O Ai le Suafa o le Atua?

Pe afai e te taumafai e iloa se tasi, o le mea muamua e te faia o le fesili i ai, “O ai lou igoa?” Pe afai e te fesili i le Atua i lenā fesili, faamata o le ā lana tali?

“O aʻu o Ieova. O loʻu igoa lea.”—Isaia 42:8.

Pe e fou iā te oe lenā suafa? Atonu e fou iā te oe, ona ua seāseā toe faaaogā e le toʻatele o tagata o loo faaliliuina le Tusi Paia le suafa o le Atua. E masani ona latou suia le suafa o le Atua i le faalupega “ALII.” Peitaʻi, e pe ā ma le 7,000 taimi na aliaʻe mai ai le suafa o le Atua i uluaʻi gagana na tusia ai le Tusi Paia. O lenā suafa e aofia ai konesane faa-Eperu e fā lea ua faaliliuina i le YHWH po o le JHVH, ma ua faaliliuina i le “Ieova” i le gagana Samoa.

O loo i tusitusiga Eperu ma le tele o isi faaliliuga le suafa o le Atua

AISEĀ E TAUĀ AI LE SUAFA O LE ATUA?

E tāua lenei suafa i le Atua lava ia. E leai se tasi na faaigoaina le Atua, ae na ia filifili se igoa mo ia lava. Na fetalai Ieova: “O loʻu igoa lenā e faavavau, e manatua ai aʻu i lea tupulaga ma lea tupulaga.” (Esoto 3:15) I le Tusi Paia, e sili atu taimi o loo taʻua ai le suafa o Ieova nai lo o ana faalupega e pei o Lē e ona le malosi uma lava, Tamā, Alii po o le Atua. E sili atu foʻi taimi o loo taʻua ai nai lo o isi igoa e pei o Aperaamo, Mose, Tavita ma Iesu. E lē gata i lea, e finagalo le Atua ia faalauiloa lona suafa. Ua faapea mai le Tusi Paia: “Tau ina ia iloa e tagata o oe e ou le suafa o Ieova, e na o oe lava o Lē e Silisili Ese i le lalolagi uma.”—Salamo 83:18.

E tāua lenei suafa iā Iesu. I le tatalo a le Alii, na aʻoaʻo e Iesu ona soo ia talosaga atu i le Atua i upu nei: “Ia faapaiaina lou suafa.” (Mataio 6:9) Na tatalo foʻi Iesu e faapea: “Loʻu Tamā e, ia faamamaluina lou suafa.” (Ioane 12:28) Na avea le faamamaluina e Iesu o le suafa o le Atua ma mea e sili ona tāua i lona olaga ma o le māfuaaga lea na ia tatalo ai e faapea: “Ua ou faailoa atu lou suafa iā i latou, ma saga faailoa atu.”—Ioane 17:26.

E tāua lenei suafa iā i latou e iloa le Atua. Na malamalama tagata i aso ua mavae na iai le fesootaʻiga o le suafa tutasi o le Atua i lo latou puipuiga ma le faasaoina. “O le suafa o Ieova o le ʻolo malosi lea. E sola atu i ai o lē e amiotonu ma maua ai le puipuiga.” (Faataoto 18:10) ʻE faaolaina i latou uma o ē e valaau i le suafa o Ieova.’ (Ioelu 2:32) Ua faailoa mai i le Tusi Paia, o le suafa o le Atua o le a iloa ai le eseesega o i latou e auauna iā te ia. “Auā e taʻitasi nuu uma ma savavali i le igoa o lona atua, ae e tatou te savavali i le suafa o Ieova lo tatou Atua e faavavau, faavavau lava.”—Mika 4:5; Galuega 15:14.

O LE Ā UA FAAILOA MAI E LENEI SUAFA?

E na o le Atua e mātaulia i lenei suafa. E toʻatele tagata atamamai ua faapea mai, o le uiga o le suafa o le Atua “E Gaoioi o Ia e Tusa ma Tulaga Manaʻomia.” Na faamalamalama mai e Ieova le uiga o lona suafa, ina ua ia faasino atu iā te ia lava i upu o loo taʻua e Mose: “E Avea Aʻu ma Lē Ou te Loto i Ai.” (Esoto 3:14) O le suafa o le Atua ua faailoa mai ai isi mea e sili atu nai lo o le avea ma Lē na foafoaina mea. Ua faailoa atili mai e lona suafa le mafai ona ia faapogaia o ia lava, faapea ana foafoaga ina ia avea ma so o se mea e manaʻomia, ina ia faataunuu ai lona finagalo. E ui lava o loo faamatala e faalupega le tulaga, pule, po o le mana o le Atua, ae e na o lona suafa o Ieova e mafai ona mātaulia ai o ia ma mea e mafai ona ia faia.

Ua faailoa mai e le suafa o le Atua lona naunau iā i tatou. Ua faailoa mai e le uiga o le suafa o le Atua lona alofa faaauau i ana foafoaga e aofia ai ma i tatou. E lē gata i lea, ua faailoa mai ai e na te finagalo ia tatou iloa o ia. Na ia muaʻi faailoa mai lona suafa a o tatou leʻi talosaga atu. Ua manino mai, o lona finagalo ia tatou iloa o ia o Sē e mafai moni ona tatou faalatalata atu i ai, nai lo o se atua e tatou te lē malamalama ai po o loo iai foʻi i se nofoaga mamao.—Salamo 73:28.

O le faaaogāina o le suafa o le Atua e faaalia ai lo tatou naunau mo ia. O se faataʻitaʻiga, atonu e te fai atu i se tasi e te manaʻo e avea ma au uō e faaaogā lou igoa. O ā ni ou faalogona pe a faaauau ona musu o ia e faaaogā lou igoa? A o faagasolo taimi, atonu e te mafaufau pe faamata e manaʻo moni lenā tagata e avea ma au uō. E faapena foʻi le Atua. Ua faailoa mai e Ieova lona suafa i tagata, ma ua ia faalaeiau i tatou ina ia faaaogā lona suafa. O le faia faapea, e faailoa atu ai e tatou te mananaʻo e faalatalata atu iā te ia ma e na te silafia “ē e manatunatu loloto i [pe “faatāua”] lona suafa.”—Malaki 3:16, fpl.

O le aʻoaʻoina o le suafa o le Atua o le laasaga tāua lea i le iloaina o ia. E lē gata i lea, e tatau foʻi ona tatou aʻoaʻoina po o ā ona uiga.