Fesili Mai le ʻAufaitau

Pe e sesē le taalo i taaloga faitupe e tusa lava pe itiiti se tupe e alu ai?

E lē tele se faamatalaga a le Tusi Paia i taaloga faitupe, ae o loo lava faamatalaga o loo iai, e faaalia ai e lē ōgatusa taaloga faitupe ma mataupu silisili o le Tusi Paia.a O se faataʻitaʻiga, ua lausilafia e le toʻatele e faagaeeina e taaloga faitupe le matapeʻapeʻa. E tāua tele le manatunatu o Kerisiano i lenā mea, auā ua faapea mai le Tusi Paia o “ē matapeʻapeʻa” e lē fai mo latou tofi le Malo o le Atua, ma o le manaʻo tele o le ifo i tupua lava lea.—1 Korinito 6:9, 10; Kolose 3:5.

Ua uunaʻia foʻi e taaloga faitupe uiga faamaualuga ma se agaga leaga fia tauvā e naunau lava e mālō. Na lapataʻi mai le aposetolo o Paulo i uiga faapena: “Aua neʻi avea i tatou ma ē mitamita vale, aua neʻi feluʻiaʻi, aua neʻi felosiaʻi.” (Kalatia 5:26) E faaopoopo atu i lea, ua uunaʻia e taaloga faitupe tagata e faamoemoe atu i le manatu faanuupō o le mauaina o se laki. E anoanoaʻi le tele o mea e fai e tagata o loo taaalo i taaloga faitupe, ma le faamoemoe o le a maua ai se laki ma mālō ai. Ua tatou manatua ai tagata lē faamaoni o Isaraelu o ē na “laulau le ʻai mo Kato [le atua o le Laki], ma faatumu le taulaga i mea e inu mo Meni [le atua o iʻuga tuupōina].”—Isaia 65:11.

Ua manatu nisi e leai lava se mea e afāina ai le peti i ni tupe itiiti a o pelē pe mū faasamasamanoa ma uō ma tauaiga. E moni, atonu e lē o manatu le tagata lea e peti i nai tupe laiti, o ia o se tagata e matapeʻapeʻa, faamaualuga, e tauvā malosi, ma o loo faamoemoe e maua se laki. Ae o ā aafiaga o lona taalo i taaloga faitupe o le a iai i ē o loo latou taaalo faatasi? O le toʻatele o tagata ua matuā pulea e taaloga faitupe, na amata mai lava i ni tamaʻi peti laiti, ma na manatu i ai ua na o se mea e ‘faafiafia ai.’ (Luka 16:10) Ua matuā ogaoga iʻuga ua oo i nei taaloga na manatu mamā i ai o ni faafiafiaga.

Ua matuā moni lenā manatu pe a tuu mai i tamaiti. E toʻatele le fanau iti e faagaeetia pe a mālō i se tupe itiiti, ma ua naunau ai loa e peti i ni tupe tetele. (1 Timoteo 6:10) Ua faamaonia e se suʻesuʻega a le Arizona Council on Compulsive Gambling i le Iunaite Setete e faapea, o le toʻatele o i latou ua pulea e nei taaloga na amata mai lava a o laiti i le “faia lea o ni tamaʻi peti i taaloga, po o le pelē faatasi ma uō po o tauaiga.” Ua faapea mai foʻi se isi lipoti, e “amata ona taaalo tamaiti i taaloga faitupe mai o latou lava aiga, a o pelē faatasi ma o latou aiga ma uō.” Na taʻua foʻi i le lipoti, o le “tolusefulu pasene o tamaiti e taaalo i taaloga faitupe na amata mai lava a o leʻi oo atu i le taʻi sefulutasi o latou tausaga.” E tusa ai ma le tusi o le Why Do People Gamble Too Much—Pathological and Problem Gambling, o le toʻatele o le ʻautalavou o loo taaalo i nei taaloga, latou te auai i soligatulafono po o amioga lē tatau, ina ia faatupe ai nei masaniga leaga. Pagā ni iʻuga leaga o taaloga na manatu mamā i ai e faapea o le a lē afāina ai se tasi!

Talu ai o loo tatou ola i se lalolagi ua anoanoaʻi mailei ma mea e tofotofoina ai, aiseā o le a tuu ai i tatou i se tulaga e lamatia ai i taaloga faitupe? (Faataoto 27:12) O taaloga faitupe e tusa lava pe lē o taaalo ai tamaiti pe itiiti foʻi ni tupe e petipeti ai, ae lamatia ai lava lo tatou itu faaleagaga ma e ao ona ʻalofia. Atonu e lelei mo Kerisiano o ē e fiafia e mū ma pelē ona faamaumauina ʻai o a latou taaloga, pe tau foʻi ina taaalo faasamasamanoa e aunoa ma le tusia o ni ʻai. O Kerisiano mataala o ē manatu mamafa i o latou tulaga faaleagaga faapea ma tulaga faaleagaga o a latou uō ma aiga, latou te matuā ʻalofia taaloga faitupe—e tusa lava pe itiiti se tupe e alu ai.

[Faamatalaga pito i lalo]