Aua Lava Neʻi Mou Atu Lou Agaga Talisapaia
“Le Atua e, ua matuā sili ou manatunatu ona aogā iā te aʻu, ua sili lava ona tele o lo latou faitau aofaʻi.”—SALAMO 139:17.
1, 2. Aiseā e tatau ai ona tatou talisapaia le Afioga a le Atua, ma na faapefea ona faaleo mai e le faisalamo lona agaga talisapaia?
E MATAʻINA se mea na maua! A o galulue e toe faaleleia le malumalu o Ieova i Ierusalema, na maua ai e le faitaulaga sili o Hilikia “le tusi o le tulafono a Ieova na tusia e Mose.” O le uluaʻi kopi lea o le tulafono na tusia i le tusa o le 800 tausaga muamua atu. Manatu i ni lagona atonu na oo i le tupu faamaoni o Iosia, a o momoli atu le tusi i ona luma! E mautinoa sa matuā olioli le tupu ma ia faatonuina loa le tusiupu o Safana, ina ia faitau atu le tusi i ona luma.—2 Nofoaiga a Tupu 34:14-18.
2 I aso nei, ua mafai e le faitau piliona o tagata ona faitauina le Tusi Paia atoa, po o sona vaega foʻi. Po o le faia ea faapea, ua itiiti ai le tāua o le Tusi Paia? E leai. O inā o loo iai le finagalo o Lē Ona le Malosi Uma, lea na tusia ina ia aogā iā i tatou. (2 Timoteo 3:16) O lagona nei o Tavita i le Afioga a le Atua: “Le Atua e, ua matuā sili ou manatunatu ona aogā iā te aʻu, ua sili lava ona tele o lo latou faitau aofaʻi.”—Salamo 139:17.
3. E faapefea ona iloa sa malamalama lelei Tavita i le la faiā ma Ieova?
3 Sa lē taitai mou atu le agaga talisapaia o Tavita mo Ieova, lana Afioga, ma le tapuaʻiga moni. O loo faaleo mai lenā talisapaia i le tele o ana salamo na fatuina. O se faaaʻoaʻoga, i le Salamo 27:4 na ia tusi ai: “E tasi le mea ua ou ōle atu ai iā Ieova, o le mea lava lea ou te saʻili atu ai; ia ou nofo i le fale o Ieova i aso uma o loʻu ola, ina ia ou iloa atu ai le matagofie o Ieova, ma ou saʻili i lona malumalu.” I le uluaʻi gagana Eperu, o le faaupuga ua faitauina, “saʻili,” o lona uiga, e faasolo lemū mafaufauga, e iloilo ma le faaeteete, e vaai atu ma se lagona fiafia, ma ni lagona saafiafi pe moomoo. Lona uiga sa malamalama lelei Tavita i le la faiā ma Ieova. O le ala lea o lona talisapaia o so o se sauniuniga a Ieova mo le faamalosia o lona faatuatua. Maʻeu se faaaʻoaʻoga lelei o le loto talisapaia!—Salamo 19:7-11.
Ia Talisapaia le Avanoa ua Maua ai le Upu Moni
4. Aiseā na ‘matuā fiafia ai Iesu i le agaga paia’?
4 Tatou te lē maua le malamalama i le Afioga a le Atua, mai aʻoaʻoga a le lalolagi. O le poto lenā ua tele ina uunaʻia ai le faamaualuga. Peitaʻi o le mauaina o le malamalama, e faalagolago i le agalelei faifua o Ieova, auā o ia e foaʻi maia le poto i ē faamaulalo, e moni faanaunauga o o latou loto, ma manatu mamafa i o latou manaʻoga faaleagaga. (Mataio 5:3; 1 Ioane 5:20) A o mafaufau Iesu i le tulaga o le a tusia ai i le lagi igoa o nisi tagata lē lelei atoatoa, sa “matuā fiafia ai o ia o i le Agaga Paia, ua faapea atu, ‘Ou te faafetai iā te oe loʻu Tamā e, o le Alii o le lagi ma le lalolagi, ina ua e nanā ia mea i ē popoto ma ē atamamai, a ua faaalia atu ia mea i tama valevale.’”—Luka 10:17-21.
