Aʻoga o le Faiva Faatiokarate mo le 2004
1 E faaauupegaina e Ieova tagata lautele e faatino se galuega tāua i le lalolagi aoao. O se tasi o auala na te faia ai lenei tulaga, e ala lea i toleniga ua saunia i vaiaso taʻitasi i le Aʻoga o le Faiva Faatiokarate. Po o e auai ea ma le tinoū e tusa ai ma lou tulaga? O le a iai ni suiga laiti iā Ianuari, e fuafua e fesoasoani i tagata aʻoga ina ia latou maua aogā silisili mai le aʻoga.
2 Fesuisuiaʻi o le Faiaʻoga Lagolago: O uso e tauaaoina lauga e aʻoaʻo ai ma manatu tāua mai le Tusi Paia, latou te talisapaia fautuaga a le faiaʻoga lagolago. Pe afai e lava toeaina agavaa, e mafai ona fesuisuiaʻi le tofiga o le faiaʻoga lagolago i tausaga taʻitasi. O le faia faapea, o le a mafai ai ona faasoa atu galuega tauave; ae e sili atu i lenā, o le a maua ai e toeaina ma auauna o le faiva agavaa, aogā mai le poto masani ma le tomai o failauga ma faiaʻoga eseese.
3 Faasologa o le Autaluga e Faatalanoa Ona Fai: Pe a fai la outou fonotaga matagaluega i le vaiaso o le autaluga e faatalanoa ona fai, e ao ona tolopō le autaluga (ma isi vaega o le faasologa o le vaiaso) i le vaiaso i ona tua atu, ae ia tuu mai i luma ma faaaogā i le fonotaga le faasologa o le vaiaso e sosoo ai. Ae e lē manaʻomia ona fesuiaʻi faasologa o ni vaiaso atoatoa se lua, pe afai e paʻū le autaluga e faatalanoa ona fai i le vaiaso o le asiasiga a le ovasia matagaluega. Na i lo lea, o pese, o lauga i le uiga o le tautala, ma manatu tāua mai le Tusi Paia, e ao ona tauaaoina e pei ona faatulagaina. O le lauga e aʻoaʻo ai (lea e sosoo ma le lauga o le uiga o le tautala) e tatau ona faavae aʻe i le faasologa o le vaiaso e sosoo ai. Pe a māeʻa manatu tāua mai le Tusi Paia, ona faia lea o le Sauniga o le Auaunaga mo le 30 minute, lea e mafai ona fetuunaʻi i vaega e tolu e taʻi 10 minute po o vaega e lua e taʻi 15 minute. (E lē tatau ona faia faasilasilaga e faatomua ai.) Pe a māeʻa le Sauniga o le Auaunaga, ona usuina lea o se pese ma sosoo ai ma le lauga a le ovasia matagaluega mo le 30 minute. O le Aʻoga o le Faiva Faatiokarate mo le vaiaso e sosoo ai, o le a amata i le lauga i le uiga o le tautala ma manatu tāua mai le Tusi Paia e pei ona faatulagaina, mulimuli mai ai ma le autaluga e faatalanoa ona fai.
4 Ia faaaogā lelei avanoa uma e tuputupu aʻe ai faaleagaga. A o e mauaina aogā mai le Aʻoga o le Faiva Faatiokarate, o le a avea oe ma faalaeiauga i lau faapotopotoga, ma fai lau vaega i le faataunuuga o valoaga o le Tusi Paia, ma viia foʻi Lē na Pogai mai ai le feʻau matagofie lea e tatau ona tatou folafolaina atu.—Isa. 32:3, 4; Faaa. 9:19.