O Lesona Tatou te Aʻoaʻoina Mai iā Iesu

E Faatatau i le Lumanaʻi o Tagata

Pe na folafola mai e Iesu le ola i le lagi?

Ioe, na ia folafola mai! Sa toe faatūina Iesu, ma afio atu i le lagi e faatasi ma lona Tamā. Peitaʻi, a o leʻi maliu ma toetū o ia, na ia taʻu atu i ona aposetolo faamaoni e toʻa 11 e faapea: “E tele mea e nonofo ai i le maota o loʻu Tamā. . . . ou te alu e sauni se nofoaga mo outou.” (Ioane 14:2) Peitaʻi, e toʻaitiiti i latou o le a ō i le lagi. Na faamanino mai e Iesu lenā manatu ina ua ia fetalai atu i ona aposetolo e faapea: “Le lafu mamoe itiiti e, aua le fefefe, auā ua finagalo malie lo outou Tamā e tuuina atu le malo iā te outou.”—Luka 12:32.

O le ā o le a faia e le “lafu mamoe itiiti” i le lagi?

E finagalo le Tamā e avea lenei vaega toʻaitiiti ma vaega o le malo i le lagi faatasi ma Iesu. E faapefea ona tatou iloa? Ina ua mavae lona toetū, na faailoa atu ai e Iesu i le aposetolo o Ioane, o le a iai nisi o ē faamaoni o le a “pule mai foʻi o ni tupu i le lalolagi.” (Faaaliga 1:1; 5:9, 10) O se tala e fiafia ai. O se tasi o manaʻoga aupito i tāua mo tagata, o se faigāmalo lelei. O le ā o le a faataunuuina e lenei malo o loo pulea e Iesu? Na fetalai Iesu: “Pe a tiʻetiʻe le Atalii o le tagata i lona nofoālii mamalu i le taimi e toe faafouina ai mea uma, tou te tiʻetiʻe ai foʻi o outou o ē na mulimuli mai iā te aʻu i nofoālii e sefulu lua.” (Mataio 19:28) O le pulega a Iesu ma ona soo o le a iʻu ai ina toe “faafouina,” pe toe faafoʻisia le tulaga atoatoa na olioli ai le uluaʻi ulugalii i le lalolagi, a o leʻi agasala.

O le ā le faamoemoe ua ofo mai e Iesu mo isi tagata?

Sa foafoaina tagata e ola i le lalolagi, e ese mai ai iā Iesu, sa foafoaina o ia e ola i le lagi. (Salamo 115:16) O le mea lea na fetalai ai Iesu e faapea: “O outou e mai i lalo nei; a o aʻu e mai i lugā.” (Ioane 8:23) Na fetalai Iesu i se lumanaʻi matagofie mo tagata i le lalolagi. Na ia faapea mai: “E fiafia o ē e agamalu, auā e fai mo latou tofi le lalolagi.” (Mataio 5:5) Na ia faasino atu i tusitusiga paia a le faisalamo e faapea: “A o ē agamalu, e fai mo latou le nuu; e faafiafia foʻi i latou iā te i latou ona o le manuia e tele. E fai lava le nuu mo tagata amiotonu, e nonofo ai pea i latou.”—Salamo 37:11, 29.

O le “lafu mamoe itiiti” lea e ō i le lagi, e lē na o i latou o le a mauaina le ola e faavavau. Sa fetalai foʻi Iesu i se isi faamoemoe o loo avanoa mo le faitau miliona o tagata i le lalolagi aoao. Na ia fetalai: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.

O le a faapefea ona tafiesea e le Atua mafatiaga o tagata?

Na fetalai Iesu i le tafiesea o ni pogai se lua mo mafatiaga i le faapea mai: “O lenei, ua faamasinoina le lalolagi, ma e tuuesea nei le pule o lenei lalolagi.” (Ioane 12:31) Muamua, o le a faamasinoina ma faaumatia tagata amioleaga o ē o loo faapogaia mafatiaga. Lona lua, o le a tuuesea Satani ma e na te lē toe faasesēina tagata.

Ae ā i latou na ola ma maliliu i aso ua mavae ae leʻi maua se avanoa e aʻoaʻo ai e faatatau i le Atua ma Keriso, ma faatuatua iā i laʻua? Na taʻu atu e Iesu i se tagata amioleaga o lē na oti i Ona autafa e faapea: “O le a ta faatasi i le Parataiso.” (Luka 23:43) O lenā tagata ma le faitau miliona o isi, o le a maua le avanoa e aʻoaʻo ai e faatatau i le Atua, pe a toe faatūina mai o ia e Iesu i se lalolagi parataiso. O le a ia maua le avanoa e faatasi ai ma ē agamalu ma amiotonu, o le a mauaina le ola e faavavau i le lalolagi.—Galuega 24:15.

Mo nisi faamatalaga atili, tagaʻi i le mataupu e 3 ma le 7 o le tusi O ā Aʻoaʻoga Moni a le Tusi Paia?a

[Faaopoopoga i lalo]

[Ata i le itulau 23]

“E fai lava le nuu mo tagata amiotonu, e nonofo ai pea i latou.”—Salamo 37:29