5. Aiseā sa lē tatau ai ona manatu māmā soo o Iesu, i upu moni o le Malo na faaali atu iā i latou?
5 Ina ua mavae lana tatalo, ona fetalai atu lea o Iesu i ona soo: “Amuia mata ua iloa mea tou te iloa; auā ou te fai atu iā te outou, e toʻatele perofeta ma tupu na fia matamata i nei mea ua outou iloa, a ua latou lē iloa lava; na latou fia faalogo foʻi i nei mea ua outou faalogo ai a e leʻi faalogo ai lava.” Sa faalaeiau Iesu i ona soo faamaoni, ia aua neʻi manatu māmā i upu moni tautele o le Malo ua faaalia iā i latou. Sa leʻi iloa e auauna a Ieova mai augātupulaga anamua nei upu moni; e mautinoa foʻi sa leʻi faaalia i “ē popoto ma ē atamamai” i aso o Iesu!—Luka 10:23, 24.
6, 7. (a) O ā ni māfuaaga tatou te talisapaia ai le upu moni mai le Atua? (e) O le ā le eseesega i aso nei o le lotu moni ma lotu sesē?
6 I o tatou aso, e tele atu māfuaaga e tatau ai ona tatou talisapaia le upu moni mai le Atua. Ua faaaogā e Ieova “le auauna faamaoni ma le mafaufau,” e faailoa mai i ona tagata tapuaʻi le malamalamaga loloto i lana Afioga. (Mataio 24:45; Tanielu 12:10) Na tusi le perofeta o Tanielu e faatatau i taimi o le iʻuga: “E fetaufetuliaʻi tagata e toʻatele, e tupu tele foʻi le malamalama.” (Tanielu 12:4) Pe e te lē ioe, ua matuā “tupu tele” i aso nei le malamalama e uiga i le Atua, ma o loo lava ma totoe le tausiga faaleagaga o ana auauna?
7 Pagā se eseesega i le tamaoaiga faaleagaga o tagata o le Atua, ma le nunumi o tagata o loo i Papelonia le Aai Tele! O le iʻuga, e toʻatele tagata ua feita ma ʻinoʻino i lotu sesē, ma ua saʻili atu i le tapuaʻiga moni. O i latou nei pei ni mamoe, e lē o fia ‘faatasia i agasala a Papelonia le Aai Tele,’ ma e lē fia ‘tofusia foʻi i ona mala.’ E valaaulia e Ieova ma ana auauna na tagata, ia latou auai faatasi i le tapuaʻiga moni.—Faaaliga 18:2-4; 22:17.
Ua Lolofi Mai Ē Loto Talisapaia
8, 9. Ua faataunuu faapefea le Hakai 2:7 i aso nei?
8 Na valoia e Ieova e uiga i le fale faafaatusa o lana tapuaʻiga: “Ou te lūlūina foʻi nuu uma; ona oo mai ai lea o mea ua manaʻomia e nuu uma; ou te faatumuina foʻi lenei fale i le pupula [po o le mamalu].” (Hakai 2:7) Sa faataunuu lenei valoaga mataʻina i le taimi o Hakai, ina ua toe fausia le malumalu i Ierusalema, e tagata o le Atua na toe foʻi i lo latou nuu. I aso nei, ua iai se isi faataunuuga atili o na upu a Hakai, i le faatatau atu i le malumalu sili faaleagaga o Ieova.
