Pusa Fesili

◼ E faapefea ona faailoa atu le pese amata o le Aʻoga o le Faiva Faatiokarate, Sauniga o le Auaunaga, Lauga i le Lautele, ma le Suʻesuʻega o le Olomatamata, ma o ai na te faia?

O pese ua filifilia e amata ai le Aʻoga o le Faiva Faatiokarate i vaiaso taʻitasi, ua lisi atu i le faasologa o le Aʻoga o le Faiva Faatiokarate lea e i le faaopoopoga o La Tatou Faiva o le Malo o Oketopa. Ua faailoa atu i le itulau e 2 o La Tatou Faiva o le Malo, pese e amata ma faaiʻu ai Sauniga o le Auaunaga i vaiaso taʻitasi. E faapena foʻi pese o le Suʻesuʻega o le Olomatamata i vaiaso taʻitasi, o loo i le itulau e 2 o lomiga taʻitasi o Le Olomatamata. O pese ua filifilia o se vaega o le sauniga e fesootaʻi faatasi uma, ma e ao ona faailoa atu e le uso o loo faia le sauniga na i lo le Ovasia o le Aʻoga po o le taʻitaʻi fono o le Lauga i le Lautele.

O se faaaʻoaʻoga, e faafeiloaʻi e le ovasia o le Aʻoga o le Faiva Faatiokarate le aofia, faailoa atu le pese amata, fai le aʻoga, ma valaaulia le uluaʻi failauga o le Sauniga o le Auaunaga i le pulelaa. E faailoa mai e le uso lea, le pese amata o le Sauniga o le Auaunaga.

E faapena foʻi le Lauga i le Lautele, e ao ona amata e se taʻitaʻi fono. E na te faafeiloaʻi ma le māfana ē o i le aofia, ma valaaulia e auai i le usuina o le pese amata ua filifilia e le failauga. O ia (pe atonu o se isi uso agavaa na muaʻi faatulaga) e amataina le sauniga i le tatalo. E faasilasila e le taʻitaʻi fono le failauga ma le matua o le lauga. Pe a uma le lauga, e faia e le taʻitaʻi fono ni nai upu faafetai mo aʻoaʻoga na tauaaoina mai, ae lē toe autaluina manatu na taʻua e le failauga. E na te faasilasila le matua o le lauga i le lautele mo le isi vaiaso o sosoo ai, ma valaaulia le aofia e auai pea mo le Suʻesuʻega o le Olomatamata. E lē manaʻomia ona fesili le taʻitaʻi fono i le aofia pe fia avatu ni alofaaga i le faapotopotoga a le failauga. Ona sosoo ai lea ma le valaaulia e le taʻitaʻi fono o lē e faia le Suʻesuʻega o le Olomatamata i le pulelaa.

E faasilasila e le fai Suʻesuʻega o le Olomatamata le pese muamua e usu e fesootaʻi atu i le suʻesuʻega. E na te faia le suʻesuʻega e ōgatusa ma aʻoaʻoga ua lomia i Le Olomatamata, ona faailoa atu lea o le pese faaiʻu. E masani ona valaaulia e le fai Suʻesuʻega o le Olomatamata le uso na faia le lauga i le lautele, e faia le tatalo faaiʻu.

O le mātauina o nei taʻiala e fesoasoani e faamautinoa ai, o a tatou sauniga i le faapotopotoga o loo faia i se tulaga maopoopo.