Le Auala o le a Aveesea ai Tulaga Lē Atoatoa o le Malosi o le Tino

SEʻI mafaufau i le faapupulaina o mata o ē tauaso, le lagonaina o so o se leo e taliga o ē logonoa, le pepese fiafia o ē gugu, o vae o pipili ua malolosi ma mafai ona savavali! E tatou te lē o talanoa i ni togafitiga fou faafomaʻi e sili atu ona lelei, ae e faatatau i āuga o le liuliualo mai o le Atua lava ia mo le fanau a tagata. Ua valoia mai e le Tusi Paia e faapea: “Ona faapupulaina ai lea mata o e tauaso, e faalogoa foi taliga o e tutuli; ona osooso ai lea o le pipili e pei o le aila, e pese foi le laulaufaiva o le gūgū.” (Isaia 35:5, 6) Ae e mafai faapefea ona tatou mautinoa o le a faataunuuina moni lava lenei valoaga e maofa ai?

Muamua, a o iai Iesu Keriso i le lalolagi, na ia faamālōlōina moni lava tagata na aafia i so o se ituaiga o faamaʻi ma tulaga lē atoatoa o le malosi o le tino. E lē gata i lenā, o le tele o ana vavega na molimauina e le toʻatele—e oo lava foʻi i ona fili. O le mea moni, i le na o se faaaʻoaʻoga se tasi, na suʻesuʻeina ai ma le māeʻaeʻa e tagata fouvale loto masalosalo se faamālōlōga ina ia taʻuleagaina ai Iesu. Ae na sili ona faalumaina ai, ona o mea uma na latou faia sa na ona faamaoniaina ai o lana vavega. (Ioane 9:1, 5-34) Ae ina ua uma ona faia e Iesu se isi vavega moni lava, na latou faapea mai ma le lē malilie: “Se a sa tatou mea e fai? Auā ua faia faailoga e tele e lea tagata.” (Ioane 11:47) Peitaʻi, sa talilelei ane i ai tagata lautele, auā o le toʻatele lava sa amata ona faatuatua iā Iesu.—Ioane 2:23; 10:41, 42; 12:9-11.

O Vavega a Iesu—Se Ata o le Faamālōlōga i le Lalolagi Atoa

Na iai isi mea e sili atu na faia e vavega na i lo le faamaonia ai o Iesu o le Mesia ma le Alo o le Atua. Na saunia ai e na vavega se faavae mo le faatuatua atu i folafolaga a le Tusi Paia ia o le a faamālōlōina tagata usiusitai i le lumanaʻi. O nei folafolaga e aofia ai le valoaga i le Isaia mataupu 35, lea e pei ona taʻua i le uluaʻi palakalafa. Ua taʻua e le Isaia 33:24 e tusa ai o le tulaga o le a iai i le lumanaʻi faatatau i le soifua mālōlōina o tagata e matataʻu i le Atua: “E le fai mai foi se tasi ua mau ai, Ou te maʻi.” I se tulaga talitutusa, ua folafola mai ai e le Faaaliga 21:4: “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua [tofotofoga ma paupuagā i aso nei].”

O loo tatalo tagata e lē aunoa mo le faataunuuina o nei valoaga pe a latou taulotoina le tatalo faaaʻoaʻo a Iesu, lea e faapea sona vaega: “Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:10) Ioe, o le finagalo o le Atua e aofia ai le lalolagi ma tagata. O faamaʻi ma tulaga lē atoatoa o le malosi o le tino, e ui o loo faatagaina mo se māfuaaga, ae e lē o toe umi ae aveesea; o le a lē toe faaleagaina ‘le mea e tu ai aao’ o le Atua e faavavau. —Isaia 66:1.a

Na Faamālōlōina e Aunoa ma se Tigā po o se Totogi

E tusa lava po o ā maʻi na mafatia ai tagata, na faamālōlōina i latou e Iesu e aunoa ma so latou tigāina, sa faavave ona faia ma e leai foʻi se totogi. Ma le mautinoa lava la, na salalau atu lenei mea e pei o le sosolo a se afi, ma e leʻi umi ae “o mai ai lea ia te ia o le motu o tagata e toatele, ua ia te i latou o e pipili, o e mumutu, o e tauaso, o e gūgū, atoa ma nisi e toatele, ua latou tuu atu ia i latou i vae o Iesu; ona faamalolo ai lea e ia o i latou.” Na faapefea ona tali ane i ai tagata? Ua faapea mai atili le molimau a Mataio: “Ona taufaiofo ai lea o le motu o tagata ina ua latou iloa atu o e sa gūgū ua tautala, o e sa mumutu ua atoatoa, o e sa pipili ua savavali, o e sa tauaso foi ua vaai; ona latou vivii atu ai lea i le Atua o Isaraelu.”—Mataio 15:30, 31, LF.

