Pusa Fesili

◼ O le ā le umi e tatau ona tatou suʻesuʻe ai ma se tagata suʻesuʻe o le Tusi Paia, o loo agaʻigaʻi i luma?

E lelei pe a faaauau ona suʻesuʻe ma se tagata suʻesuʻe o le Tusi Paia o loo agaʻigaʻi i luma, seʻia oo ina māeʻa tusi e lua—O ā Aʻoaʻoga Moni a le Tusi Paia? ma le ʻIa Faatumau iā te Outou i le Alofa o le Atua.’ E mafai ona faia faapea e tusa lava pe papatiso le tagata suʻesuʻe a o leʻi uma tusi e lua. Pe a uma ona papatiso, e mafai lava ona tatou lipoti le taimi, toe asiga, ma le suʻesuʻega. Pe afai foʻi e auai se tagata talaʻi i le suʻesuʻega ma fai sona sao, e mafai foʻi ona tau lona taimi.—Tagaʻi i La Tatou Faiva o le Mālō, o Oketopa 2010, itulau e 2.

E tāua i ē e fou ona iai se faavae lelei i le upu moni, a o leʻi faamuta a latou suʻesuʻega. E tatau ona latou “mauaa” iā Keriso ma “mausalī i le faatuatua,” ina ia tumau ai i tofotofoga e mautinoa o le a latou fesagaʻia. (Kolo. 2:6, 7; 2 Timo. 3:12; 1 Pete. 5:8, 9) E lē gata i lea, ina ia latou aʻoaʻo atu ma le uigā i isi, e tatau ona latou “maua le poto saʻo i le upu moni.” (1 Timo. 2:4) E ala i le suʻesuʻeina o tusi uma e lua ma a tatou tagata suʻesuʻe, ua tatou fesoasoani ai iā i latou ina ia tumau mausalī i “le auala e tau atu i le ola.”—Mata. 7:14.

A o leʻi faamaonia se tasi ina ia papatiso, e tatau i toeaina ona faamautinoa ua malamalama lelei lenā tagata i aʻoaʻoga faavae o le Tusi Paia, ma o loo ola e tusa ai ma na aʻoaʻoga. E tatau ona matuā faaeteete toeaina pe a iloiloina se tagata aʻoga e leʻi uma ona suʻesuʻe le tusi muamua. Pe afai e leʻi sauni se tasi mo le papatisoga, e faamautinoa e toeaina ua maua e lenā tagata se fesoasoani talafeagai, ina ia agavaa ai mo le papatisoga i le lumanaʻi.—Tagaʻi i le tusi Ia Faamaopoopo Ina ia Faia le Finagalo o Ieova, itulau e 217-218.

[Faamatalaga faaopoopo i le itulau 2]

E tāua i ē e fou ona iai se faavae lelei i le upu moni