Mātua e, po o Outou Fesoasoani i o Outou Alo Ina ia Agaʻigaʻi i Luma ma Papatisoina?

1. O le ā e ao ona faamautinoa e mātua Kerisiano a o leʻi papatiso a latou fanau?

“MO LE tele o masina, na ou fai i loʻu tamā ma loʻu tinā ua ou fia papatiso, ma na masani ona la talanoa mai ai. Sa la fia faamautinoa po ua ou iloa le tāua o laʻu filifiliga ua fai. O lea, iā Tesema 31, 1934, na faataunuu ai loa lenei mea e sili ona tāua i loʻu olaga.” O le faamatalaga lenā a Blossom Brandt i mea na tutupu ina ua filifili o ia e papatiso. O le faanaunauga foʻi lenā o mātua i aso nei, o le fesoasoani i a latou fanau e fai ni filifiliga atamai. O le tolopō po o le faatuatuai e aunoa ma se māfuaaga tatau o le papatisoga o a latou fanau, o le a mafai ona iai se aafiaga lē lelei i le itu faaleagaga o le tamaitiiti. (Iako. 4:17) A o leʻi papatiso le fanau, e ao ona faamautinoa e mātua o ē e iai le utaga mamao, ua nofosauni le fanau e talia le tiute tauave o le avea ma soo o Keriso.

2. (a) Aiseā ua popole ai nisi ovasia o matagaluega? (e) O le ā o le a iloiloina i lenei mataupu?

² Ua faaalia e nisi ovasia o matagaluega le popole, auā ua latou feiloaʻi i isi talavou ua lata po ua silia i le taʻi 20 o latou tausaga na ola aʻe i le upu moni, ae e leʻi papatiso lava. O le tele o taimi, e auai nei talavou i sauniga a le faapotopotoga ma faia se sao i le faiva. E latou te manatu foʻi o i latou o Molimau a Ieova. Ae foliga mai e iai lava le māfuaaga e latou te leʻi faia ai se tuuina atu iā Ieova ma papatiso. Faamata o le ā lenā māfuaaga? I nisi taimi, e faalaeiauina i latou e o latou mātua ina ia faatuai ona papatiso. I lenei mataupu o le a iloiloina ai popolega e fā ua taofia ai nisi mātua Kerisiano, mai i le fesoasoani atu i a latou fanau ia agaʻigaʻi i luma ma papatiso.

PO UA TALAFEAGAI LE MATUA O LAʻU TAMA?

3. O le ā le popolega sa iai i mātua o Blossom?

³ Na popole mātua o Blossom lea na taʻua i le amataga, po ua talafeagai lona matua e malamalama ai i le uiga ma le tāua o le papatisoga. E faapefea ona iloa e mātua po ua nofosauni o latou alo e faia se tuuina atu iā Ieova?

4. E faapefea ona aogā i mātua le poloaʻiga a Iesu o loo i le Mataio 28:19, 20 a o aʻoaʻo a latou fanau?

⁴ Faitau le Mataio 28:19, 20. E pei ona talanoaina i le mataupu ua mavae, e lē o taʻua i le Tusi Paia se tausaga faatulagaina e tatau ai ona papatiso se tasi. Peitaʻi, e aogā i mātua le mafaufau i le uiga o le faia o isi ma soo. O le upu Eleni ua faaliliuina ʻfai tagata ma soo’ i le Mataio 28:19, e uiga atu lea i le aʻoaʻo ma le faanaunauga ina ia maua ni tagata aʻoga, po o ni soo. O se tasi e avea ma soo e na te aʻoaʻoina ma malamalama i aʻoaʻoga a Iesu ma ia maumauaʻi e tausia. O lea, e tatau ona avea ma sini o mātua Kerisiano uma le aʻoaʻo o a latou fanau mai lava a o lāiti, ma le faanaunauga ina ia fesoasoani iā i latou e avea ma soo papatisoina o Keriso. O le mea moni e lē agavaa se pepe mo le papatisoga. Peitaʻi, ua faaalia i le Tusi Paia e oo lava i fanau iti e mafai ona malamalama ma talisapaia upu moni o le Tusi Paia.

5, 6. (a) O le ā ua tatou iloa e uiga i le papatisoga mai i le faamatalaga a le Tusi Paia e faatatau iā Timoteo? (e) O le ā le auala sili e fesoasoani ai mātua e iai le faautaga loloto i a latou fanau?