Ia mātau e faapea o i latou na faamālōlōina e Iesu sa leʻi faapea na filifilia faapitoa mai le motu o tagata—o se togafiti lea ua faia e tagata taufaasesē. Na i lo lea, o le tele o tauaiga ma uō a tagata mamaʻi “ua latou tuu atu ia i latou i vae o Iesu; ona faamalolo ai lea e ia o i latou.” Seʻi o tatou talanoaina nei nisi o faataʻitaʻiga o faamālōlōga na faia e Iesu.

Tauaso: A o iai i Ierusalema, na faapupulaina ai e Iesu se tamāloa o lē na “tauaso talu ina fanau mai.” Na lauiloa lenei tagata i le aai o se tagata ʻaisi ua tauaso. O lea e mafai ai ona e mafaufau i le fiafia ma le pisapisaō ina ua vaai atu tagata ua fesavaliaʻi ma ua pupula! Peitaʻi, e lē o tagata uma na fiafia. I le tigā ona o le faaalialia e Iesu i le taimi ua mavae o a latou amioleaga, na matuā saʻilia ai e nisi tagata o le lotu Iutaia lauiloa e taʻua o Faresaio se faamaoniga faapea na faia e Iesu se togafiti. (Ioane 8:13, 42-44; 9:1, 6-31) Ona latou tuʻifesili ai lea o le tamāloa na faamālōlō, ona sosoo ai lea ma ona matua, ma faapea ona toe oo atu ai i le tamāloa. Ae o saʻiliʻiliga a Faresaio ua na ona faamaonia ai o le vavega a Iesu, ma na avea lea ma mea na latou feita ai. I le fiu ona o le lotomaaa o nei tagata lotu faagutugutulua, na faapea mai ai le tamāloa na faamālōlō: “E lei faalogo lava talu mai le vavau, ona faapupulaina e se tasi o mata o le na fanau mai o tauaso. Ana le mai le Atua lena tagata, na te le mafaia se mea e tasi ona fai.” (Ioane 9:32, 33) Ona o lenā faailoaga moni ma le atamai o le faatuatua, na “tulia lea o ia i tua” e le ʻau Faresaio, o lona uiga e foliga mai na latou tuliesea le tamāloa sa tauaso muamua mai le sunako.—Ioane 9:22, 34.

Logonoa: A o iai Iesu i Tekapoli, o se itumalo e i le itu i sasaʻe o le Vaitafe o Ioritana, “ona latou au mai lea ia te ia le tagata tutuli, ua leo oolo.” (Mareko 7:31, 32) E lē gata na faamālōlōina e Iesu lenei tagata, ae na ia faaalia ai foʻi se malamalamaga loloto i faalogona o le tagata tutuli, o lē atonu na matamuli ona o le motu o tagata. Ua faapea mai le Tusi Paia na ‘taʻitaʻi ese lea e Iesu ia te ia i le motu o tagata,’ ma faamālōlōina o ia. Ona toe ‘⁠taufai ofo tele ai foʻi lea’ o ē na vaaitino i ai ma faapea mai: “Ua mālie lava ana mea uma ua fai; ua ia faalogoa e sa tutuli, atoa ma e sa gūgū ua ia faagaganaina.”—Mareko 7:33-37.

