Ia Ausia le Fuafuaga o Faatasiga mo le Talaʻiga

1. O le ā le fuafuaga o faatasiga mo talaʻiga?

¹ I se tasi taimi, na faatasitasi ai Iesu ma ona soo e toʻa 70 a o leʻi amata la latou talaʻiga. (Luka 10:1-11) Na ia tuuina atu faalaeiauga e ala i le faamanatu atu e lē na o i latou o le a galulue, ma o loo taʻitaʻia i latou e “le Matai o le seleselega,” o Ieova. Na ia tuuina atu foʻi ni faatonuga e faaaupega ai i latou mo le galuega, ma faamaopoopo i “latou taʻitoʻalua.” I aso foʻi nei, o le fuafuaga o faatasiga ia e tatou te faia a o leʻi auai i le talaʻiga, ina ia faalaeiau, faaaupega, ma faamaopoopo ai i tatou.

2. O le ā le umi e tatau ona faia ai faatasiga mo talaʻiga?

² I le taimi lenei, e 10 i le 15 minute le umi o faatasiga mo le talaʻiga, lea e aofia ai le faamaopoopoina o vaega, le tofia o le oganuu, ma le tatalo. Ua fetuunaʻi nei lenā tulaga. E amata atu iā Aperila, e lē tatau ona sili atu i le lima i le fitu minute le umi o se faatasiga mo le talaʻiga. Peitaʻi, pe afai e māeʻa le sauniga a se faapotopotoga ona sosoo ai lea ma le faatasiga o le talaʻiga, e lē tatau la ona umi lenā faatasiga auā ua tele manatu faale-Tusi Paia na maua mai i le sauniga. O le faapuupuu o faatasiga mo talaʻiga, o le a tele ai le taimi e faaalu mo le talaʻiga. E lē gata i lea, pe afai na amata le talaʻiga a paeonia ma isi a o leʻi faia le faatasiga, e lē manaʻomia la ona umi se taimi e taofi ai la latou talaʻiga.

3. E faapefea ona faatulaga faatasiga mo talaʻiga ina ia matuā aogā i le ʻautalaʻi?

³ E tatau ona faatulaga faatasiga mo talaʻiga ina ia matuā aogā i le ʻautalaʻi. I le tele o faapotopotoga, e sili atu ona lelei pe a feiloaʻi i vaega mo talaʻiga nai lo o le faatasitasi uma i se nofoaga e tasi. E faigofie ai mo le ʻautalaʻi ona ō atu i na faatasiga mo talaʻiga, ma atonu e latalata i le oganuu. O le a vave ona faamaopoopo le ʻautalaʻi, ma faigofie i le ovasia o le vaega ona uaʻi atu i sui taʻitasi. E mafai e le tino o toeaina ona iloilo tulaga o le faapotopotoga, ona fai lea o se faaiʻuga e aupito i talafeagai. A o leʻi faaiʻu le faatasiga i se tatalo, e tatau ona iloa e le tagata lana paga ma le oganuu e galulue ai.

4. Aiseā e lē tatau ai ona manatu māmā i faatasiga mo talaʻiga?

⁴ E Tāua Foʻi e Pei o Isi Sauniga a le Faapotopotoga: Talu ai o faatasiga mo talaʻiga e faia ina ia aogā i ē o le a auai i le talaʻiga, e lē manaʻomia la ona auai ai le faapotopotoga atoa. Peitaʻi, e lē tatau ona manatu māmā i ai ma faapea e lē tāua e pei o isi sauniga a le faapotopotoga. I le pei o a tatou sauniga uma, o faatasiga mo talaʻiga o se faatulagaga mai iā Ieova, e mafai ona tatou fefaalaeiauaʻi ma faatupu ai le alofa ma galuega lelei. (Epe. 10:24, 25) O lea, e tatau ona sauniuni lelei lē o le a taʻimua, ina ia faia le faatasiga i se auala e faamamaluina ai Ieova, ma aogā iā i latou o loo auai ai. Pe afai e talafeagai, e ao i tagata talaʻi uma o le a auai i le talaʻiga ona taumafai e iai i na faatasiga.

5. (a) O le ā le matafaioi a le ovasia o le auaunaga i le faatulagaina o faatasiga mo talaʻiga? (e) E faapefea ona taulima e se tuafafine le faatasiga mo talaʻiga?