9 E faitau miliona tagata ua lolofi mai i le malumalu faafaatusa, ina ia tapuaʻi i le Atua “i le agaga ma le faamaoni [po o le upu moni].” Ma i tausaga uma o loo gasolo mai pea le anoanoaʻi o ē ua taʻua o “mea ua manaʻomia e nuu uma.” (Ioane 4:23, 24) E pei ona faaalia i le lipoti mo le tausaga faaleauaunaga o le 2006 i le lalolagi aoao, e tusa ma le 248,327 ē na papatisoina, e faailoga ai lo latou tuuina atu iā Ieova. O se faatatauga e tusa e 680 soo fou i aso taʻitasi! Ua latou fiafia i le upu moni ma faanaunau e auauna iā Ieova o ni ē folafola le Malo; e faailoa ai na tosina pe na taʻitaʻiina mai i latou e le Atua.—Ioane 6:44, 65.
10, 11. Seʻi faamatala se mea na tupu e faaalia ai le talisapaia e tagata o upu moni o le Tusi Paia.
10 O le toʻatele o nei tagata faamaoni na tosina mai i le upu moni ona ua malamalama i ‘le eseesega o lē amiotonu ma lē amio leaga, le eseesega o lē ua auauna i le Atua, ma lē ua lē auauna iā te ia.’ (Malaki 3:18) Seʻi mafaufau i le mea na tupu iā Wayne ma Virginia. O se ulugalii sa i le lotu Porotesano, ae sa leʻi faamalieina i tali o le tele o a la fesili na iai. Sa matuā ʻinoʻino lenei ulugalii i taua, ma sa lē mautonu ma lē fiafia ina ua la vaaia se faifeʻau o faamanuia atu i fitafita ma a latou auupega sa sauniuni ai mo se taua. A o faasolo ina matutua le ulugalii, sa lē amanaʻia i laʻua e isi tagata o le latou lotu, e ui sa avea Virginia o se faiaʻoga o le aʻoga Aso Sa. “E leai lava se isi seʻi sau e asi maʻua, pe faaleo mai ni lagona o fia fesoasoani mai i lo ma itu faaleagaga,” o le faamatalaga lea a si ulugalii. “E na o ma tupe lava sa naunau mai i ai le lotu. Na lagona le lē mautonu.” Na atili ona lē fiafia ina ua lagolagoina e le latou lotu le tulaga o tagata tauatane.
11 I lenā taimi, ua avea ai le la tama teine, faapea le tama a le teine, o ni Molimau a Ieova. Muamua sa feita Wayne ma Virginia i le lotu a le la fanau. Mulimuli ane ua toe suia o la mafaufau ma fai ai loa se la suʻesuʻega faale-Tusi Paia. Na faapea mai Wayne: “E na o le tolu masina, ae ua tele atu upu moni o le Tusi Paia ua ma aʻoaʻoina, na i lo mea sa ma iloa i le 70 tausaga ua mavae! E ma te leʻi iloaina o Ieova, o le suafa lea o le Atua, e ma te leʻi iloa foʻi se mea e uiga i le malo ma le lalolagi Parataiso.” E leʻi umi ae amata ona ō atu lenei ulugalii i sauniga a le faapotopotoga, ma auai foʻi i le galuega talaʻi. Na faapea mai Virginia: “Ua ma mananaʻo e taʻu atu i tagata uma le upu moni.” I le 2005 na papatiso ai lenei ulugalii, i le taʻi 80 ma ona tupu o o la tausaga. Na la faapea mai: “O lenei ua iai so ma aiga moni faa-Kerisiano.”
Ia Talisapaia le ‘Saunia o i Tatou mo Galuega Lelei Uma’
