tusi Paia i le faitau miliona o isi tagata.

I le 1989 na amata ai ona vavala mai le faataunuuina o lenā sini ina ua faatulaga Matagaluega o Faaliliuga i le ofisaulu i le lalolagi atoa a Molimau a Ieova. Na fafau aʻe e lenā matagaluega se metotia tau faaliliuga lea ua tuufaatasi ai saʻiliʻiliga i upu faale-Tusi Paia ma le tomai tau komepiuta. O le faaaogāina o lenei faiga na faafaigofie ai ona faaliliuina Tusitusiga Kerisiano Eleni i isi gagana i totonu o le tausaga e tasi, ae o Tusitusiga Eperu na faaliliuina i tausaga e lua—e matuā itiiti lava lenā taimi na i lo le taimi e masani ona manaʻomia mo se galuega faaliliu o le Tusi Paia. Talu mai ona fafau aʻe lenei metotia, ua mafai foʻi ona faaliliuina ai isi lomiga e 29 o le New World Translation mai le gagana Peretania ma maua ai i gagana o loo faaaogāina e le silia ma le lua piliona o tagata. I le taimi nei o loo faagasolo ai le galuega i isi gagana e 12. E oo mai i le asō, ua 41 isi gagana ua faaliliuina i ai le New World Translation faa-Peretania, i le Tusi Paia atoa pe i se vaega.

Ua silia ma le 50 tausaga ua mavae talu ona tatalaina mai le uluaʻi vaega o le New World Translation iā Aokuso 3, 1950, i le fonotaga a Molimau a Ieova sa usuia i le aai o Niu Ioka, lea na faamatuaina, o Faatelega Faatiokarate. I lenā fonotaga, na augani mai ai Nathan H. Knorr i le ʻauusufono: “Ia ave lenei faaliliuga. Ia faitau atoa i ai, o se mea o le a outou fiafia e fai. Ia suʻesuʻe i ai, auā o le a fesoasoani iā te outou e faaleleia ai lo outou malamalamaga i le Afioga a le Atua. Ia ofo atu i isi.” E matou te faalaeiauina oe ina ia e faitauina le Tusi Paia i aso taʻitasi, auā e mafai e le feʻau o loo iai, ona fesoasoani iā te oe ina ia e ‘tumau atoatoa, ma le mautinoa i le finagalo uma lava o le Atua.’—Kolose 4:12.

[Siata/Ata i le itulau 8, 9]

(Tagaʻi i le lomiga mo le ata atoa)

“Lomiga ua Iai o le New World Translation”

Na muaʻi lomia le New World Translation i le gagana Peretania, ma ua maua nei le lomiga atoa pe i ni vaega i gagana e 41

Tusitusiga Kerisiano Eleni Tusi Paia Atoa

1950 1

1960-1969 6 5

1970-1979 4 2

1980-1989 2 2

1990 e oo mai i le asō 29 19