O se Aʻoga e Faaauupegaina ai i Tatou mo Galuega e Sili Ona Tāua

¹ E ō tagata i le aʻoga ina ia maua ai faatonuga ia o le a fesoasoani iā i latou e ausia ai o latou sini i le olaga. Ae peitaʻi, o le ā se isi sini e sili atu ona tāua na i lo o le vivii atu i Lē Foaʻi Ola, ma le fesoasoani atu i isi ina ia iloa ana fuafuaga ma aʻoaʻoina ona ala? E leai lava se isi sini. O le sini autū o le Aʻoga o le Faiva Faatiokarate, o le sauniunia lea o i tatou e aʻoaʻo atu lo tatou faatuatuaga i isi. O lea la, a o tatou auai i le aʻoga i vaiaso taʻitasi, ua tatou maua ai tomai e faaauupegaina ai i tatou mo galuega e sili ona tāua i le olaga.

² I le lomiga o La Tatou Faiva o le Malo i le masina ua mavae, na avatu faatasi ai ma le “Faasologa o le Aʻoga o le Faiva Faatiokarate 2003.” O loo aofia ai i le faasologa ia faamatalaga auʻiliʻili i le auala o le a faia ai le aʻoga. O le a aogā tele la, pe a teu lelei lau faasologa i totonu o lau tusi, Mauaina o Aogā Mai le Aʻoga o le Faiva Faatiokarate, lea e tatau ona e sau ma aumai i le Aʻoga o le Faiva Faatiokarate i vaiaso taʻitasi. Manatu i nisi nei o vala o le Aʻoga o le Faiva Faatiokarate mo le 2003.

³ Uiga o le Tautala: Iā Ianuari, o le a amataina ai le polokalame o le aʻoga i se lauga e lima minute e faatatau i se uiga o le tautala po o se vala o le faitau, le faia o suʻesuʻega, po o le aʻoaʻo atu. O lenei lauga amata, o le a faia e le ovasia o le aʻoga, pe e faia foʻi e se toeaina agavaa na te tofia. E mafai ona talanoaina e le failauga le uiga ma le tāua o le tautala. Ona ia faalautele lea o le mataupu i le talanoaina o ni faaaʻoaʻoga faale-Tusi Paia ma faataʻitaʻi mai le auala e faaaogā ai le uiga o le tautala, i le taulaʻi patino atu i auala e aogā ai le faia faapea mo le faaleleia ai o la tatou faiva i le fanua.

⁴ Lauga Nu. 1: O uso ua tofia e faia le lauga e aʻoaʻo ai, ua toe fautuaina foʻi ina ia “uaʻi totoʻa atu i aogā e mafai ona faatino o faamatalaga ia na talanoaina.” O le uiga o lenei mea, e faailoa atu ai i le faapotopotoga le auala e faaaogā ai le faamatalaga. Pe afai e tofia atu iā te oe lenei lauga, tagaʻi i le itulau e 48-49 o le tusi o le Aʻoga o le Faiva mo ni fautuaga i le auala e sauniuni ai, ma suʻesuʻeina ai lomiga e mafai ona e suʻe atu i ai, na o loo faaalia i le faasino mataupu o le tusi, i lalo o le ulutala “Faatatauga aogā.”

⁵ Faasologa o le Faitau Tusi Paia: Pe afai e leʻi mafai ona e tausisia le faasologa o le faitau Tusi Paia faalevaiaso i taimi ua mavae, aiseā e lē manatu ai e tausisi i le faasologa o le faitau tusi i lenei tausaga? O i latou e faia faapea, e oo atu i le faaiʻuga o le tausaga ua māeʻa ona latou faitauina atoa ia Tusitusiga Kerisiano Eleni. O loo talanoaina i le itulau e 10-11, palakalafa e 4, o le tusi, Aʻoga o le Faiva, ia aogā o le amataina o se polokalame o le faitauina o le Tusi Paia i Tusitusiga Kerisiano Eleni.

⁶ Manatu Tāua Mai le Faitauina o le Tusi Paia: O lea ua faaumi atu le vaega lenei i le sefulu minute ina ia mafai ai ona fai ni manatu o le aofia i le faitau tusi o lenā vaiaso. E tatau iā i latou ua tofia ona tausisi i le taimi faatulagaina. O le a faia i vaiaso uma lava lenei lauga, e aofia ai ma le vaiaso o le autaluga e faatalanoa ona fai. A o e faitauina mataupu ua tofia mo le faitau Tusi Paia, ia mātau ni manatu tāua o le a aogā mo oe i le suʻesuʻega a lou aiga, i lau faiva, faapea ma lou soifuaga. O ā uiga o Ieova na faaalia i ana feutagaʻiga ma tagata ma atunuu? O ā ni mea na e aʻoaʻoina ua faamalosia ai lou faatuatua ma faateleina ai lou lotofaafetai iā Ieova? Ia saʻoloto e fai atu ni tali i so o se manatu mai mataupu tofia mo le faitau tusi, e oo lava i fuaiupu ia o le a faitauina i le Lauga Nu. 2, talu ai, o le a lē faia e le uso o le a faitauina le mataupu ni faamatalaga i fuaiupu.