⁵ O Timoteo o se soo na faatāuaina le upu moni mai lava a o laʻitiiti. Na taʻua e le aposetolo o Paulo na aʻoaʻoina e Timoteo upu moni mai i le Tusi Paia a o laʻitiiti. E ui lava na ola aʻe o ia i se aiga e eseese tapuaʻiga, ae na ia atiaʻe le lototalisapaia mo Tusitusiga Paia ona o le fesoasoani a lona tinā ma le tinā o lona tinā, o ni tagata Iutaia. O le iʻuga, na mausalī lona faatuatua. (2 Timo. 1:5; 3:14, 15) E oo ane i le taimi ua latalata i le 20 tausaga o Timoteo pe sili atu foʻi, ua avea o ia o se soo o Keriso ma na tuuina atu i ai ni faaeaga faapitoa i le faapotopotoga.​—Galu. 16:1-3.

⁶ O le mea moni e eseese uma lava tamaiti. E eseese taimi e faatagata matua ai i le mafaufau tamaiti taʻitasi. O isi e malamalama i le upu moni, faia filifiliga atamai, ma faailoa mai e fia papatiso a o lāiti lava. Ae o isi atonu e faatoʻā nofosauni e papatiso pe a oo ina matutua teisi. O lea, e lē faamalosia ai e mātua e iai le faautaga loloto a latou fanau ina ia papatiso. Nai lo o lea, e latou te fesoasoani i fanau ina ia agaʻigaʻi i luma faaleagaga e fua i le tuputupu aʻe o tamaiti taʻitasi. E faafiafiaina mātua pe a gaoioi ma le atamai se tamaitiiti. (Faitau le Faataoto 27:11.) Ae ia manatua pea lo latou sini, ia avea a latou fanau ma soo o Keriso. O lea, e tatau i mātua ona iloilo le fesili lenei, ʻPo ua lava le malamalama o laʻu tama e faia ai se tuuina atu i le Atua ma papatisoina?’

PO UA LAVA LE MALAMALAMA O LAʻU TAMA?

7. Pe e manaʻomia ona malamalama auʻiliʻili se tasi i aʻoaʻoga uma a le Tusi Paia a o leʻi papatiso? Ia faamatala.

⁷ I le avea ai o mātua o ni faiaʻoga i totonu o le aiga, e latou te mananaʻo ia malamalama lelei a latou fanau i le upu moni, ina ia mafai ai ona latou faia se tuuina atu. Peitaʻi, e lē faapea ai e manaʻomia ona malamalama auʻiliʻili se tasi i aʻoaʻoga uma a le Tusi Paia, ona faatoʻā mafai lea ona ia faia se tuuina atu i le Atua ma papatiso. Pe a uma le papatisoga, e tatau i soo uma ona tuputupu aʻe pea i le poto saʻo. (Faitau le Kolose 1:9, 10.) O le ā la le tele o mea e manaʻomia ona malamalama i ai se tasi a o leʻi papatiso?

8, 9. O ā lesona e tatou te aʻoaʻoina mai i le tala e faatatau iā Paulo ma le leoleo o le falepuipui?

⁸ E mafai ona fesoasoani i mātua se mea na tupu i se aiga i le uluaʻi senituri. (Galu. 16:25-33) A o faagasolo le malaga faamisionare lona lua a Paulo pe tusa o le 50 T.A., na asiasi atu ai o ia i Filipi. A o iai i inā, na loka i laʻua ma lana aumea o Sila i le falepuipui ona o ni tuuaʻiga sesē. I le pō, na lūlūina ai faavae o le falepuipui ma matalatala ai faitotoʻa uma. O le fefe tele o le leoleo o le falepuipui ona o lona manatu ua sosola pagota, na ia taumafai ai e pule i lona ola. Peitaʻi, na alaga atu Paulo e taofi o ia mai i le faia o lenā gaoioiga. Na mafai e Paulo ma Sila ona avatu se molimau lelei i le leoleo o le falepuipui ma lona aiga. O le ā na uunaʻia i latou e fai ona o le talisapaia o upu moni na latou aʻoaʻoina e faatatau iā Iesu? Na papatiso i latou e aunoa ma le faatuai. O le ā ua tatou aʻoaʻoina mai i lenei mea?

⁹ Pe a fua i le aganuu a Roma, atonu o le leoleo o le falepuipui o se fitafita Roma ua litaea. E leʻi malamalama o ia i Tusitusiga Paia. O lea ina ia malamalama lelei i le poto saʻo i Tusitusiga Paia, na manaʻomia ona ia aʻoaʻoina upu moni faavae o le Tusi Paia, malamalama i le uiga o le avea ma auauna a le Atua, ma maumauaʻi e usiusitaʻi i aʻoaʻoga a Iesu. I lenā taimi puupuu, o lona malamalama ma le talisapaia o upu moni faavae o le Tusi Paia na uunaʻia ai o ia ina ia papatiso. E lē taumatea ina ua uma lona papatisoga, na faaauau pea ona ia tuputupu aʻe i le poto saʻo. Pe a mafaufau i lenā faaaʻoaʻoga, o le ā e mafai ona faia e se matua pe a faailoa mai e lona alo lona talisapaia moni o aʻoaʻoga faavae o le Tusi Paia, e aofia ai le uiga ma le tāua o le tuuina atu ma le papatisoga? E mafai e le matua ona faataga lona alo e talanoa atu i toeaina o le faapotopotoga, ina ia iloa ai po ua agavaa o ia mo le papatisoga.a I le pei o isi soo papatiso, o le a tuputupu aʻe pea lona poto e faatatau i le finagalo o Ieova a o faagasolo lona olaga atoa, e oo i le faavavau.​—Roma 11:33, 34.