Pē o le Tino: A o iai Iesu i Kapanaumi, na aumaia ai e tagata iā te ia se tagata maʻi supa o loo i se moega. (Mataio 9:2) O loo faamatalaina mai i le fuaiupu e 6 e oo i le 8 le mea na tupu. “Ona fetalai atu ai lea o [Iesu] i le supa—‘⁠Ina tulai ia, ina ave lou moega, ma alu i lou fale.’ Ona tulai ai lea o ia, ua alu i lona fale. Ua iloa e le motu o tagata, ona taufaiofo ai lea; ua latou vivii atu i le Atua le ua foaiina mai le pule faapena i tagata.” Sa faia foʻi lenei vavega a o iai soo faapea foʻi ma fili o Iesu. Mātau foʻi, sa leʻi faasesēina soo i uiga ʻinoʻino po ona o tuuaʻiga lē tonu, ae na “vivii atu i le Atua” i mea na latou molimauina.

Faamaʻi: “Ua sau le lepela ia [Iesu], ua aioi ia te ia, ma tootuli ia te ia, ma ua faapea mai, ‘Afai ua e finagalo i ai, e te mafaia ona faamamā ia te au.’ Ona mutimuti vale lea o le alofa o Iesu ia te ia, ua aapa atu lona aao, ua paʻi atu ia te ia, ma fetalai atu ia te ia, ‘Ou te loto i ai, ina mamā ia oe.’ Ua fetalai atu o ia, ona teʻa loa lea o le maʻi lepela ia te ia.” (Mareko 1:40-42) Mātau sa leʻi faamālōlōina e Iesu lenei tagata e aunoa ma se lotomalie, ae sa faia ona o le alofa faamaoni. Seʻi faapea la o oe o se lepela. O le ā sou faalogona pe afai ua vave lava ona faamālōlōina oe e aunoa ma se tigā mai se maʻi e sili ona leaga, lea ua faasolo ai ina faaleaga lou tino ma faaesea ai oe mai tagata? E uiga i se tasi lepela na ia faamālōlōina, e mautinoa e mafai ona e malamalama ai i le māfuaaga na “faapaū fao ia i ona vae, ua faafetai mai ia te ia.” —Luka 17:12-16.

Manuʻa: O le vavega mulimuli a Iesu a o leʻi puʻea ma faasatauroina o ia, o se faamālōlōga lea. I se faiga e faasagatau atu ai iā i latou na sauni e ave faapagota Iesu, o le aposetolo o Peteru “ua i ai le pelu, ua seʻi e ia, ma taia aʻi le auauna a le ositaulaga sili, ua tipiesea lona taliga taumatau.” (Ioane 18:3-5, 10) O le tala lava lea e tasi i le Luka ua taʻu mai ai iā i tatou e faapea na “tago ai lea o [Iesu] i lona taliga, ua faamalolo ia te ia.” (Luka 22:50, 51) O lea foʻi gaoioiga agaalofa sa faia a o iai uō a Iesu faapea foʻi ma ona fili—o ē na puʻeina o ia i lea taimi.

Ioe, o lo tatou suʻesuʻeina totoʻa o vavega a Iesu, e tele ina tatou iloatino ai faamaoniga o le moni aʻiaʻi o na vavega. (2 Timoteo 3:16) E pei foʻi ona taʻua muamua, o lenā ituaiga o suʻesuʻega e tatau ona faamalosia ai lo tatou faatuatua i folafolaga a le Atua e faamālōlōina ai tagata usiusitai. Ua faamanino mai e le Tusi Paia le faatuatua o Kerisiano, o le “faalagolago lea i mea ua faamoemoe i ai, o le mautinoa lea o mea e le o vaaia.” (Eperu 11:1) Ua faalaeiauina ma le manino e le Atua le iai o le faatuatua e faavae aʻe i faamaoniga, ae lē o le talitonugofie e aunoa ma le mautinoa, pe na o ni moomooga. (1 Ioane 4:1) A o tatou mauaina lenā faatuatua, tatou te iloa ua atili ai ona tatou malolosi, mālōlōina ma fiafia faaleagaga.—Mataio 5:3; Roma 10:17.

E Tatau Ona Maua Muamua le Faamālōlōga Faaleagaga!

O le toʻatele o tagata e mālōlōina faaletino e lē fiafia. O isi ua oo lava ina taumafai e pule i le ola ona ua leai so latou faamoemoe mo le lumanaʻi pe ona ua latou lagona le lofitūina i faafitauli. O le mea moni, ua latou lē malolosi atoatoa i le itu faaleagaga—o se tulaga e sili atu ona matuiā i le silafaga a le Atua na i lo le lē atoatoa i le tulaga faaletino. (Ioane 9:41) I le isi itu, o le toʻatele o ē ua lē atoatoa le malosi o le tino, e pei o Christian ma Junior na taʻua i le mataupu lea faatoʻā mavae atu, ua ola nei i ni olaga fiafia ma le faamalieina. Aiseā? Ona o loo latou ola mālōlōina lelei faaleagaga ma ua faamalosia e se faamoemoe mautinoa e faavae mai le Tusi Paia.

