Pe e Saʻo Aʻiaʻi le Faaliliuga a le Lalolagi Fou?

Na tatalaina le vaega muamua o le Faaliliuga a le Lalolagi Fou i le 1950. Talu mai lenā taimi, na fesiligia e isi le saʻo aʻiaʻi o le Faaliliuga a le Lalolagi Fou,a ona e iai vaega e eseese ai mai i isi faaliliuga o le Tusi Paia. O nisi nei o māfuaaga e eseese ai.

• Maufaatuatuaina. O loo faavae le Faaliliuga a le Lalolagi Fou i suʻesuʻega sili ona lata mai a faitofā ma manusikulipi anamua e pito sili ona maufaatuatuaina. I se faaeseesega, o le faaliliuga 1611 o le King James Version na faavae mai i manusikulipi e lē saʻo aʻiaʻi ma e tuai atu ai manusikulipi o loo faavae ai le Faaliliuga a le Lalolagi Fou.

• Faamaoni. O loo taumafai le Faaliliuga a le Lalolagi Fou e faailoa mai ma le faamaoni le uluaʻi feʻau lea na faagaeeina e le Atua. (2 Timoteo 3:​16) O le tele o faaliliuga e sili atu ona latou pipii i tū ma aga a tagata nai lo o le faamaoni i le feʻau a le Atua. O se faataʻitaʻiga, ua latou aveesea le suafa o le Atua o Ieova, ae sui i faalupega e pei o le Alii po o le Atua.

• Faaliliu le upu i le upu. E ese mai i isi faaliliuga, o le Faaliliuga a le Lalolagi Fou o loo faaaogā le auala o le faaliliu le upu i le upu, pe afai e lē aveesea ai le manatu autū o le uluaʻi tusitusiga. O isi faaliliuga atonu e latou te faaopoopo i ai manatu o tagata pe aveesea faamatalaga tāua.

Le eseesega o le Faaliliuga a le Lalolagi Fou ma isi faaliliuga

Ua aveesea isi tusi. O loo faaopoopo i Tusi Paia a le lotu Katoliko ma le lotu Orthodox i Sasaʻe, ni tusi ua faaigoaina e isi o le Apokerifa (Apocrypha). Peitaʻi, e leʻi aofia nei tusi i tusi na faamaonia e tagata Iutaia, ae o loo taʻua i le Tusi Paia o tagata Iutaia “na tuuina atu iā i latou afioga paia a le Atua.” (Roma 3:​1, 2) O le mea lea, e lē o faaaofia ai i le Faaliliuga a le Lalolagi Fou ma isi faaliliuga i aso nei tusi o le Apokerifa.

Ua aveesea isi mau. Ua faaopoopo e nisi faaliliuga ni mau ma fuaitau ia e lē o maua i manusikulipi o le Tusi Paia e pito sili ona tuai. Peitaʻi, e lē o aofia na manatu faaopoopo i le Faaliliuga a le Lalolagi Fou. O le tele o faaliliuga i aso nei, ua aveesea na manatu faaopoopo pe taʻua foʻi o ni manatu e lē saʻo aʻiaʻi mea e faavae mai ai.b

Le eseese o le auala e faaupu ai. I nisi taimi, o le faaliliu mai i le upu i le upu e iʻu atu i le lē manino o manatu pe taufaasesē foʻi. Mo se faataʻitaʻiga, e masani ona faaliliuina le fetalaiga a Iesu i le Mataio 5:3 e faapea: “Amuia ē matitiva i le agaga.” (Tusi Paia Samoa—Lomiga 1969; English Standard Version; New International Version) E toʻatele e leʻi malamalama i le uiga o le faaupuga “matitiva i le agaga,” ae o isi e manatu na faamatilatila e Iesu le tāua o le lotomaulalo po o le mativa. Peitaʻi o le manatu na aʻoaʻoina e Iesu, o le fiafia moni e maua mai i le amanaʻia e tatou te manaʻomia le taʻitaʻiga a le Atua. E maua lelei lenei manatu i le Faaliliuga a le Lalolagi Fou lea ua faaliliuina ai e faapea, “o ē e naunau i mea faaleagaga.”​—Mataio 5:3.c

Manatu lelei e faatatau i le Faaliliuga a le Lalolagi Fou mai i faitofā e lē o ni Molimau

• I se tusi na tusia iā Tesema 8, 1950, na taʻua ai e Edgar J. Goodspeed o se tagata faaliliu o le Tusi Paia ma o se faitofā iloga, e faatatau i le faaliliuga O le Tusi Paia o le Lalolagi Fou o Tusitusiga Eleni: “Ou te fiafia i le tou galuega o loo faia i le lalolagi aoao, aemaise i le tou faaliliuga lelei ma saʻo aʻiaʻi. E mafai ona ou faamaonia atu e tele mea e mafai ona aʻoaʻoina mai ai.”

