Le Auala E te Iloa ai le Atua i Lona Suafa

NA MAUA e se tusitala o se nusipepa se tusi mai i se tasi e faitau i lana nusipepa e faapea: “I loʻu olaga atoa, ou te manatunatu pea i le fesili lenei, ma ou te faamoemoe o le a mafai ona e taliina. O ai le suafa o le Atua? Ua fai mai tagata Iutaia ua mou atu le suafa moni o le Atua i le faagasologa o le taimi. Ua faaigoa o ia o Iesu e tagata Kerisiano. Ae o tagata Musalimi, ua latou taʻu o Ia o Alā. . . . O lea la, o ai ea lona suafa?” Na lolomiina i le nusipepa lea fesili faatasi ai ma le tali e faapea: “E tusa ai ma aʻoaʻoga Eperu anamua, o le Atua e aoao lona mana, ma ona o lea, ua lē lava se suafa e tasi e faasuafaina ai o Ia. Ae, ou te taʻutino atu iā te oe, o le a tali mai o Ia (po o Ia o se alii po o se tamaʻitaʻi) i so o se suafa e te taʻu ai o Ia i lou faaaloalo e tatau ai.”

O lea uiga o le lē manatu mamafa e tusa ai ma le suafa o le Atua o se tulaga ua taatele i nei aso. E toʻatele i latou e talitonu i le Tusi Paia e faalēano lava i le suafa o le Atua, e ui o i latou o ni tagata e ano i tapuaʻiga. Ae o le ā le finagalo o le Atua e tusa ai o lea tulaga? Pe o se mataupu e faatauvaa iā te ia?

E Lē o se Mataupu Faatauvaa

Seʻi manatu mai foʻi i le mea moni lea e faapea, e faitau afe taimi o loo taʻua ai le suafa o Ieova i le Tusi Paia. I le faaliliuga New World Translation of the Holy Scriptures, e 7,210 taimi o loo taʻua ai le suafa o le Atua!a O Ieova lava ia na faagaeeina i latou na tusia le Tusi Paia e faamatilatila le faaaogāina o lona suafa. O le faisalamo o Asafo, o se tasi na tusia le Tusi Paia, na ia faapea mai: “O oe, e ou le suafa o Ieova, na o oe lava o le Silisili ese i le lalolagi uma.” (Salamo 83:18) Na tusi foʻi faapea Tavita i se salamo: “Ua tatou taʻutaʻu le suafa o Ieova lo tatou Atua.”—Salamo 20:7.

Ua faaalia mai i le Tusi Paia e faapea o loo suʻesuʻe Ieova le Atua i o tatou loto ina ia ona silafia po o le ā lo tatou lagona e tusa ai ma lona suafa. Fai mai le faisalamo: “Pe afai ua matou faagalogalo i le suafa o lo matou Atua, . . . e lē suʻesuʻe ea lenei mea e le Atua? auā o ia lava na te silafia mea lilo o i le loto.” (Salamo 44:20, 21) Na tusi mai foʻi le perofeta o Isaia: “Ia outou vivii atu iā Ieova, inā valaau atu ia i lona suafa; ia outou faailoa atu i nuu o ana galuega; ia outou taʻutaʻu atu ua viia lona suafa.”—Isaia 12:4.

O le Atua lava ia na fetalai mai: “Latou te iloa ai o Ieova o loʻu igoa lea.” (Ieremia 16:21) Na ia folafola mai foʻi e faapea: “Ou te faapaiaina loʻu igoa mamalu ua taʻuvaleina i nuu ese, . . . e iloa ai foʻi e nuu ese o aʻu lava o Ieova.” (Esekielu 36:23) O nisi o nei fetalaiga o loo faasino atu i le taimi o le a gaoioi ai Ieova i lona toʻasā faasaga iā i latou o ē e lē migao i lona suafa. E lē o se mataupu māmā la iā Ieova le tulaga e tusa ai ma lona suafa.

E Lē o Mamao Ieova le Atua Mai iā te Outou

E mafai faapefea ona e iloaina le Atua i lona suafa? O le ā le uiga o le iloaina o le Atua i lona suafa? Ua faapea mai le Tusi Paia: “E faatuatua iā te oe o ē ua iloa lou suafa.” (Salamo 9:10) Ua manino mai la, e tele atu isi mea e aofia ai i lenei iloa, na i lo o le tau ina iloa o lona suafa. E ao ona e faatuatua iā te ia. O lona uiga, ia e faamasani i le ituaiga o Atua e iai o ia ma ia e iloa ona uiga ma ona manatu. O le a uunaʻia ai oe e te faatuatua iā te ia.

