Ia Mafuta Atu i le Atua
E Finagalo o Ia ia Tatou Manuia
O MĀTUA alolofa e naunau e vāai atu ua taulau manuia olaga o a latou fanau. E finagalo foʻi Ieova le Atua lo tatou Tamā o i le lagi ina ia taulau manuia lana fanau i le lalolagi. Ua faaalia mai lona alofa i le faasino mai o le auala e taulau ai. O se faaaʻoaʻoga, seʻi manatu i ana fetalaiga iā Iosua, i le Iosua 1:6-9.
Seʻi mafaufau i le ata o loo i le itu taumatau. Ina ua maliu Mose, na avea Iosua ma taʻitaʻi fou o le faitau piliona o le nuu o Isaraelu. Ua sauni le nuu e ulu atu i le nuu lea na folafola e le Atua i o latou augātamā. Sa fautuaina Iosua e le Atua. Afai e usitaʻi i ai, o le a taulau. Ae e lē na o Iosua e aogā i ai nei fautuaga. E tatou te taulau foʻi pe a faatatauina.—Roma 15:4.
E lē faatasi ae faatolu ona fetalai Ieova iā Iosua, ia lototele ma faamalosi. (Fuaiupu e 6, 7, 9) O le mea moni sa manaʻomia ona lototele ma malosi Iosua ina ia taʻitaʻiina ma le manuia Isaraelu i le Nuu Folafolaina. E faapefea ona ia maua ia uiga tāua?
E mafai ona maua e Iosua le lototele ma le malosi mai tusitusiga faagaeeina. Na fetalai Ieova: “Ia e anaana e fai e tusa ma le tulafono uma na fai atu ai Mose laʻu auauna iā te oe.” (Fuaiupu e 7) I lenā taimi, atonu na iai iā Iosua ni tusi o le Tusi Paia.a Peitaʻi, o le iai o le Afioga a le Atua e lē faapea ai o le a taulau manuia. Ina ia aogā, e lua mea na tatau ona faia e Iosua.
Muamua lava, ia ave i fale e Iosua afioga a le Atua. Na fetalai Ieova: “Ia mafaufau i ai i le ao atoa ma le pō.” (Fuaiupu e 8) Ua taʻua e se tasi tusi: “Ua faatonuina e le Atua Iosua ina ia manatua Lana Tulafono ia ‘faitau lemū’ ma ‘mafaufau,’ pe ‘manatunatu loloto’ i ai.” O le faitau ma mafaufau loloto i le Afioga a le Atua i aso taʻitasi, o le a fesoasoani iā Iosua e fesagaʻia ai luʻi i le lumanaʻi.
Lona lua, na manaʻomia ona faatatauina e Iosua mea ua ia aʻoaʻoina mai le Afioga a le Atua. Na fetalai atu Ieova iā te ia: “Ia e anaana e fai e tusa ma mea uma ua tusia i ai; ona manuia ai lea iā te oe o lou ala.” (Fuaiupu e 8) E taulau manuia Iosua pe a ia faia le finagalo o le Atua. O le mea moni lava lenā. E lē mafai ona lē taunuu le finagalo o le Atua.—Isaia 55:10, 11.
Na utagia e Iosua le fautuaga a Ieova. O le iʻuga, na tuu tuluʻi ma faamalieina lona olaga o se tagata tapuaʻi faamaoni iā Ieova.—Iosua 23:14; 24:15.
Pe e te fia maua se olaga e taulau manuia e pei o Iosua? E finagalo Ieova ia e manuia. Ae e lē lava le tau ina iai iā te oe o lana Afioga. Na fautua mai se tasi Kerisiano faamaoni ua loa i le auaunaga: “Ia faitau i le Tusi Paia ma ia tāmau i lou loto.” Pe afai e fafagaina pea lou loto i Afioga a le Atua ma faatatauina i lou olaga mea ua e aʻoaʻoina, ‘ona manuia ai lea o lou ala,’ e pei o Iosua.
[Faaopoopoga i lalo]
a O tusitusiga paia na iā Iosua atonu e aofia ai tusi e lima a Mose, (Kenese, Esoto, Levitiko, Numera, ma le Teuteronome), le tusi o Iopu ma se salamo e tasi pe lua.