  

• Na taʻua e le polofesa o Allen Wikgren mai i le Iunivesite o Chicago, o le Faaliliuga a le Lalolagi Fou o se faaaʻoaʻoga o se faaliliuga o loo faaaogā ai le gagana o aso uma, ma nai lo o le kopi mai i isi faaliliuga ae e tutasi ma e tatau ona faitauina e tagata.​—The Interpreter’s Bible, Tusi I, itulau 99.

• Na faapea mai se faitofā mai i Peretania e igoa iā Alexander Thomson, e faatatau i le faaliliuga O le Tusi Paia o le Lalolagi Fou o Tusitusiga Eleni: “E atagia mai i le faaliliuga le tomai o faitofā na galulue ai, ma a latou taumafaiga ina ia maua le uiga moni o tusitusiga Eleni, i le tele e mafai ai i le gagana Peretania.”​—The Differentiator, Aperila 1952, itulau 52.

• E ui na taʻua e le tusitala o Charles Francis Potter e iai ni vaega o le faaliliuga e lē masani ai, ae na ia faapea mai: “Ua faia e tagata faaliliu le mea sili i le faaliliuina o tusitusiga Eleni ma le faa-Eperu, ma faaalia ai lo latou tomai e faia filifiliga lelei.”​—The Faiths Men Live By, itulau 300.

• E ui na manatu Robert M. McCoy e iai mea e ese ai le Faaliliuga a le Lalolagi Fou ma mea e mataʻina ai, ae na ia faapea mai: “O le auala o loo faaliliuina ai le Feagaiga Fou, o le faamaoniga lea o le iai i Molimau a Ieova o ni faitofā agavaa, e mafai ona taulimaina ma le poto le tele o faafitauli e tulaʻi mai i le faaliliuina o le Tusi Paia.”​—Andover Newton Quarterly, Ianuari 1963, itulau 31.

• E ui e lē ioe le polofesa o S. MacLean Gilmour i nisi o faaliliuga o le Faaliliuga a le Lalolagi Fou, ae na ia amanaʻia o tagata na faaliliuina “e iai se tomai e lē taatele e malamalama ai i le gagana Eleni.”​—Andover Newton Quarterly, Setema 1966, itulau 26.

• Na taʻua e le polofesa o Thomas N. Winter e faatatau i lona autaluina o le Faaliliuga a le Lalolagi Fou, lea na faia aʻe ai se vaega o le Kingdom Interlinear Translation of the Greek Scriptures: “Na matuā saʻo aʻiaʻi le faaliliuga a le komiti faaliliu ma e sili ona lata mai.”​—The Classical Journal, Aperila-Me 1974, itulau 376.

• I le 1989, na faapea mai le polofesa o Benjamin Kedar-Kopfstein, o se faitofā i le gagana Eperu i Isaraelu: “Pe a ou suʻesuʻeina gagana e fesootaʻi atu i le Tusi Paia Eperu ma isi faaliliuga, e masani ona ou faaaogāina le faaliliuga faa-Peretania o le Faaliliuga a le Lalolagi Fou. O le faia faapea, ua matuā ou mautinoa ai o loo atagia mai i lenei faaliliuga le faanaunauga malosi o ē na faaliliuina, e malamalama lelei ai i uluaʻi tusitusiga.”

• Ina ua suʻesuʻeina e Jason David BeDuhn o se polofesa i suʻesuʻega faalotu, ni faaliliuga taatele faa-Peretania se iva, na ia faapea mai: “E saʻo aʻiaʻi le auala o loo faaliliuina ai le Faaliliuga a le Lalolagi Fou nai lo o isi faaliliuga.” E ui ua manatu tagata ma isi faitofā o le Tusi Paia, o le ese o le auala o loo faaliliuina ai le Faaliliuga a le Lalolagi Fou, e māfua mai i faiga faaituʻau faalelotu a tagata faaliliu, ae na faapea mai BeDuhn: “O le tele o eseesega e māfua mai i le saʻo aʻiaʻi o le faaliliuina o manatu o tusitala o le Feagaiga Fou i le Faaliliuga a le Lalolagi Fou.”​—Truth in Translation, itulau 163, 165.