12. O ā mea ua saunia pea e Ieova mo ana auauna, ma o le ā e tatau ona tatou faia ina ia aogā ai na sauniuniga?
12 E fesoasoani Ieova i ana auauna ina ia faia lona finagalo. E pei o Noa, sa tuuina atu iā te ia faatonuga maʻoti i le auala e fau ai le vaa, ma o se galuega sa tatau ona saʻo lelei le amataga o lona faatinoga! O le mea tonu lenā na fai. Aiseā? Auā “na faia foʻi e Noa e faapei ona poloaʻi atu ai le Atua iā te ia i mea uma, sa faapea lava ona fai e ia.” (Kenese 6:14-22) E faapena foʻi aso nei, o loo faaauupegaina lelei e Ieova ana auauna mo le faia o lona finagalo. Ia manatua, o la tatou galuega autū lenā o le talaʻia o le tala lelei o le Malo o le Atua ua faavaeina, ma fesoasoani atu i isi ia avea ma soo o Keriso. E tutusa lava i tatou ma Noa. E faatoʻā taulau manuia a tatou taumafaiga, pe a tatou usiusitai. E ao ona tatou usitai i faatonuga ua saunia e Ieova e ala mai i lana Afioga ma lana faalapotopotoga.—Mataio 24:14; 28:19, 20.
13. O ā auala o loo faaaogā e Ieova e aʻoaʻo ai i tatou?
13 E mafai ona faataunuu lenā galuega, pe a tatou faaaʻoaʻo e faaaogā lelei pe faaaogā saʻo la tatou meafaigaluega autū, le Tusi Paia, lea e “aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu, ina ia atoatoa ona lelei ai o le tagata o le Atua, ia saunia lava ia i galuega lelei uma lava.” (2 Timoteo 2:15; 3:16, 17) O loo aʻoaʻoina i tatou e Ieova e ala mai i le faapotopotoga Kerisiano e pei foʻi ona iai i le uluaʻi senituri. I aso nei, i faapotopotoga e 99,770 i le lalolagi aoao, o loo faia ai i vaiaso taʻitasi le Aʻoga o le Faiva Faatiokarate, ma le Sauniga o le Auaunaga e fesoasoani i la tatou faiva. Po o e talisapaia nei sauniga tāua, i lou auai e lē aunoa ma faatatauina mea o loo e aʻoaʻoina mai ai?—Eperu 10:24, 25.
14. Ua faapefea ona faaalia e auauna a Ieova lo latou talisapaia o le faaeaga e auauna atu ai i le Atua? (Faaaofia ai ni manatu mai le lipoti o i itulau e 27-30.)
14 O loo maelega i le talaʻiga le toʻatele o auauna a le Atua i le lalolagi aoao, ona o lo latou talisapaia o nei sauniuniga. O se faaaʻoaʻoga i le tausaga faaleauaunaga o le 2006, e toʻa 6,741,444 le ʻautalaʻi sa faaaluina itula e 1,333,966,199 i vala eseese o le galuega, e aofia ai ma le faia o suʻesuʻega faale-Tusi Paia e 6,286,618. Ua na o nisi na o faamatalaga mananaia o loo i le lipoti a le lalolagi aoao. Matou te valaaulia oe ia e tagaʻi i lenei lipoti ma faalaeiau ai oe, e pei foʻi ona faalaeiauina o tatou uso sa i le uluaʻi senituri, a o faalogo i lipoti o le faatelega o le galuega talaʻi i o latou foʻi taimi.—Galuega 1:15; 2:5-11, 41, 47; 4:4; 6:7.
15. Aiseā e lē tatau ai ona loto vaivai se tasi i lana auaunaga ma le loto atoa iā Ieova?
15 O viiga e tele o loo avatu i le Atua i tausaga taʻitasi, e atagia mai ai le matuā talisapaia e auauna a Ieova, o le faaeaga ua latou iloa ai Ieova ma molimau atu iā te ia. (Isaia 43:10) O taulaga o viiga o loo ofoina atu e nisi o o tatou uso ma tuafāfine ua loa lo latou soifua, mamaʻi, po ua faataotolia foʻi i gasegase o le tino, atonu e talitutusa ma si foaʻi faatauvaa lea na faia e le fafine mativa. Ae aua neʻi galo iā i tatou, e talisapaia moni lava e Ieova ma lona Alo, i latou uma o loo auauna ma le loto atoa i le Atua, auā o loo latou faia le mea sili e latou te mafai.—Luka 21:1-4; Kalatia 6:4.
