Faafoeina Suesuega Faale-Tusi Paia Uigā Faaleaiga
1 O se tasi o gaoioiga e sili ona tāua o loo faatautaia e mātua o le aʻoaʻoina o a latou fanau i le upu moni. O se matafaioi lea mai ia Ieova. (Teu. 6:6, 7) E manaomia e fanau faatonuga ma ni taʻiala e savavali ai ma le tonu i se lalolagi faalemataʻu. E manaomia ona aʻoaʻoina i latou ia alolofa ia Ieova ma le upu moni ma ia maumauai e pipii i ai. Ua taʻua i Le Olomatamata, Aokuso 1, 1989, itulau 22: “E ui lava i so o se isi avega tauave o ia te oe po o faalavelave o tou faafeagai, a e tatau lava ona faamuamua le faaalu o se taimi [ma] lau fanau. O le taimi ua faaluina faatasi ma i latou o le a mafai ai ona e tamau mea tāua faaleagaga na o le a puipuimaluina loto o lau fanau ma taʻitaʻi ai i latou i le ala saʻo.”
2 Afai e mulimuli aiga i taʻiala ua aumai i le Afioga a le Atua, e tatau la ona faataatia ese e lē aunoa se taimi mo le suesuega faaleaiga. E manaomia i ulu o aiga ona avatu le faamuamua mo le tausiga faaleagaga o le aiga. Afai e lē o avatua nei le uaʻi totoʻa i manaoga faaleagaga, atonu la o le a fesagaʻi mātua ma ni faafitauli matuiā i le lumanai.
AUALA MA MEA E SUESUE
3 O le ā e ao ona suesue? Ua iai le ulu o le aiga i se tulaga e sili ona lelei e iloaina ai mea o loo manaomia e le aiga. E mafai ona ia fesilisili i mea e manatu i ai isi e aogā ma iloiloina a latou faufautuaga. O le a aogā ma faamalosiau le suesuega faaleaiga pe a fetuutuunai. E toatele aiga ua filifili e sauniuni le lesona faalevaiaso i Le Olomatamata. Peitai, atonu e tatau i nisi taimi ona talanoaina mataupu patino e ufitia ai faafitauli o loo fesagaʻi ma talavou i aʻoga. E mafai ona iloilo faamatalaga ua lomia e feagai ma tuugatala, gaoioiga faaopoopo, taaloga, ma taaʻiga lē mamā i se auala e atiina aʻe ai, ma faalaeiau. E tāua i le ulu o le aiga ona faaauau le toe auiliiliina po o ā faamatalaga e manaomia e le aiga ma se auala e sili ona lelei e faaoo ai i o latou loto ia mea.—Vaai Le Olomatamata faa-Peretania, Fepuari 15, 1871, itulau 105-106.
4 E ao faapefea ona faafoeina se suesuega? Ia galueaina se siomaga saoloto ae ia faaaloalo. Alofia le tau ina fai, po o le soona sasalu. Fai ni fesili faaopoopo, ma faaaogā faataʻitaʻiga e saveu ai mafaufauga ma faaaofia ai tagata uma. Ina ia faalauteleina le mataupu, e mafai ona faaaogā ata e pei o faafanua ma ata tusi. E mafai ona avatu tofiga e saili mai se mataupu i le Index pe i tusi o le Insight, e tusa ma tausaga ma tomai o le fanau. Aumai fanau laiti i le talanoaga i le taimi lava e mafai ai ona fai atu se tali. E mafai ona siligia i latou i fesili faigofie e manaomia ona tali mai i nai upu. Aua lē faaaogāina taimi o suesuega e otegia ai fanau. Na i lo lea, faamalo ia i latou, faaalia le talisapaia mo a latou taumafaiga, ma naunau e fetufaai manatu faaleagaga ma i latou.
5 E mafai faapefea ona e mautinoa ua e pāʻia le loto? Faalaeiau tagata uma e faaupu mai tali i a latou lava upu. Faaaogā ma le faautauta fesili faatupu manatu e faamautinoa ai uiga o le loto. E mafai ona e fesili: “E faapeī lagona o tamaiti aʻoga e uiga i lenei mataupu? E tou te tau masalosalo ea i lenei manatu?” Ia faaeteete aua lē soona faaseā i tali e aumaia e le fanau i fesili faatupu manatu, auā atonu o le a lē saoloto ai lau fanau e faaleoina mai i latou lava ma le faamaoni. Avatu ia i latou le avanoa e tautala ai. O lo latou iloaina e te naunau ia te i latou ma o latou faafitauli o le a faafaigofie ai au taumafaiga e aʻoaʻo atu.—Vaai Le Olomatamata, Aokuso 1, 1987, itulau 23-25.
6 Teu i manatu o le faamoemoe autū o la outou suesuega faaleaiga o le aʻoaʻoina lea o manatu o Ieova ae lē tau o le sailia o tali e faamalau i le sauniga a le faapaotopotoga. (Efe. 3: 17-19) O lona uiga ia galue e molioo faamatalaga i le loto. Avatu i le aiga mafuaaga e ao ai ona latou mananao e faia le finagalo o le Atua ma le pogai e sili ai ona lelei lena auala i le olaga.
7 E manaomia suesuega faale-Tusi Paia faaleaiga faifai pea mo le atiina aʻe o le tulaga faaleagaga o le aiga. E toleniina ai ma faaauupegaina fanau e faafetaiaia faafitauli o le olaga. Mātua e, ua tou iai i se tulaga e sili ona lelei e fesoasoani ai i a outou fanau. Ia talia lenei avega tauave mai le Atua. E mautinoa o le a faamanuiaina oe e Ieova pe afai e te faia taumafaiga uma ia faaauau ai le faafoeina o se suesuega faale-Tusi Paia uigā faaleaiga.