O Ā AʻOAʻOGA E SILI ONA LELEI MO LAʻU TAMA?

10, 11. (a) O le ā le manatu o nisi mātua? (e) O le ā e tatau ona faamuamua e mātua?

¹⁰ E manatu nisi mātua e sili ona faatuai le papatisoga o o latou alo ina ia mafai ai ona auai i aʻoaʻoga maualuluga ma maua ni galuega lelei. Atonu o ni faanaunauga lelei, peitaʻi, po o le a fesoasoani i le fanau e taulau manuia moni ai? Ae o le fesili e sili ona tāua, pe e ōgatusa ma le Tusi Paia? O le ā le olaga o loo faalaeiauina i tatou e le Afioga a Ieova ina ia saʻilia?​—Faitau le Failauga 12:1.

¹¹ E tāua ona manatua e feteenaʻi lenei lalolagi ma mea uma o loo iai, ma mea e finagalo i ai Ieova. (Iako. 4:7, 8; 1 Ioa. 2:15-17; 5:19) O le puipuiga sili lava mo se tamaitiiti mai iā Satani, lana lalolagi, ma mafaufauga sesē o le lalolagi, o le iai lea o se faiā māfana ma Ieova. O le faatāua e mātua o sini o le lalolagi, e mafai ona lē mautonu ai le mafaufau o le tamaitiiti ma lamatia ai lona itu faaleagaga. Pe e mananaʻo moni lava mātua alolofa e taaʻina e lenei lalolagi le vaaiga a o latou alo e faatatau i se olaga e taulau manuia? O le mea moni, e tatou te maua le fiafia ma le taulau manuia moni pe a faamuamua Ieova i o tatou olaga.​—Faitau le Salamo 1:2, 3.

E FAAPEFEA PE A FAIA E LAʻU TAMA SE AGASALA?

12. Aiseā e lē mananaʻo ai isi mātua e vave ona papatiso o latou alo?

¹² Na faapea mai se tinā Kerisiano e tusa ai o māfuaaga e na te leʻi faalaeiau ai lana tama teine ina ia papatiso, “Ou te mā e taʻu atu o le māfuaaga autū ona o le faatulagaga o le faateʻaina.” E pei o lenā tuafafine, ua manatu nisi mātua e sili ona faatali lo la alo seʻi papatiso pe a teʻa ona uiga faatamaitiiti, ma ʻalofia ai le faia o ni gaoioiga sesē. (Kene. 8:21; Faata. 22:15) E latou te ono manatu, ʻAfai e lē papatiso laʻu tama, e lē mafai foʻi la ona faateʻaina o ia.’ Aiseā e sesē ai le manatu faapena?​—Iako. 1:22.

13. Pe afai e lē papatiso se tasi, po o lona uiga e lē tali atu o ia iā Ieova? Faamatala.

¹³ O le mea moni e lē mananaʻo mātua Kerisiano ina ia papatiso o latou alo ae e leʻi nofosauni e faia se tuuina atu iā Ieova. Peitaʻi, e sesē pe a manatu e faapea pe afai e lē papatiso le tamaitiiti, o le a lē tali atu la o ia iā Ieova e tusa ai ma lana amio. Aiseā? O le tali atu o se tasi iā Ieova e lē fua i lona papatiso pe leai. Nai lo o lea, e tali atu le tamaitiiti iā Ieova pe a ia iloa le mea saʻo ma le mea sesē i Lana silafaga. (Faitau le Iakopo 4:17.) O lea, nai lo o le faalotovaivaia o le tamaitiiti ia aua neʻi papatiso, e faia e mātua magafagafa taumafaiga uma ina ia faataatia se faaaʻoaʻoga lelei. E latou te mananaʻo e atiaʻe i le fanau mai lava a o lāiti le talisapaia moni mo tapulaa maualuluga tau amio a Ieova. (Luka 6:40) O lenā talisapaia moni o le puipuiga sili lea mo le fanau, ma uunaʻia ai i latou ina ia tumau pea i le ala amiotonu a Ieova.​—Isa. 35:8.

E MAFAI ONA FESOASOANI ISI

14. E faapefea ona lagolagoina e toeaina taumafaiga a mātua e fesoasoani i a latou fanau ina ia agaʻigaʻi i luma ma papatiso?