⁷ Lauga Nu. 2: O le tofiga muamua lava mo tagata aʻoga i vaiaso taʻitasi, o le a faatulaga o se faitau atu i luma o le lautele. O faitau tusi uma lava o masina taʻitasi o le a faia mai i le faitau Tusi Paia o le vaiaso, seʻi vaganā ai le faitau tusi mulimuli o le masina, o le a faia mai i Le Olomatamata. O le a faitau e le tagata aʻoga le mataupu ua tofia atu e aunoa ma le faia o ni upu tomua po o ni upu faaiʻu. O le faia faapea, o le a mafai ai ona taulaʻi muamua atu lava i le faaleleia o lona tomai e faitau.—1 Timo. 4:13.

⁸ Lauga Nu. 3 ma le Nu. 4: O nisi o nei tofiga, o le a tele ina maua faamatalaga mai i le tusi Reasoning na i lo o isi tusi; o nisi lauga e na o se matua lava. O i latou o le a tofia i ai lauga ia e itiiti se avanoa e ono maua ai ni faamatalaga i se tusi, pe e na o se matua foʻi, o le a maua le avanoa e faia ai a latou lava taulimaga e ala i le faia o saʻiliʻiliga loloto i a tatou lomiga faa-Kerisiano. O le faia faapea, atonu o le a faigofie ai i tuafāfine ona fetuunaʻi a latou faamatalaga ia fetaui i o latou fesoasoani.

⁹ Faatulagaga: E pei ona faaalia i le itulau e 45 o le tusi, Aʻoga o le Faiva, e mafai e le ovasia o le aʻoga ona tofia atu se faatulagaga. Afai na te lē faia, e mafai lava la e tuafāfine ona filifilia se faatulagaga mai le lisi i le itulau e 82. Afai e taʻilua masina ma lauga se tuafafine, ua lava la ma totoe faatulagaga eseese nei e 30 e faaaogā mo le lima tausaga. O tuafafine e filifilia le faatulagaga Nu. 30, lea e faapea, “Se isi faatulagaga e talafeagai i lou vaipanoa,” e tatau ona tusia le faatulagaga i le pito i lalo po o tua o pepa o o latou tofiga (S-89). O le ovasia o le aʻoga na te tusia le aso na fai ai le lauga a le tagata aʻoga i le itulau e 82 o lana tusi i tala ane o le faatulagaga lea na ia faaaogāina. E mafai ona ia faia lenei mea i le taimi e na te makaina ai le pepa mo le faatonutonuina a le tagata aʻoga.

¹⁰ Pepa mo le Faatonutonuina: O loo iai lava lau pepa mo le faatonutonuina i totonu o lau tusi. O loo i le itulau e 79-81. E manaʻomia la ona avatu lau tusi i le ovasia o le aʻoga pe a uma au lauga taʻitasi. E ao i le ovasia o le aʻoga ona fai se faamaumauga o manatu e faatonuina ai ia o loo galulue i ai tagata aʻoga.

¹¹ Autaluga e Faatalanoa Ona Fai: O le autaluga o le Aʻoga o le Faiva Faatiokarate, o le a faatalanoa ona fai. O le a taʻilua masina ma faia lea autaluga, ma e faia mo le 30 minute. O fesili o le a talanoaina i le autaluga, o le a lomia mai pea i La Tatou Faiva o le Malo. Pe afai e paʻūʻū faatasi le vaiaso o le autaluga ma se vaiaso o se fonotaga matagaluega, po o se asiasiga a le ovasia matagaluega, o lauga la o le vaiaso o loo lumanaʻi ai, e tatau ona faia i le vaiaso lea, ae tuu le autaluga faatalanoa mo le vaiaso o mulimuli mai.

¹² Vasega Faaopoopo: I faapotopotoga e sili atu i le 50 tagata e tusia o latou suafa i le aʻoga, e ono iloiloina e toeaina le tatau ona faia o nisi vasega faaopoopo. “E mafai ona faaaogā lenei faatatauga mo taulimaga uma a tagata aʻoga pe na o lauga mulimuli e lua.” (Aʻoga o le Faiva, itu. 285) Ua faia le fautuaga mulimuli ona o le manatu i faapotopotoga ia e toʻatele tuafāfine ae toʻalaʻitiiti uso e faia tofiga faitau tusi. E ao i toeaina ona filifilia uso agavaa e tauaaoina nei vasega.