16. O ā meafaigaluega mo le aʻoaʻo atu ua saunia mai e Ieova?
16 E lē gata ina aʻoaʻoina i tatou e Ieova i mo le galuega talaʻi, ae ua ia faaauupegaina foʻi i tatou i ni meafaigaluega e sili ona lelei. I ni tausaga ua mavae atu, na saunia mai ai tusi e pei O Le Upu Moni E Taʻitaʻia Ai I Le Ola Faavavau, E Mafai ona E Ola e Faavavau i Parataiso i le Lalolagi, Le Poto e Taʻitaʻia ai i le Ola e Faavavau, ma le tusi na tatalaina talu ai nei, O ā Aʻoaʻoga Moni a le Tusi Paia? Ua matuā lelei ona faaaogāina nei tusi i le galuega talaʻi e i latou o loo talisapaia nei sauniuniga.
Ia Faaaogā Lelei le Tusi o Aʻoaʻoga a le Tusi Paia
17, 18. (a) O fea vaega o le tusi o Aʻoaʻoga a le Tusi Paia e te manaʻo e faamatilatila i lau faiva? (e) O le ā se manatu o se tasi ovasia matagaluega i lenei tusi?
17 E 19 mataupu o lenei tusi, ma sona faaopoopoga mo nisi o mataupu loloto o le Tusi Paia o loo iai. O loo tusia i se gagana faigofie ma manino, ma ua faamaonia le avea o se faamanuiaga mo le galuega talaʻi. O se faaaʻoaʻoga, o loo talanoaina i le mataupu e 12 le mataupu “Ia Faafiafia le Atua i o Tatou Olaga.” O loo faamatala atu e lenei mataupu i le tagata aʻoga le auala e mafai ai ona avea o ia ma uō a le Atua, o se mea atonu e lē taitai manatu le toʻatele o tagata e mafai ona tupu. (Iakopo 2:23) O faapefea ona tali mai tagata i lenei fesoasoani mo le faia o suʻesuʻega faale-Tusi Paia?
18 Fai mai se tasi ovasia matagaluega i Ausetalia, o lenei tusi o Aʻoaʻoga a le Tusi Paia “e vave tele ona tosina mai ai le fiafia o tagata e fai se talanoaga.” Fai mai lana faamatalaga, e faigofie tele le faaaogāina o le tusi, “ua toe faafouina ai le lagona mautinoa ma le olioli o le toʻatele o le ʻautalaʻi i le faiva. E lētioa a taʻu e nisi tagata lenei tusi e tāua pei o le Auro!”
19-21. Faamatala mai nisi o mea na tutupu o loo faamatilatila ai le tāua o le tusi o Aʻoaʻoga a le Tusi Paia.
19 “Ou te talitonu na auina mai oe e le Atua,” o le faamatalaga lea a se fafine i Guyana na fai atu i se uso paeonia na talaʻi atu i lona fale. O le taimi lea ua alu ese le tamāloa na nonofo ma lenei fafine, ae tiaʻi ai na o ia ma le la fanau laiti e toʻalua. Sa suʻe e le uso paeonia le tusi i le mataupu 1 ma faitau atu i ai le palakalafa e 11, i lalo o le tamaʻi ulutala “O le ā le Finagalo o le Atua i Faiga Lē Tonu o Loo Tutupu?” Fai mai le uso: “Na pāʻia le loto o le fafine i manatu na faitau i ai. Na iʻu ina tū aʻe i luga ma alu i tua o lona fale, ma tagi masūsū ai.” Sa fiafia lenei fafine e faia sana suʻesuʻega faale-Tusi Paia ma se tasi o tuafafine mai lenā vaipanoa, ma o loo lelei lava lona agaʻigaʻi i luma.