¹⁴ I le avea ai o toeaina i le faapotopotoga ma leoleo mamoe faaleagaga, e mafai ona latou lagolagoina taumafaiga a mātua e ala i le faia o faamatalaga lelei e faatatau i sini faaleagaga. E manatua e se tuafafine o lē na silia ma le 70 tausaga o auauna o se paeonia, la laʻua talanoaga ma le uso o Charles T. Russell i le ono o ona tausaga lea na iai se aafiaga tumau iā te ia. Na faapea mai lenei tuafafine, “E 15 minute na talanoa mai ai e faatatau i oʻu sini faaleagaga.” Ioe, e mafai ona iai ni aafiaga lelei o upu faalaeiau i le olaga atoa o se tasi. (Faata. 25:11) E mafai foʻi ona faaaofia e toeaina mātua ma a latou fanau i galuega e fai i Maota mo Sauniga, ma tuu atu i fanau galuega e talafeagai ma lo latou matutua ma tomai.

15. O ā nisi o auala e mafai ai e isi i le faapotopotoga ona faalaeiau i talavou?

¹⁵ E mafai ona fesoasoani sui o le faapotopotoga, e ala i le faaalia o le naunau moni i talavou. E aofia ai le mātaʻitū o ni faailoga e iloa ai o loo latou agaʻigaʻi i luma faaleagaga. Pe na faia e se talavou se tali e sau mai i le loto, pe faia foʻi sana vaega i le sauniga amata o le vaiaso? Pe na mafai e se talavou ona manumalo mai i se tofotofoga o le faamaoni, pe faaaogā foʻi se avanoa e molimau atu ai i le aʻoga? Ia vave ona e avatu se faamālō. Ae ā pe a fai ma ou sini le talanoa atu i se talavou a o leʻi amata po ua uma foʻi le sauniga, e faailoa atu ai lou naunau moni? O le faia faapea, e mafai ai ona lagona e talavou o i latou o se vaega “o le faapotopotoga tele.”​—Sala. 35:18.

FESOASOANI I LAU TAMA IA AGAʻIGAʻI I LUMA MA PAPATISOINA

16, 17. (a) E faapefea i le papatisoga ona aafia ai le lumanaʻi o se tasi? (e) O le ā le mea e sili ona faafiafiaina ai mātua? (Tagaʻi i le ata i luga aʻe o le matua.)

¹⁶ O le tausia aʻe o se tamaitiiti “i aʻoaʻiga ma apoapoaʻiga a Ieova,” o se tasi lea o faaeaga sili e mafai ona maua e se matua Kerisiano. (Efe. 6:4; Sala. 127:3) I le lē pei o tamaiti i le nuu o Isaraelu, e fananau mai fanau a mātua Kerisiano e lē o i latou o se vaega o tagata ua tuuina atu iā Ieova. E lē gata i lea, o le alofa i le Atua ma le naunau i le upu moni e lē o se mea e tuufaasolo atu i le fanau. E amata mai lava i le taimi e fanau mai ai le tamaitiiti, e tatau i mātua ona iai le faanaunauga ia fai o ia ma soo, e ala i le fesoasoani iā te ia e avea o se auauna tuuina atu ma papatisoina a Ieova. E leai se isi mea e sili atu ona tāua nai lo o lenā. O le tuuina atu, papatisoga, ma le auaunaga faamaoni a se tasi i le Atua, o le a ia maua ai le avanoa e faailogaina ai mo le faaolataga a o faagasolo le puapuaga tele.​—Mata. 24:13.

¹⁷ Ina ua fai le filifiliga a Blossom Brandt e fia papatiso, na mananaʻo ona mātua o ē e matataʻu i le Atua e faamautinoa ua nofosauni o ia mo lenei laasaga tāua o lona olaga. Ina ua la mautinoa, ona la lagolagoina lea o lana filifiliga. I le pō a o lumanaʻi le papatisoga o Blossom, na faia ai e lona tamā se gaoioiga na matuā pāʻia ai lona loto. Na faapea mai Blossom: “Na fai mai o ia e matou te tootutuli uma, ona ia faia lea o se tatalo. Na ia faapea atu iā Ieova ua matuā fiafia o ia i le filifiliga ua faia e si ona afafine laʻitiiti ina ia tuuina atu lona ola mo Ia.” I le silia ma le 60 tausaga mulimuli ane, ua faapea mai Blossom: “O le mea mautinoa a o faagasolo tausaga, e leʻi mafai ona ou faagaloina lenā pō!” Tau ina ia maua e outou mātua le olioli ma le faamalieina i le vaai atu, ua avea a outou fanau ma auauna tuuina atu ma papatisoina a Ieova.