Fesoasoani i Aiga i la Tatou Oganuu e Maua le Fiafiaga
1 O aiga e faatatauina mataupu silisili o le Tusi Paia ma atiina aʻe o latou olaga i le Malo o le Atua ua latou iloa le faaitiitia o ō latou faafitauli, pe afai e lē foia, ma ua ausia ai le fiafiaga. Pe lē o se feau matagofie lenei e faaoo atu i aiga i la tatou oganuu i le masina o Iuni, faaaogāina ai le tusi Faia o Lou Olaga Faaleaiga ia Fiafia?
TAULIMAINA LE TUSI AIGA FIAFIA
2 O le a faapefea ona tatou faia lenei? I le tataʻia lea o ō latou manatu i le Afioga a le Atua, lena o loo faataatia mai ai mataupu silisili mo le olaga faaleaiga fiafia. O loo i ai i mafaufau o tagata le olaga faaleaiga. Ia tofa malie e talanoa faatatau i ai. Faailoa ia i latou pe mafai faapefea ona fesoasoani le tusi ia i latou i le faasinoina o i latou i le fautuaga atamai mai le Atua, o Lē Na Foafoaina le aiga. (2 Timo. 3:16) Ae faasino foi i ai faapea o le a lē mafai ona foia atoatoa faafitauli o le olaga faaleaiga seia aveesea uma e le Malo o le Atua le amioleaga mai le lalolagi. O le mea lena o loo tatalo i ai tagata pe a latou taʻua le Tatalo a le Alii, ae o le toatele o i latou e lē manino i ai. (Mata. 6:9, 10) E mafai e le mataupu faaiʻu o le tusi ona fesoasoani ia i latou e sapaitalia lenei mea moni.
3 Ioe, a ē talanoa i tagata e uiga i faafitauli o le olaga faaleaiga, e te manao e faautauta. Alofia le faia o faaupuga e te manatu ai faapea o loo iai i lē ona le fale ni faafitauli i lona aiga. O le a lelei ona faasino i le faafitauli o loo faapea ona i ai i le sosaiete lautele.
4 E te ono amataina i lenei auala: “O loo ou asiasi mai e fetufaai ma oe sina faamatalaga e uiga i se faafitauli ua afaina ai le toatele o le lalolagi i aso nei. E aafia ai le olaga faaleaiga. O i tatou uma lava e mananao i o tatou aiga ia fiafia, peitai ua tatou iloa e anoanoai aiga e lē o fiafia moni. O le ā sou taofi o le a fesoasoani i tagata e mauaina le fiafiaga sili i o latou olaga faaleaiga? [Tuu ia i latou e tali mai.] Faamata e te lē ioe faapea o le a aogā le faalogo i le mea ua fetalai mai ai Lē Na Foafoaina le aiga? Ua ia faataatia taiala manaomia i le Tusi Paia. [Faitau 2 Timo. 3:16] O ia mataupu silisili ua talanoaina i lenei tusi Faia o Lou Olaga Faaleaiga ia Fiafia. Matau vala o le mataupu ua talanoaina. [Faaali le faasologa o mea o loo i ai.] O loo faasino foi le tusi i le vaifofo e faavavau o faafitauli o le fanau a tagata. E lē taumatea o loo e tatalo mo lea. E te masani ma le Tatalo a le Alii, a ea? [Sii le Mataio 6:9, 10.] O le finagalo o le Atua e faapea o le a aveesea e lona malo amioleaga uma mai lenei lalolagi. Ua folasia e le mataupu faaiʻu o lenei tusi le faapefea i le olaga faaleaiga o tagata uma o ē tuu nei lo latou faatuatua i le malo o le Atua ona manuia ai.” Ona ofo lea o le tusi i se faavae faameaalofa atoa.
TALANOA I LE AIGA ATOA
5 O le a lelei ona fai ma o tatou sini le talanoa ma le toatele o aiga potopoto e mafai ai i le masina o Iuni. Taofi lenei i le mafaufau a o e faataatia le faavae mo lau toe asiga. Pe a maeʻa le talanoaga i lau uluai asiasiga, e te ono faapea atu: “Talu ai matou te naunau e talanoaina le Tusi Paia ma aiga, ou te fiafia e toe foi mai i se taimi e i ai uma le isi vaega o lou aiga i le fale e faaauau la tatou talanoaga. [Fesili po o le ā le taimi e avanoa i tagata uma.] I lenei taimi, atonu e te manao e tagatagai i le tusi, ma pe a ou toe foi mai e mafai ona tatou talanoaina le mataupu e sili ona tosina ia te oe ma lou aiga.”
6 Matou te mautinoa o le a outou ioe faapea o le a fesoasoani tele lenei lomiga i aiga i lau tou oganuu. O lea, a o ē taumafai e faia soʻo, manatunatu i le tulaga o le fesoasoani i le aiga atoa. Fesoasoani ia i latou e vaai totoa i le aogā o le feau o le Malo ina ia mafai ai ona latou saosaolaumea faatasi i faamanuiaga o le lumanai.—Faaa. 21:4.