Ua na o le faitauina ma le suʻesuʻeina ma le faamaoni o le Tusi Paia o le a mafai ai ona e maua le malamalamaga i le ituaiga o Atua e iai Ieova. Ua ia folafola mai lona puipuia o i latou e faaalia le alofa mo ia ma lona suafa. Ua fetalai mai Ieova e faatatau iā i latou e faia lea tulaga e faapea: “Ona ua naunau mai o ia iā te aʻu, o le mea lea ou te faaolaina ai o ia; ou te faamamalu iā te ia ona ua iloa e ia loʻu igoa. E valaau mai o ia iā te aʻu, ona ou tali atu ai lea iā te ia; o aʻu, ou te iā te ia i le puapuaga; ou te laveaʻiina o ia, ma ou faatupuina lona mamalu. O le olaga faafualoa e malie ai o ia iā te aʻu; ou te faaali atu foʻi iā te ia laʻu faaolataga.”—Salamo 91:14-16.

Maʻeu le manaia o se faiā lelei ua iai i le va o Ieova le Atua ma i latou o ē e iloaina o ia i lona suafa! E mafai foʻi ona e maua se faiā faapena ma ia. Aua e te faatalatū e taʻua lona suafa i au talosaga atu iā te ia mai lou loto. O le a tali mai o ia, auā ua faapea mai le Tusi Paia, “e lē mamao o ia ma i tatou taʻitoʻatasi.”—Galuega 17:27.

[Faaopoopoga i lalo]

[Pusa/Ata i le itulau 11]

E Silafia Oe e le Atua i Lou Lava Igoa

Na fetalai atu le Atua iā Mose: “Ua ou iloa oe i lou lava igoa.” (Esoto 33:12) O le tala lauiloa e faatatau i le afi mumū i totonu o le laau talatala, ua faamaonia maia lea tulaga. Ua faamatala mai e le Tusi Paia e faapea na “valaau mai lea o le Atua iā te ia nai totonu o le laau talatala, ua fetalai mai, Mose, Mose e!” (Esoto 3:4) E lē na o le pau ai lea o se taimi na fetalai atu ai le Atua i se tagata ma taʻua lona igoa, e tele foʻi isi taimi na ia faia ai faapea. Ua manino mai ai o loo naunau mai Lē na Faia le vateatea aoao iā i tatou taʻitoʻatasi.

Ua taʻu mai e le Tusi Paia e faapea e silafia e le Atua igoa o le faitau piliona o fetu taʻitasi. (Isaia 40:26) Pe e lē sili atu ea la lona naunau mai i tagata o ē e tapuaʻi iā te ia? Na tusi le aposetolo o Paulo e faapea: “Ua silafia e le Alii ona lava tagata.” (2 Timoteo 2:19) E sili atu le mea e uiga i ai lona silafia na i lo le na o le manatua o igoa. Ua silafia lelei e le Atua ona tagata tapuaʻi. E ao foʻi la iā i tatou ona iloa le Atua i lona suafa ma ia malamalama lelei i ona uiga.

O loo taʻua i le tusi mulimuli o le Tusi Paia se tusi faafaatusa o loo tusia ai e le Atua suafa o i latou uma ua tapuaʻi iā te ia i le talafaasolopito atoa o tagata. Ua taʻua lenei tusi o le “tusi o le ola,” auā o le a foaʻiina atu e Ieova le Atua le ola e faavavau iā i latou ua tusia ai o latou igoa. (Faaaliga 17:8) O se faamoemoe matagofie lenei mo i latou ua iloaina le Atua i lona suafa.

[Pusa/Ata i le itulau 12]

Na Latou Faalauiloa le Suafa o le Atua

● O le pese a Mose a o toetoe lava ulu atu Isaraelu i le Nuu Folafolaina: “Ou te valaau atu i le suafa o Ieova.”—Teuteronome 32:3.

● O upu a Tavita i le tagata tinoese o Koliata: “Ou te alu atu iā te oe i le suafa o Ieova o ʻau.”—1 Samuelu 17:45.

● O upu a Iopu ina ua leiloa uma ana mea totino ma ua faafuaseʻi ona maliliu uma lana fanau: “Ia faamanuina le suafa o Ieova.”—Iopu 1:21.

● Na faapea mai le perofeta o Ioelu: “E iʻu foʻi ina faaolaina o i latou uma lava o ē valaau atu i le suafa o Ieova.”—Ioelu 2:32.

● O upu a le perofeta o Isaia: “Ia outou vivii atu iā Ieova, inā valaau atu ia i lona suafa; . . . ia outou taʻutaʻu atu ua viia lona suafa.”—Isaia 12:4.

● Na aʻoaʻo atu Iesu Keriso i ona soo ia tatalo: “O lenei, ia faapea outou ona tatalo, Lo matou Tamā e, o i le lagi, Ia paia lou suafa.”—Mataio 6:9, 10.

● Na tatalo atu Iesu i le Atua: “Ua ou faaali atu lou suafa.”—Ioane 17:6.

● Na fetalai atu le Atua i ona tagata: “O aʻu o Ieova, o loʻu igoa lea; o loʻu mamalu foʻi ou te lē avatua lea i se tasi.”—Isaia 42:8.