Suafa O Le Atua

O ai le suafa o le Atua?

TALA A NISI TAGATA

E talitonu le toʻatele o ē ua faapea mai o Kerisiano, o le suafa o le Atua o Iesu. O isi ua faapea mai talu ai e na o le toʻatasi le Atua o Lē e ona le malosi uma lava, e lē manaʻomia la ona faaaogā se suafa totino e faasino atu iā te ia. Ae ua finau mai pea isi e lē talafeagai ona faaaogā se suafa mo le Atua.

LE MANATU O LE TUSI PAIA

E lē o Iesu le suafa o le Atua e ona le malosi uma lava, ona e lē o ia o le Atua o Lē e ona le malosi uma lava. O le mea moni na aʻoaʻoina e Iesu isi tagata tapuaʻi e tatalo atu i le Atua e faapea: “Lo matou Tamā e, ia faapaiaina lou suafa.” (Luka 11:2) Na tatalo foʻi Iesu i le Atua e faapea: “Loʻu Tamā e, ia faamamaluina lou suafa.”​—Ioane 12:28.

I le Tusi Paia, o le Atua lava ia na fetalai: “O aʻu o Ieova. O loʻu igoa lea; ou te lē avatua loʻu mamalu i se tasi.” (Isaia 42:8) O le taʻu “Ieova” e maua mai i le faaliliuga faa-Peretania o konesane Eperu e fā o le YHWH, lea e faaāta mai ai le suafa o le Atua. E pe ā ma le 7,000 taimi e aliaʻe mai ai lenā suafa i Tusitusiga Paia Eperu po o le Feagaiga Tuai.a E sili atu nai lo o taimi e aliaʻe mai ai isi faalupega e pei o le “Atua,” “Lē e ona le malosi uma lava,” po o le “Alii,” ma e sili atu taimi e aliaʻe mai ai nai lo o se isi lava igoa e pei o Aperaamo, Mose, po o Tavita.

E leai se vaega o le Tusi Paia o loo faasā ai e Ieova ona faaaogā lona suafa i se auala faaaloalo. Nai lo o lea, o loo faaalia i le Tusi Paia na saʻoloto le faaaogāina e auauna a le Atua o Lona suafa. Na latou faaaogā i igoa sa faaigoa ai a latou fanau, e pei o Elia, o lona uiga “O Loʻu Atua o Ieova,” ma Sakaria, o lona uiga “Ua Manatua e Ieova.” E latou te leʻi faatalatū foʻi e faaaogā le suafa o le Atua i a latou talanoaga i aso taʻitasi.​—Ruta 2:4.

E finagalo le Atua e tatou te faaaogā lona suafa. Ua faalaeiauina i tatou ia “faafetai atu iā Ieova, ia valaau atu i lona suafa.” (Salamo 105:1) E finagalo malie foʻi o ia iā i latou “e manatunatu i lona suafa.”​—Malaki 3:16.

O le ā le uiga o le suafa o le Atua?

E talitonu nisi faitofā o le uiga o le suafa o Ieova i le gagana Eperu, “E Gaoioi o Ia e Tusa ai ma Tulaga Manaʻomia.” Ua faaalia ai e mafai e le Atua ona avea o ia lava pe faapogaia ana foafoaga ina ia avea ma so o se tulaga e manaʻomia, ina ia faataunuu ai lona finagalo. E na o Lē e ona le malosi uma lava na foafoaina mea e mafai ona ola e ōgatusa ma lenā igoa.

LE AOGĀ MO OE

O le iloaina o le suafa o le Atua o le a suia ai le auala e te mafaufau ai iā te ia. O le a faigofie ai ona e mafuta vavalalata atu iā te ia. Auā e faapefea ona e vavalalata i se tasi e te lē iloa le igoa? O le mea moni, o le faailoa mai e le Atua o lona suafa iā te oe, ua faaalia ai e finagalo o ia ina ia e mafuta vavalalata atu iā te ia.​—Iakopo 4:8.

E mafai ona e mautinoa e gaoioi Ieova e ōgatusa ma lona igoa, i le avea ai o ia ma Atua e faataunuuina i taimi uma ana folafolaga. O le māfuaaga lenā ua faapea mai ai le Tusi Paia: “E faatuatua iā te oe o ē e iloa lou suafa.” (Salamo 9:10) E te atiaʻe lenā faatuatua a o e aʻoaʻoina e faapea, e gaoioi Ieova e tusa ai ma tulaga e manaʻomia ona e uunaʻia e ona uiga e pei o le alofa faamaoni, alofa mutimutivale, alofa fua, ma le faamasinotonu. (Esoto 34:5-7) Maʻeu le faamāfanafanaloto o le iloaina e tausisi Ieova i ana folafolaga i taimi uma, ae i le taimi e tasi e gaoioi e ōgatusa ai ma ona uiga!

Ua manino mai la, o se faaeaga le iloaina o le suafa o le Atua o Lē e ona le malosi uma lava. E mafai ai ona e maua faamanuiaga i le taimi lenei ma le lumanaʻi. Ua folafola mai e le Atua: “Ou te puipuia foʻi o ia ona ua ia iloa loʻu igoa.”​—Salamo 91:14.

ʻE faaolaina i latou uma o ē e valaau i le suafa o Ieova.’​—Ioelu 2:32.