Se Tagata Mauʻoa na Faia se Filifiliga Lē Atamai
SA FAIMEATONU se tauleʻaleʻa mauʻoa tausi tulafono, ma e maelegā i le tapuaʻiga. Ina ua sau iā Iesu, na ia toʻotuli ma fesili atu iā te ia: “Le aʻoaʻo e, se a se mea lelei ou te faia ou te maua ai le ola faavavau?”
O le tali atu a Iesu na faaalia ai, e manaʻomia ona tausia e le tamāloa tulafono a le Atua, ina ia maua ai le ola e faavavau. Ina ua ia fesili atu iā Iesu e faamaʻoti mai po o fea o na tulafono, na fetalai atu Iesu: “Aua e te fasioti tagata; aua e te mulilua; aua e te gaoi; aua e te molimau pepelo; ia e āva i lou tamā ma lou tinā; ma ia e alofa atu i lē lua te tuaoi, ia pei o oe lava iā te oe.” O poloaʻiga faavae ia o loo iai i le Tulafono na tuuina atu iā Mose. Ona faapea mai lea o le tauleʻaleʻa: “Ua ou tausia na mea uma, se a se mea o toe ou te leʻi faia?”—Mataio 19:16-20.
Ua “alofa atu” Iesu iā te ia ma fetalai atu: “E tasi le mea e lē o iā te oe. Inā alu ia, faatau atu au mea uma, ma avatu i ē ua matitiva, ona e maua lea o le ʻoa i le lagi; i le e sau ai, ma mulimuli mai iā te aʻu.”—Mareko 10:17-21.
Ua faafuaseʻi nei ona feagai lenei tauleʻaleʻa ma se filifiliga faigatā. O le ā nei o le a ia faia? Po o le a ia loto malie e faatau atu mea o loo iā te ia, ae avea ma soo o Iesu, po o le a ia taofimau pea i ana mea? Po o le a ia saʻilia ea ʻoa i le lalolagi, po o le saʻilia o ʻoa i le lagi? O se filifiliga faigatā tele lea iā te ia. E manino mai sa naunau o ia i lona itu faaleagaga, ona o lea na ia tausia Tulafono, ma talosaga atu po o ā nisi o mea e na te faia e maua ai le finagalo malie o le Atua. O le ā lana filifiliga na fai? “Ua alu ese foʻi ma le tigā, auā ua tele ana oloa.”—Mareko 10:22.
E leʻi atamai le filifiliga a le tauleʻaleʻa lenei. Pe ana faapea na avea o ia ma soo faamaoni o Iesu, sa mafai ona ia maua le mea na ia saʻilia—o le ola e faavavau. E lē o taʻu maia po o le ā le mea na tupu i le tauleʻaleʻa lenei. Ae peitaʻi, ua tatou iloa pe tusa o le 40 tausaga mulimuli ane ai, ae faaumatia loa e ʻautau a Roma ia Ierusalema, ma le tele o vaega o Iutaia. E toʻatele tagata Iutaia na fano ai o latou ola faapea ma a latou ʻoa.
I se faaeseesega ma le tauleʻaleʻa lenei, na faia e Peteru ma isi soo se filifiliga atamai. Na latou “tuua mea uma” ae mulimuli iā Iesu. Maʻeu le aogā iā i latou o lenā filifiliga! Na taʻu atu e Iesu iā i latou, o le a latou maua mea e sili mamao atu i lo mea na latou tuua. E lē gata i lea, o le a latou maua le ola e faavavau. E leʻi iai se māfuaaga na latou faanoanoa ai mulimuli ane, ona o la latou filifiliga na fai.—Mataio 19:27-29.
E tatou te fesagaʻi uma lava ma filifiliga i le olaga—e laiti nisi, ae tetelē nisi. O le ā le fautuaga a Iesu e faatatau i na filifiliga? Po o le a e taliaina ea lana fautuaga? O le faia faapea, o le a tele se taui e te maua mai ai. Seʻi o tatou iloiloina nei le auala e mulimuli ai iā Iesu, ma maua aogā i mea na ia fetalai ai.