Mose​—O se Tagata Alofa

O LE Ā LE ALOFA?

O le alofa e aofia ai faalogona māfana mo isi. E faaalia i upu ma gaoioiga a se tagata alofa ona faalogona mo ē e pele iā te ia, e oo lava i le faamuamua o o latou manaʻoga.

FAAALIA E MOSE LE ALOFA.

Na faaalia e Mose le alofa mo le Atua. E faapefea? Na ia tausia le mataupu silisili o loo i le 1 Ioane 5:3: “O le alofa lenei i le Atua, ia tatou tausi i ana poloaʻiga.” Na usiusitaʻi Mose i so o se poloaʻiga a le Atua, e tusa po o le faia o se tofiga faigatā e pei o le feutagaʻi ma Farao, pe e na o le faaloaloa atu lava o lona tootoo i le Sami Ulaula. Ioe, na “faapea lava ona ia faia.”​—Esoto 40:16.

Na faaalia e Mose le alofa mo tagata Isaraelu. Sa iloa e nei tagata o loo faaaogā e Ieova Mose ina ia taʻitaʻia le nuu, o lea na latou faalatalata atu ai iā te ia pe a feagai ma faafitauli. Ua taʻua i le Tusi Paia: “Ua gasolo mai pea le nuu ma tutū i luma o Mose mai i le taeao seʻia oo i le afiafi.” (Esoto 18:13-16) Seʻi manatu i le lēlavā o Mose a o faalogologo atu i le aso atoa i nei tagata a o sasaa atu o latou mafatiaga. Peitaʻi, sa fiafia pea o ia e fesoasoani i tagata sa alofa i ai.

Sa tatalo foʻi Mose mo i latou, e oo lava i ē sa faia mea sesē iā te ia. O se faataʻitaʻiga, sa taia e Ieova Miriama i se lepela ona sa muimui iā Mose. Nai lo o le fiafia o Mose i lenā faasalaga, sa vave lava ona ia talosaga atu iā Ieova ma tatalo e faapea: “Faamolemole le Atua e, faamolemole ia faamālōlō i loʻu tuafafine!” (Numera 12:13) E mautinoa o le alofa na uunaʻia ai Mose e faia lenā tatalo lē manatu faapito.

LESONA MO I TATOU.

E mafai ona tatou faaaʻoaʻo iā Mose e ala i le atiaʻe o le alofa loloto mo le Atua. O lenā alofa e uunaʻia ai i tatou e usitaʻia ana poloaʻiga ʻmai i le loto.’ (Roma 6:17) O le usitaʻi iā Ieova mai i le loto o le a faafiafiaina ai lona finagalo, ma tatou maua ai aogā. (Faataoto 27:11) O le mea moni, o lo tatou auauna iā Ieova ma le alofa moni, e lē gata o le a tatou faia ai le mea saʻo, ae o le a tatou fiafia ai foʻi e faia na mea!​—Salamo 100:2.

O se isi auala e faaaʻoaʻo ai iā Mose, o le atiaʻe lea o le alofa lē manatu faapito. Pe a faailoa mai e a tatou uō ma aiga ni o latou faafitauli, o le a uunaʻia i tatou e le alofa ina ia (1) uaʻi atoatoa atu, (2) lagona o latou faalogona ootia, ma (3) faailoa atu lo tatou manatu mamafa iā i latou.

I le pei o Mose, e mafai ona tatou tatalo mo ē e pele iā i tatou. O nisi taimi e tatou te manatu e leai se mea e mafai ona tatou faia, ma tatou faapea atu, “e na o le pau se mea e mafai ona ou faia, o le tatalo mo oe.” Ae ia manatua: “E malosi tele le tatalo faatauanau a le tagata amiotonu.” (Iakopo 5:16) O a tatou tatalo e ono uunaʻia ai Ieova e faia se gaoioiga mo lenā tagata, lea atonu e ese mai i se mea na finagalo i ai o Ia. O lea la, o le mea sili e mafai ona faia mo ē e pele iā i tatou, o le tatalo lea mo i latou.a

Pe e te lē ioe e tele lesona ua tatou aʻoaʻoina mai iā Mose? E ui o ia o se tagata e pei o i tatou, ae sa ia faataatia se faaaʻoaʻoga mataʻina o le faatuatua, lotomaulalo, ma le alofa. O le mulimulituʻi i lana faaaʻoaʻoga o le a maua ai aogā e i tatou faapea foʻi ma isi.​—Roma 15:4.