E faasino atu i lo tatou manaʻoga tutasi o ni tagata, na faapea mai ai Iesu: “E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) Ioe, e ese mai i manu na foafoaina, e manaʻomia ai e tagata mea e sili atu na i lo meaʻai faaletino. I le foafoaina i le “faatusa” o le Atua, e tatou te manaʻomia ai meaʻai faaleagaga—o le poto o le Atua ma le malamalama o lana fuafuaga mo i tatou faapea ma le faia o lona finagalo. (Kenese1:27; Ioane 4:34) Ua faatumuina e le poto o le Atua o tatou olaga i se fuafuaga ma le malosi faaleagaga. Ua faataatia ai foʻi se faavae mo le ola e faavavau i se lalolagi parataiso. Ua faapea mai Iesu: “O le ola faavavau foi lenei, ia latou iloa [“mauaina pea o le poto e uiga iā te,” NW ] oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.

E ao ona mātauina e faapea sa leʻi taʻua lava e aumea a Iesu o ia o se “Fai Faamālōlōga” ae o se “Aʻoaʻo.” (Luka 3:12; 7:40) Aiseā? Ona sa aʻoaʻoina e Iesu tagata e faatatau i le vaifofō tumau o faafitauli o tagata—le Malo o le Atua. (Luka 4:43; Ioane 6:26, 27) O lenei malo faalelagi i aao o Iesu Keriso o le a puleaina ai le lalolagi atoa ma faataunuuina ai folafolaga a le Tusi Paia e tusa ai o le toe faaleleia e faavavau o tulaga o tagata amiotonu ma lo latou nofoaga o le lalolagi lea. (Faaaliga 11:15) O le māfuaaga lenā na taʻua faatasi ai e Keriso i lana tatalo faaaʻoaʻo le oo mai o le Malo ma le faia o le finagalo o le Atua i le lalolagi.—Mataio 6:10.

Mo le toʻatele o tagata e lē atoatoa le malosi o le tino, o le aʻoaʻoina o lenei faamoemoe faagaeetia ua māfua ai ona suia loimata o le faanoanoa i le fiafia. (Luka 6:21) O le mea moni, o le a faia e le Atua mea e sili atu na i lo o le aveesea o maʻi ma tulaga lē lelei atoatoa; o le a ia tafiesea le pogai sili o mafatiaga o le tagata—le agasala lea. O le mea moni, i le Isaia 33:24 ma le Mataio 9:2-7 ia na siiina mai muamua, ua faafesootaʻi atu ai le maʻi i le tulaga agasala. (Roma 5:12) O lea, pe a aveesea le agasala, o le a olioli ai tagata e faavavau i “le saolotoga o le fanau a le Atua e manuia ai,” o se saʻolotoga lea e aofia ai le lelei atoatoa o le mafaufau ma le tino.—Roma 8:21.

O i latou o loo mauaina le ola mālōlōina lelei, e faigofie lava ona latou lē amanaʻiaina le tāua o lea mea. Ae e lē faapena le tulaga o i latou o ē o loo pagatia i tulaga lē atoatoa o le malosi o le tino. Ua latou iloa le tāua o le soifua mālōlōina ma le ola, ma le vave e aunoa ma le faatalitalia e mafai ona suia ai mea. (Failauga 9:11) O lea, tatou te faamoemoe o le a iloiloina faapitoa e i latou o ē lē atoatoa le malosi o le tino o loo aofia ai i la tatou ʻaufaitau ia folafolaga matagofie o loo faamauina i le Tusi Paia. Na tuuina atu e Iesu lona ola ina ia faamautinoa ai le faataunuuga o na folafolaga. O le ā se isi faamaoniga e sili atu e mafai ona tatou maua? —Mataio 8:16, 17; Ioane 3:16.

[Faamatalaga pito i lalo]