“Ia Faapea Outou Ona Tatalo”

PE E te silafia upu o le Tatalo a le Alii? O se tatalo faaaʻoaʻo lea na aʻoaʻo mai e Iesu Keriso. I lana Lauga taʻutaʻua i le Mauga, na fetalai ai Iesu e faapea: “Ia faapea outou ona tatalo.” (Mataio 6:9) Talu ai o Iesu na ia aʻoaʻo mai lea tatalo, ua masani ai lava ona taʻua o le Tatalo a le Alii, e taʻua foʻi o Lo Matou Tamā e.

E faitau miliona tagata i le lalolagi ua latou taulotoina le Tatalo a le Alii, ma ua latou faia pea lava pea atonu i aso uma. I nai tausaga talu ai, e toʻatele tagata sa latou faia pea lenei tatalo i aʻoga, ma i mea faitele. Aiseā ua matuā faatāuaina ai le Tatalo a le Alii?

Na tusia e se faifeʻau e suafa iā Cyprian o lona tolu o senituri e faapea: “O le ā se isi tatalo e sili atu ona faaleagaga na i lo o le tatalo lea na aʻoaʻo e Keriso . . . ? O le ā se isi tatalo i le Tamā e sili atu ona moni na i lo o lea na aʻoaʻo mai iā i tatou e Lona Alo, o ia o le Upu Moni?”​—Ioane 14:6.

I ana aʻoaʻoga, ua manatu ai le Lotu Katoliko Roma i le Tatalo a le Alii e faapea, “o le tatalo autū faa-Kerisiano.” Ua faalauiloa mai e le World Book Encyclopedia le tāua o lenei tatalo i lotu uma ua faapea mai o Kerisiano, i le taʻua e faapea, o se tasi o “vala autū o le faatuatuaga faa-Kerisiano.”

Ae peitaʻi, e ao ona faailoa atu e faapea, o le toʻatele o tagata o loo faia pea le Tatalo a le Alii, e latou te lē o malamalama lelei i ai. Ua faapea mai le nusipepa a Kanata o le Ottawa Citizen: “Afai e iai sou talaaga faa-Kerisiano, atonu la e mafai ona e faia faatopetope le Tatalo a le Alii e aunoa ma lou mānava, ae atonu e faigatā ona e faia faagesegese ma e malamalama i ai.”

Pe e tāua le malamalama i a tatou tatalo e fai atu i le Atua? Aiseā na aʻoaʻo mai ai e Iesu iā i tatou le Tatalo a le Alii? O le ā le uiga o lea tatalo mo oe? Seʻi o tatou talanoaina la nei fesili.