20 O Iose e nofo i Sepania, lea na maliu si ana avā i se faalavelave tau taavale. Na iʻu ina liliu Iose i fualaau faasāina e mapu i ai i ona lagona mafatia, ma sa saʻili atu foʻi i ni fesoasoani mai tagata faapitoa. Peitaʻi, sa lē mafai e na fomaʻi o le mafaufau ona latou taliina le fesili na sili ona mafatia ai pea Iose: “Aiseā na faataga ai e le Atua laʻu avā e maliu?” I se tasi aso, na feiloaʻi ai Iose iā Falanisisi, o se tane e la te faigaluega faatasi. Na fai i ai Falanisisi e mafai ona la talanoaina le mataupu e 11 o le tusi o Aʻoaʻoga a le Tusi Paia, lea e faaulutalaina “Aiseā ua Lē Taofia ai e le Atua Puapuaga?” Sa matuā pāʻia le loto o Iose i le faamatalaga a le Tusi Paia, faapea foʻi le faaaʻoaʻoga i se faiaʻoga ma se tamaitiiti aʻoga. Sa matuā naunau o ia e suʻesuʻe, sa auai i se fonotaga matagaluega, ma ua auai atu nei i sauniga a le faapotopotoga.
21 O Roma o se tane faipisinisi i Polani e 40 ona tausaga, e na te faatāua tele le Tusi Paia. Ae ona e tele lona taimi e alu i lana galuega, o lea na lē tele ai se agaʻigaʻi i luma i lana suʻesuʻega faale-Tusi Paia. E ui i lea, sa auai i se tauaofiaga itumalo, ma maua ai sana tusi o Aʻoaʻoga a le Tusi Paia. O inā na ia faia ai se suiga mataʻina. Fai mai o ia: “Ua mafai e lenei tusi, ona sosoo faatasia uma aʻoaʻoga autū a le Tusi Paia.” I le taimi nei, ua faia e lē aunoa lana suʻesuʻega, ma e tele ni suiga lelei ua ia faia.
Ia Tuputupu Pea Lou Agaga Talisapaia
22, 23. E faapefea ona tatou talisapaia pea lo tatou faamoemoe?
22 E pei ona sa faamatalaina i Tauaofiaga Itumalo “Ua i Faitotoʻa le Faaolataga!,” o loo moomoo Kerisiano moni i le faaolataga e faavavau lea na folafola mai e le Atua, ma ua mafai ona maua ona o le toto maligi o Iesu. E leai se isi auala e sili atu ona lelei e faaalia ai lo tatou talisapaia o lenā faamoemoe tautele, na i lo le faaauau pea ona tatou faamamā mai galuega e oti ai, ina ia tatou auauna atu i le Atua soifua.—Eperu 9:12, 14.
23 Ioe, ua silia nei ma le ono miliona ē o loo folafolaina le Malo, o loo tumau pea ma le faamaoni e auauna i le Atua, e ui ina ola ai i se lalolagi ua iloga i uiga manatu faapito. Ma o se vavega lenei mea. O se faamaoniga lea o le matuā talisapaia e tagata o Ieova, o lo latou faaeaga e auauna atu i le Atua, auā ua latou iloa, “e lē se mea faalēaogā lo [latou] tautigā i le Alii.” Tau ina ia tuputupu pea lenā agaga talisapaia!—1 Korinito 15:58; Salamo 110:3.
O le a Faapefea Ona E Tali?
• O le ā ua aʻoaʻoina ai i tatou e le faisalamo e faatatau i le talisapaia o le Atua ma ana sauniuniga faaleagaga?
• Ua faapefea ona faataunuuina i aso nei upu a le Hakai 2:7?
• Ua faapefea ona faaauupegaina e Ieova ana auauna ina ia uigā la latou auaunaga iā te ia?
• O le ā se mea e mafai ona e faia, e faaalia ai lou talisapaia o le lelei o Ieova?
[Siata i le itulau 27-30]
LIPOTI O LE TAUSAGA FAALEAUAUNAGA 2006 A MOLIMAU A IEOVA I LE LALOLAGI AOAO
(Tagaʻi i le lomiga)
[Ata i le itulau 25]
Ua faaauupegaina i tatou e Ieova e faia lona finagalo