Ua Aʻoaʻoina e Ieova
1 Na folafola e le perofeta o Isaia: “Ua foai mai ia te au e le Alii o Ieova le laulaufaiva o e ua aʻoaʻoina, ina ia ou iloa ona faamafanafana i se upu le ua tigaina.” (Isaia 50:4) O se tasi o auala ua faia ai e Ieova lenei mea e ala lea i toleniga ua saunia i le Aʻoga o le Faiva Faatiokarate. E ui i lea, e manaomia pea, se taumafaiga a tagata taitoatasi. Ua saunia e le Theocratic Ministry School Guidebook i le itulau e 39 lenei taofi: “Tusa lava po o le ā le tele o taimi e te taulimaina ai sea ituaiga o tofiga, e tāua pea se sauniuniga.” E faatatau lenei ia i tatou uma lava, pe faatoʻā tatou iai i le aʻoga mo ni nai masina pe talu mai ona amata le aʻoga i le 1943.
2 O tagata aʻoga uma lava e ao ona sauniuni maeʻaeʻa. E aofia ai i lenei le tausisi i le taimi. Ua taʻua i faatonuga i le Faasologa o le Aʻoga o le Faiva Faatiokarate: “E leai se lauga e tatau ona ova taimi.” Afai e ovataimi soo le uso e taulimaina le Tofiga Nu. 1, e ao ona avatu i ai se fautuaga na o ia. E tatau foi i le ovasia o le aʻoga ona amata le sauniga i le taimi tonu ma matau faatonuga e uiga i le taimi atofaina mo ana fautuaga ma manatu. Faamolemole ia matau ua faaaogāina le faaopoopoga o le tusi “All Scripture” lea ua toe lomia i le 1990.
3 E mafai e tagata uma lava ona maua aogā mai le vaega o mea tāua o le Tusi Paia. Ua toe fafagu mai ia i tatou faapea o ia manatu e ao ona lē tau o se autaluga o mataupu ua tofia. E tatau i le failauga ona fesoasoani i le aofia e talisapaia pe aiseā ma e faapefea ona aogā faamatalaga ia i tatou.
4 I le Lauga Nu. 3, e tele faatulagana ua faaaogā ma e taulau eseese. Ae a teu i manatu o se tasi o fuafuaga autū o le aʻoga, ina ia fesoasoani ia i tatou e taulimaina saʻo ma manino le upu moni, ua sili ai la faatulagana e aafia ai le auaunaga i le fanua po o le molimau lē fuafuaina.
5 Lauga Nu. 4, a aumaia mai le faasologa o le tusi Your Youth—Getting the Best out of It i Le Olomatamata, o le a faapitoa ona tofia i tagata aʻoga fou po o talavou. A ia iloa, e ao i tagata aʻoga ua tofia i ai ona mafai ona faitau. O le a auauai nei lauga i vaiaso taitasi uma ma se taulimaga mai le tamaʻi tusi Mataupu o le Tusi Paia mo Talanoaga. I le Lauga Nu. 3 ma le Lauga Nu. 4, e ao i le tagata aʻoga ona faaaogā le matua ua faaalia.
6 E manaomia le faaeteete pe afai e faaaogāina ni manatu faaopoopo. O nisi o mataupu ua tofia atonu e na o se tasi pe lua ni palakalafa e aafia ai. Ae e mafai lava ona taulimaina ma le uigā le mataupu i le taimi atofaina e ala i le faitauina ma le faamalamalamaina o mau, e faaaogā ai faataʻitaʻiga, ma isi mea. E masani lava, ona tatou lē mananao e taulimaina se mataupu e lē o i le vaega ua tofia. E ao i le aofia ona mafai ona mulimuli ia te oe i le lomiga ua faavae ai le lauga.
7 Ua saunia e le Atua o loo tatou tapuai i ai se puna e lē uma o le atamai ma le poto. (Roma 11:33) Tusa lava pe mavae le faitau meleniuma o taimi, o le a tele pea mea tatou te aʻoaʻoina. O le a faateleina uma lo tatou tomai e faamanū ai i lo tatou Tamā faalelagi ma faafoeina faafitauli o le olaga atoa ma lo tatou loto malie ma le olioli e tusa ma le taumafaiga ua tatou faaaluina e maua mai ai le atamai faaleatua. O lea, ia e maumauai, ia maua aogā atoatoa mai le sauniuniga ua faia e lo tatou Aʻoaʻo Sili mo i tatou e ala i le auai e lē aunoa i le Aʻoga o le Faiva Faatiokarate. Tau ina avea lou toaga e sauniuni ma tofu sao i le Aʻoga o le Faiva Faatiokarate i le 1991 e fesoasoani ia te oe e faataulauina lenei mea.