Faasologa Fou o Sauniga a le Faapotopotoga
1, 2. O ā suiga i a tatou sauniga o le a amata iā Ianuari 2009?
1 I le vaiaso o Aperila 21-27, 2008, sa faafofoga ai le ʻauuso i le lalolagi atoa i le faasilasilaga faagaeeloto lenei. “E amata atu iā Ianuari 1, 2009, o le a faia ai le Suʻesuʻega Tautusi a le Faapotopotoga i le taimi lava e tasi e fai ai le Aʻoga o le Faiva Faatiokarate ma le Sauniga o le Auaunaga. O le a suia le taʻu, Suʻesuʻega Tautusi a le Faapotopotoga, i le Suʻesuʻega Faale-Tusi Paia a le Faapotopotoga.”
2 Faasologa mo Lenei Sauniga Faalevaiaso: O le umi e fai ai le sauniga lenei, e aofia ai pese ma tatalo, e 1 le itula ma le 45 minute. E amata le sauniga i le pese ma le tatalo (5 minu.) ona sosoo ai lea ma le Suʻesuʻega Faale-Tusi Paia a le Faapotopotoga (25 minu.). E sosoo ai ma le Aʻoga o le Faiva Faatiokarate (30 minu.). A māeʻa lenā, ona usu lea o le pese (5 minu.) e amata ai le Sauniga o le Auaunaga (35 minu.). E faaiʻu le sauniga i le pese ma le tatalo (5 minu.). Ina ia fesoasoani iā te oe e sauniuni ai mo nei sauniga, o le a lomia i La Tatou Faiva o le Malo, mai lea masina i lea masina se faasologa mo le Suʻesuʻega Faale-Tusi Paia a le Faapotopotoga, le Aʻoga o le Faiva Faatiokarate, ma le Sauniga o le Auaunaga.
3. O le ā le auala o le a faia ai le Suʻesuʻega Faale-Tusi Paia a le Faapotopotoga?
3 Suʻesuʻega Faale-Tusi Paia a le Faapotopotoga: O le a tauaaoina le sauniga lenei i le auala e pei ona faia ai le Suʻesuʻega o le Olomatamata. O le a lē manaʻomia ona toe autalu manatu sa talanoaina i le vaiaso ua teʻa. Nai lo le faia faapea, ia tau lava o se faatomuaga puupuu e amata ai le sauniga. O le faia faapea, o le a lava ai se taimi mo i latou uma o loo auai e fai ai ni o latou sao pupuu. O le a vaaia e le ovasia taʻimua le tofiaina auauaʻi o toeaina e faia le sauniga lenei, ia eseese toeaina i vaiaso taʻitasi.
4. O ā suiga o le a iai i le Sauniga o le Auaunaga?
4 Sauniga o le Auaunaga: O le a leai se suiga i le Sauniga o le Auaunaga seʻi vaganā ai o le a faapupuu ona vaega. O le a tele lava ina lima minute le umi o faasilasilaga. Ua lava lenei taimi mo faasilasilaga talafeagai ma ni tusi mai le lālā e manaʻomia ona faitau. O faasilasilaga e pei o fuafuaga mo le auaunaga i le fanua, galuega faamamā, tala o le tupe, ma tusi e masani ona maua mai le ofisa o le lālā, e lē manaʻomia ona faitau mai i le pulelaa, ae o le a faapipii i le laupapa o faamatalaga mo uso e faitau ai. O i latou e tofia i ai vaega o le polokalame, e ao ona sauniuni lelei, ia mulimuli i faatonuga e avatu ma ia tausisi i le taimi faatulagaina mo lau vaega.
5. O le ā le faasologa o sauniga a le faapotopotoga i le vaiaso o le asiasiga a le ovasia o le matagaluega?
5 Le Asiasiga a le Ovasia o le Matagaluega: O le a leai se suiga i le faasologa o mea e fai i le vaiaso o le asiasiga a le ovasia o le matagaluega. O le Aso Lua o le a faia ai le Aʻoga o le Faiva Faatiokarate, ma le Sauniga o le Auaunaga ona sosoo ai lea ma se pese. E sosoo ai ma se lauga e 30-minute a le ovasia o le matagaluega. E pei ona iai i le taimi nei pe a oo i le vaiaso o lana asiasiga, e faatulaga se isi aso mo le Suʻesuʻega Faale-Tusi Paia a le Faapotopotoga, ona sosoo ai lea ma se pese ma le lauga o le auaunaga a le ovasia o le matagaluega. E faaiʻu le sauniga i se pese ma le tatalo.
6. O le ā le vaega fai, a le ovasia o le vaega?
6 Faatasiga mo le Auaunaga i le Fanua: O le a tofia e le ʻautoeaina ni ovasia o vaega e vaaia vaega mo le auaunaga i le fanua, ma saunia le leoleoga faaleoleo mamoe i tagata taʻitasi o loo faia aʻe ai le vaega. Afai ae manaʻomia se auauna o le faiva e tauavea le tofiga lenei, e ao ona taʻua o ia o le “auauna o le vaega.”
7. O ā mea tatou te faatalitalia mai i le faasologa fou o a tatou sauniga?
7 E pei ona faatulaga mai i inei, o le a tatou maua le avanoa e iloiloina ai faamatalaga e faatonuina ma faalaeiauina ai i tatou i lenā afiafi ia iai se faiā malosi faaleagaga ma Ieova. O le a faaauupegaina ai foʻi ma toleniina ai i tatou ina ia avea ma tagata talaʻi ma faiaʻoga agavaa mo se faiva e fuatele mai.—Efe. 4:13, 14; 2 Timo. 3:17.
8. E faapefea ona aogā iā i tatou le muaʻi sauniuni o le tagata lava ia atoa foʻi ma isi?
8 O le muaʻi sauniuni mo nei sauniga o le a fesoasoani iā i tatou ina ia manino la tatou uaʻi atu i manatu tāua o le a faamatilatila i sauniga taʻitasi. O le a tatou maua uma avanoa e fai ai ni tali i taimi o sauniga, ma saosaomanatu ai i ni faalaeiauga lelei. (Roma 1:11, 12; Epe. 10:24) O lo tatou sini ia ‘iloa lou agaʻigaʻi i luma’ e ala i le “taulimaina ma le saʻo le upu moni.”—1 Timo. 4:15; 2 Timo. 2:15.
9. O le ā la tatou faaiʻuga e ao ona iai, ma aiseā?
9 E tatou te matuā fiafia lava ona o lenei suiga i a tatou sauniga faale-faapotopotoga. Tau ina ia tatou faaavanoa atu i tatou lava e faaaogā taʻitaʻiga o loo saunia mai e “le pologa faamaoni ma le faautauta,” ma ia mafuta vavalalata atu i lo tatou Leoleo Mamoe Sili a o ia sauniunia i tatou mo le “puapuaga” tele lea ua vavala mai i tafatafāʻilagī.—Mata. 24:21, 45; Epe. 13:20, 21; Faaa. 7:14.