Le Auala ua Tatou Maua ai Aogā Mai le Aʻoga o le Faiva Faatiokarate
1 Ua mauaina e tagata o Ieova se faaeaga tutasi o le auai i se aʻoga faatiokarate. (Isa. 54:13; Ioa. 6:45) Ae peitaʻi, o le tele o aogā o loo tatou maua mai ai, e faalagolago tele iā tatou taumafaiga o loo fai. Po o e manatunatu ea i aogā o le Aʻoga o le Faiva Faatiokarate i lou tulaga faaleagaga?
2 Ni Faamatalaga o le Lotofaafetai: Ua mātauina e le toʻatele o ovasia o le aʻoga le loloto o le aʻoaʻoina o le lelei o le tautala lea ua faaleleia ai le uigā i le faiva i le fanua o a latou faapotopotoga. E lē gata i lea, ua iloa e se tasi o ovasia o le aʻoga faapea, o le fuafuaga o le faia o se sao o le aofia i mea tāua o le faitau Tusi Paia, ua toʻatele i latou ua tausisi atu ai i le faasologa o le faitau Tusi Paia. E tusa ai ma le Lauga Nu. 2, ua toʻatele uso ua faamatalaina ma le fiafia aogā o le uaʻi atu i le mataupu e aunoa ma le saunia o ni upu tomua faapea ma se faaiʻuga. O i latou ua tofia atu i ai lenei vaega ua uaʻi totoʻa atu nei i le faaleleia o ā latou faitau.—1 Timo. 4:13.
3 E Maua e Tagata Uma Aogā: O le faia o se sao i sauniga, e mafai ona avea o se fiafiaga. (Faata. 15:23) O le mauaina o fesili o le autaluga a o lumanaʻi le taimi e fai ai, ua mafai ai ona tatou sauniuni ma faia se sao i le taimi o le autaluga. E lē gata i lea, na amata mai i le lomiga o Le Olomatamata Ianuari 1, 2004, o loo aumaia ai manatu tāua mai tusi o le Tusi Paia lea e foliga mai e ōgatasi ma le faitau tusi ua faatulagaina mo le Aʻoga o le Faiva Faatiokarate. Ua fesoasoani nei mataupu i le toʻatele e faia ai ni manatu e ati aʻe ai, i le taimi e talanoaina ai manatu tāua o le Tusi Paia.
4 O i latou uma ua tusia o latou suafa i le aʻoga ua maua ni faaeaga faapitoa e sauniuni ai ma avatu o latou tofiga. E maua e tagata uma aogā mai upu faamālō a le ovasia o le aʻoga mai le pulelaa. E mauaina atili foʻi aogā e tagata aʻoga taʻitoʻatasi mai manatu e fautuaina ai e le ovasia o le aʻoga pe a uma le sauniga. O mea e ao ona fai i le iʻuga o mataupu taʻitasi i le tusi Mauaina o Aogā Mai i le Aʻoga o le Faiva Faatiokarate o loo talanoaina ai le uiga o le tautala e maua ai nisi fesoasoani atili.
5 Pe a e mauaina manatu aogā ma manatu faale-Tusi Paia i le taimi o le aʻoga ma le taimi foʻi e uma ai, ia faia ni faamaumauga i lau kopi o le tusi Aʻoga o le Faiva. Ia toe tomānatu i mea ua e aʻoaʻoina, ma mafaufau pe faapefea i lenei vala o aʻoaʻoga faale-Atua ona faaleleia ai lou itu faaleagaga.