Lipoti a Ē Faalauiloa le Malo
O se Polokalame i le TV na Ala ai Ona Ia Vivii i le Atua
NA FAI mai le aposetolo o Paulo, “o isi foʻi ua talaʻi Keriso ma le matauʻa lava, ma le finau vale, a o isi ua talaʻi i le loto lelei.” (Filipi 1:15) I nisi taimi, e oo lava i ē na taumafai e taʻuleagaina tagata o Ieova, na latou faapogaia ma lo latou lē iloa, tagata lotofaamaoni e liliu mai i le upu moni.
Iā Novema 1998, na faaali ai e le TV a Falani se polokalame o loo iai ni ata o le Peteli, o le lālā o Molimau a Ieova i Louviers i Falani. E ui lava i le eseese o manatu faaalia o tagata, ae na iai ni āuga lelei e leʻi faatalitalia na maua mai ai.
O se tasi na maimoa i lenā polokalame, o Anna-Paula o lē e 35 maila [60 kilomita] le mamao o le mea e nofo ai mai le Peteli. O le taimi lenā na suʻe ai se galuega a Anna-Paula, ma ua teteʻa ma lana tane ma e toʻalua ona alo. I le aso na sosoo ai, na ia telefoni i le Peteli e fesili pe maua sana galuega i inā. Na fai mai o ia: “Ona o le polokalame, na ou manatu ai o se nofoaga lelei ma e aogā galuega o loo faia ai.” Na matuā faateʻia o ia ina ua ia iloaina, o i latou uma o loo galulue i le Peteli o ni faifeʻau o loo tauofo atu lo latou taimi! Ina ua māeʻa se talanoaga puupuu e uiga i galuegafai a Molimau a Ieova, na ioe o ia e asiasi atu se Molimau iā te ia.
Ina ua asiasi atu i ai Léna, o se faifeʻau faataimi atoa i le faapotopotoga i lenā vaipanoa, na umi le la talanoaga na fai ma na taliaina ai e Anna-Paula le tusi Le Poto e Taʻitaʻia ai i le Ola e Faavavau.a E oo ane i le asiasiga na sosoo ai, ua uma ona faitau e Anna-Paula le tusi atoa ma na tele foʻi ana fesili. Na ia taliaina se suʻesuʻega faale-Tusi Paia. O upu nei a Anna-Paula: “O le avanoa lenei ou te iloa ai le Afioga a le Atua. Ou te leʻi paʻi lava i se Tusi Paia i loʻu olaga atoa.”
Na asiasi ane Anna-Paula i le Peteli iā Ianuari, ma i le vaiaso na sosoo ai na auai o ia i lana uluaʻi sauniga faa-Kerisiano. E leʻi umi lava ae amata loa ona ia suʻesuʻeina le Tusi Paia ma lana fanau, ma molimau atu i ana uō. Na fai mai o ia: “E leʻi mafai ona ou nofonofo ma lē taʻutaʻu atu mea na ou aʻoaʻoina. Na ou manaʻo e tufa atu upu moni o le Tusi Paia i tagata ma faamāfanafana iā i latou.” Ina ua uma ona tauivi e foʻia nisi o ona lava faafitauli, na amata ai ona auai e lē aunoa Anna-Paula i sauniga. Na vave lava ona agaʻigaʻi i luma ma papatisoina iā Me 5, 2002.
E lē gata i lea, ona o le faaaʻoaʻoga lelei a Anna-Paula ma lona maelega e talaʻi, na amata ai foʻi ona suʻesuʻeina e lona tinā le Tusi Paia ma e leʻi leva ae papatisoina loa. Na fai mai Anna-Paula: “E lē mafaamatalaina loʻu olioli. O aso taʻitasi, ou te faafetai ai iā Ieova mo le avanoa ua ou maua e iloa ai o ia ma auauna iā te ia, atoa foʻi ma faamanuiaga uma ua ia aao i ai mo aʻu.”
[Faamatalaga pito i lalo]
a Lomia e Molimau a Ieova.
[Ata i le itulau 8]
Luga: O Anna-Paula
Lalo: Faitotoʻa ulufale i le ofisa o le lālā i Falani