⁵ Sauniuniga a Lē e Taʻimua: Ina ia sauniuni lelei se tasi mo lana vaega o le sauniga, e tatau ona vave maua lana vaega. E faapena foʻi le auala e sauniuni ai i faatasiga mo talaʻiga. Pe a feiloaʻi talaʻiga i vaega, o le a taʻimua i na faatasiga ia ovasia o na vaega po o a latou fesoasoani. Peitaʻi, pe a tuufaatasi le talaʻiga a le faapotopotoga, o le a tofia e le ovasia o le auaunaga sē e taʻimua i le faatasiga. O isi ovasia o le auaunaga e latou te tufa atu faasologa i ē e taʻimua, ma faapipii i le laupapa o faamatalaga. E ao i le ovasia o le auaunaga ona filifili ma le faaeteete i latou e taʻimua, ona e faalagolago le sologa lelei o na faatasiga i la latou aʻoaʻo atu ma le faamaopoopo. Pe afai e leai se toeaina, se auauna o le faiva, po o se uso agavaa ua papatiso e tofia mo nisi aso, e ao i le ovasia o le auaunaga ona tofia se tuafafine agavaa ua papatiso ina ia taʻimua.—Tagaʻi i le mataupu “Pe a Taʻimua se Tuafafine.”

6. Aiseā e tāua ai i lē e taʻimua ona sauniuni lelei?

⁶ Pe a maua so tatou faaeaga i le Aʻoga o le Faiva Faatiokarate po o le Sauniga o le Auaunaga, e tatou te manatu mamafa i ai ma sauniuni lelei. E seāseā ona tatou faatali seʻia agaʻi atu i le sauniga, ona faatoʻā mafaufau lea i se tala e fai. E faapena foʻi i se tasi ua tofia e taʻimua i le talaʻiga, e tatau ona manatu mamafa i lona faaeaga. Talu ai o le a pupuu faatasiga mo talaʻiga, e tāua la le sauniuni lelei ina ia matuā aogā le faatasiga ma māeʻa i le taimi faatulagaina. E aofia i le sauniuni lelei le muaʻi iloa o le oganuu e galulue ai.

7. O ā ni mea e mafai ona iloilo e lē o le a taʻimua?

⁷ Manatu e Talanoaina: Talu ai e eseese tulaga i oganuu, o le māfuaaga lea ua lē tuuina mai ai e le pologa faamaoni se auivi patino e talanoaina i taimi o faatasiga mo talaʻiga. O loo taʻua nisi o fautuaga i le pusa, “Mea E te Ono Iloilo i se Faatasiga mo le Talaʻiga.” E masani ona fai faatasiga mo talaʻiga i se auala faatalanoa. I nisi taimi, e mafai ona fai se faataʻitaʻiga lava saunia, pe faaali se vitiō e fesootaʻi i le talaʻiga mai i le jw.org. Pe a sauni lē e taʻimua mo le faatasiga o le talaʻiga, e tatau ona ia mafaufau po o ā manatu e faalaeiau ma faaaupega ai i latou o le a auai i le talaʻiga.

8. O ā manatu aogā e mafai ona talanoaina i faatasiga mo talaʻiga i le Aso Toonaʻi ma le Aso Sa?

⁸ O se faaaʻoaʻoga, i Aso Toonaʻi, o le toʻatele o le ʻautalaʻi e ofoina Le Olomatamata ma le Ala Mai! O le toʻatele e talaʻi i le Aso Toonaʻi, e lē talaʻi i aso o le vaiaso, ma e ono faigatā la ona manatua a latou taulimaga na faataʻitaʻi i le Tapuaʻiga a le Aiga. O lea, e ao i lē e taʻimua ona toe talanoaina se tasi o taulimaga faataʻitaʻi o loo i le pito i tua o La Tatou Faiva o le Malo. E mafai foʻi ona talanoa pe faapefea ona faaaofia tala fou, mea e tutupu, po o aso mālōlō i le taulimaga o se mekasini. Ia talanoa foʻi le auala e faataatia ai se faavae mo le isi asiasiga pe a talia se mekasini. Pe afai na faaaogā e se tagata talaʻi se mekasini patino e ofo, e ono fesili atu lē o loo taʻimua pe mafai ona taʻu mai ni fautuaga i le auala e faia ai, pe faamatala mai se mea na tupu e faalaeiauina ai. I Aso Sa, e mafai foʻi e lē e taʻimua ona faia faapea i le ofo o le masina. O lomiga mo suʻesuʻega e pei o polosiua o le Tala Lelei ma Ia Faalogo i le Atua, ma le tusi Aʻoaʻoga Moni, e mafai ona ofo i so o se aso, ma e talafeagai foʻi ona talanoa le auala e ofo ai nei lomiga.