¹³ Faiaʻoga Lagolago: E pei ona faaalia i le faasologa o le Aʻoga o le Faiva Faatiokarate, e tatau i le ʻautoeaina ona tofia se faiaʻoga lagolago na te avatua fautuaga e lē faalauaʻiteleina ae e na o toeaina lava ma auauna o le faiva o ē e fofogaina atu manatu tāua o le Tusi Paia ma faia lauga e aʻoaʻo ai. O le uso e tofia i lenei tofiga, e tatau ona lava le poto masani, ma o se tasi o le a faaaloalogia e isi toeaina ana fautuaga. E tatau i ana fautuaga ona faatonu ai, ia faamālō atu ai mo le lelei o le tautala, faapea ma tomai o le aʻoaʻo atu, ma ia fautuaina se manatu se tasi po o se lua e manaʻomia ona galue i ai ina ia faaleleia. E lē manaʻomia ona avatu se fautuaga i lauga uma e faia e se uso e lauga soo. Ae peitaʻi, e tatau i le uso lea ua tofia e avea ma faiaʻoga lagolago ona faautauta ma malamalama e faapea, e oo lava i uso ia o loo faia lauga lautele i le taimi nei, e tatau ona fesoasoani atu i ai ina ia agaʻigaʻi atili i luma.—1 Timo. 4:15.

¹⁴ O ā Mea e Ao Ona Uaʻi Atu i Ai: O ā mea e mafai ona fesoasoani i se faiaʻoga e iloiloina ai se taulimaga? I le pusa lona tolu i le tele o mataupu e 53 o le tusi, le Aʻoga o le Faiva, o loo i ai se aotelega puupuu o mea e tatau ona uaʻi totoʻa i ai. E tatau foʻi i le ovasia o le aʻoga ona uaʻi totoʻa i isi mea o loo faamanatu mai, po o fautuaga i le tusi, lea o le a fesoasoani iā te ia ina ia vave lona faavasegaina o le faatulagaga saʻo ma le uigā o le taulimaga. Mo se faaaʻoaʻoga, ia mātau le faasologa o fesili i le pito i luga o le itulau e 55, ma manatu o loo i le palakalafa mulimuli o le itulau e 163.

¹⁵ Faatumu Avanoa: E lē gata i avanoa i pito o itulau, ae ua iai foʻi i le tusi Aʻoga o le Faiva le tele o avanoa ua fuafuaina e tusia ai au faamaumauga a o faia au lava suʻesuʻega, ma i le taimi e te auai ai i le Aʻoga o le Faiva Faatiokarate. (Tagaʻi i itulau e 77, 92, 165, 243, 246, ma le 250.) Ia mautinoa ua aumai lau tusi i vaiaso taʻitasi pe a e sau i le sauniga. Ia mulimuli ai a o faia le lauga amata. Ia tatala pea lau tusi a o faagasolo le aʻoga atoa. Ia mātau fautuaga e faia e le ovasia o le aʻoga. Ia uaʻi totoʻa atu i auala e aʻoaʻo atu ai, fesili, faaaʻoaʻoga, tala faatusa, ata, manatu, ma faatusatusaga e faaaogā e failauga. O le faia o faamaumauga aogā, o le a mafai ai ona e manatua ma faaaogā le tele o manatu sili ona lelei e maua mai le aʻoga.

¹⁶ Sa silafia e Iesu Keriso e faapea, o le talaʻiina o le tala lelei o le Malo o le Atua, o se faaeaga aupito sili lea ona lelei ua mafai ona faasalafa atu i so o se tasi. O lona tofiga autū lenā. (Mare. 1:38) Na ia fetalai: “E tatau ona ou folafola le tala lelei o le malo o le Atua i nisi aai foʻi; auā o le mea lea na auina mai ai aʻu.” (Luka 4:43) I le pei o i latou na talia le valaaulia ina ia mulimuli atu iā te ia, ua tatou matuā pisi foʻi i le talaʻiina atu o le tala lelei, ma o loo faaauau pea ona tatou tauivi e faaleleia le tulaga o la tatou “taulaga o le viiga.” (Epe. 13:15) Ina ia ausia lea tulaga, seʻi o tatou maumauaʻi e faia e lē aunoa se sao i le Aʻoga o le Faiva Faatiokarate, o se aʻoga o le a fesoasoani e sauniunia ai i tatou mo mea e sili ona tāua i le olaga.