9. O ā mea e mafai ona talanoaina i le faaiʻuga o le vaiaso pe a auai i se tauiviga faapitoa?

⁹ Pe afai o loo auai le faapotopotoga i se tauiviga faapitoa i le faaiʻuga o le vaiaso, e ono talanoaina e lē e taʻimua le auala e ofo faatasi ai mekasini ma le valaaulia po o se sāvali, pe talanoa po o le ā le mea e fai pe a faaalia e se tasi le fiafia. E mafai foʻi ona fetufaaʻi mea na tutupu ina ia iloa ai le tāua o nei tauiviga.

10, 11. Aiseā e tāua ai le sauniuni lelei o tagata talaʻi, mo le sologa lelei o faatasiga mo talaʻiga?

¹⁰ Sauniuniga a Tagata Talaʻi: E iai foʻi le vaega a tagata talaʻi i le sologa lelei o le faatasiga mo le talaʻiga. O le muaʻi sauniuni mo le talaʻiga, atonu i le taimi o le tapuaʻiga a le aiga, o le a maua ai se manatu e mafai ona faasoa atu i isi o le ʻautalaʻi. O le sauniuni lelei e aofia ai le iai o ni mekasini ma lomiga a o leʻi taunuu i le faatasiga mo le talaʻiga, ina ia lē tuai ai ona agaʻi atu i le oganuu.

¹¹ E tāua foʻi ona fuafua e taunuu i le faatasiga mo talaʻiga i ni nai minute a o leʻi amata. E tatou te taumafai ia vave taunuu i taimi o sauniga uma a le faapotopotoga. Peitaʻi, o le a sili atu ona faalavelave pe a tatou tuai i faatasiga mo talaʻiga. E faapefea? E tele vala e iloilo e lē o loo taʻimua a o leʻi amata le faatasiga. Pe a toʻaitiiti le ʻautalaʻi e auai i le faatasiga, e ono filifili le taʻimua e ō uma e galulue i se oganuu e leʻi uma ona galueaʻiina. Pe afai na savavali atu nisi i le faatasiga mo talaʻiga ma e mamao le oganuu o le a galulue ai, e ono paga la i latou ma ē e iai taavale. Pe afai o le oganuu e galulue ai e tele ai ni soligatulafono, e ono tofia la ni uso e galulue faatasi ma se vaega o tuafāfine. O tagata talaʻi e lē atoatoa le malosi o le tino, e mafai ona galulue i se oganuu e laugatasi pe e iai fale e leai ni fasitepu. E ono paga tagata talaʻi fou ma i latou e iai le poto masani. Ae a tuai le ʻautalaʻi i le faatasiga mo talaʻiga, o le a tele ni fetuunaʻiga e fai ona o i latou. E moni e iai māfuaaga lē maʻalofia e tatou te tuai ai. Peitaʻi, pe a fai ma a tatou masani le tuai, ia fesili ifo iā i tatou lava pe e māfua ona e tatou te lē talisapaia faatasiga mo talaʻiga, pe ona o le leai o se faasologa lelei.

12. Pe afai e masani ona fai au lava fuafuaga, o ā ni mea e mafai ona e iloilo?

¹² E ono filifili nisi o le ʻautalaʻi e fai a latou lava fuafuaga a o leʻi amata le faatasiga, pe e tofi atu e le taʻimua a latou paga. Pe afai e masani ona fai au lava fuafuaga, pe e mafai ona ʻfaalautele atu lou loto’ e ala i le galulue ma tagata talaʻi eseese, nai lo le tausisi e paga ma au uō i taimi uma? (2 Kori. 6:11-13) Pe e mafai ona fai ma lua galulue ma se tagata talaʻi fou, ina ia fesoasoani e faaleleia lana aʻoaʻo atu? (1 Kori. 10:24; 1 Timo. 4:13, 15) Ia faalogologo lelei i faatonuga e tuuina atu, e aofia ai le mea e amata atu ai le talaʻiga. Pe a māeʻa le faatasiga, ʻalofia le toe sui o fuafuaga ma ia vave loa ona agaʻi i le oganuu.

13. O ā aogā e tatou te maua mai i faatasiga mo talaʻiga, pe a saosaolaumea tagata uma e fai la latou vaega?

¹³ Ina ua māeʻa le talaʻiga a le toʻa 70 ia na auina atu e Iesu, sa toe foʻi mai ma “le olioli.” (Luka 10:17) E mautinoa o la latou faatasiga ma Iesu a o leʻi ō atu e talaʻi, na fesoasoani e latou te taulau ai. E faapena foʻi ona aogā faatasiga mo talaʻiga i aso nei. Pe a saosaolaumea i latou uma e auai i faatasiga mo talaʻiga e fai la latou vaega, o le a iʻu ina faalaeiau, faaaupega, ma faamaopoopo ai i tatou e faamāeʻa lo tatou tofiga, o le ʻmolimau atu i atunuu uma.’—Mata. 24:14.