Faatasiga mo le Auaunaga i le Fanua
1. Aiseā tatou te manatu mamafa ai i le auai i le auaunaga i le fanua i se tulaga maopoopo?
1 Sa faataatia e Iesu se faaaʻoaʻoga i le auai i le galuega talaʻi o le Malo i se tulaga maopoopo ma le māeʻaeʻa lelei. E faapena foʻi i aso nei, o i latou o loo auai i lenei tauiviga e talaʻi le Malo i le lalolagi atoa e latou te faanaunau e faia i le auala lava lenā e tasi. E tusa ai o lenei taumafaiga, ua faaaogā ai e faapotopotoga i le lalolagi atoa ia faatasiga mo le auaunaga i le fanua o se tasi o auala e faamaopoopo ai vaega o le ʻautalaʻi mo le auaunaga i le fanua.—Mata. 24:45-47; 25:21; Luka 10:1-7.
2. O le ā le auala e faatulaga ai le faatasiga mo le auaunaga i le fanua?
2 O se Faatulagaga Lelei Tele: Ua fuafuaina faatasiga mo le auaunaga i le fanua ina ia saunia ai faalaeiauga, o faatonuga i le auala e amioaʻi a o auai i le faiva, ma taʻiala i le auala e amioaʻi a o auai i le faiva. E mafai ona talanoa puupuu le mau o le aso pe afai e manino mai se faatatauga i le faiva i le fanua. O nisi taimi, e toe talanoa mataupu mai i La Tatou Faiva o le Malo, le tusi Reasoning, ia po o nisi foʻi taimi e mafai ona talanoaina le tusi Aʻoga o le Faiva ina ia sauniunia ai i latou uma o auai i le talaʻiga i lenā aso. E ono fai foʻi se faataʻitaʻiga puupuu o le auala e ofo ai le lomiga o loo ofo i lea taimi. E tatau ona iloa e tagata uma le vaega e latou te galulue ma le oganuu e galulue ai a o leʻi faia le tatalo. O le taimi lava e uma ai le faatasiga lenei lea e lē silia i le 15 minute, ua tatau ona agaʻi saʻo loa i le oganuu.
3. O ai e gafa ma le faamaopoopoina o faatasiga mo le auaunaga i le fanua?
3 E Faapefea Ona Faamaopoopo? O le ovasia o le auaunaga lea e taʻimua, e gafa ma le faamaopoopoina o faatasiga mo le auaunaga i le fanua. O ovasia o vaega po o ō latou fesoasoani, e gafa pe e galulue faatasi ma a latou vaega mo le talaʻiga i faaiʻuga o vaiaso. O nisi ovasia po o auauna o le faiva e mafai ona auai faatasi ma vaega mo le auaunaga i ogatotonu o vaiaso. E galulue vavalalata ovasia o vaega ma le ovasia o le auaunaga ina ia faamautinoa e lava se oganuu mo a latou vaega e galulue ai mai i lea fale i lea fale i faaiʻuga o vaiaso. A o faagasolo le vaiaso, e vaavaaia e le ovasia o le auaunaga ia faatulagaga mo i latou e taʻimua i vaega mo le auaunaga i le fanua.
4-6. (a) O le ā le fuafuaga o faatasiga mo le auaunaga i le fanua e tusa ai o le oganuu a le faapotopotoga? (e) O ā mea e ao ona iloilo ina ia fuafua ai mea e manaʻomia mo faatasiga auā le auaunaga i le fanua?
4 O Fea ma o Afea e Fai ai Nei Faatasiga? Nai lo le feiloaʻi o le faapotopotoga atoa i se nofoaga se tasi, e ao ona faatulaga faatasiga nei ia feiloaʻi i ni nofoaga e sili ona faigofie mo tagata e toʻatele, e masani lava o se fale o se aiga, i le oganuu ina ia faigofie ai ona galueaʻiina le oganuu a le faapotopotoga. E mafai foʻi ona faaaogā Maota mo Sauniga mo lenei fuafuaga. O le toʻatele o faapotopotoga e faaaogā le Maota mo Sauniga mo le faatasiga o le auaunaga pe a māeʻa le latou lauga i le lautele ma le Suʻesuʻega o le Olomatamata i le Aso Sa. E ao ona fai taumafaiga ia faaitiitia le malaga mamao i le oganuu. O lona uiga, e fai ma toe iloilo fuafuaga nei mai i lea taimi i lea taimi, ina ia faamautinoa o loo talafeagai pea nofoaga e pei ona fuafuaina mo le lelei ma le māeʻaeʻa ona galueaʻiina o le oganuu.
5 O le taimi aupito sili ona lelei mo faatasiga nei ma pe faafia foʻi ona fai i le vaiaso, e faalagolago lava i le tulaga o le oganuu. O fesili nei e ono fesoasoani e fuafua ai po o afea ma po o fea e sili ona lelei ona feiloaʻi ai.
6 O ā manaʻoga o le oganuu e ao ona uaʻi atili atu i ai? O lē fea taimi e aupito sili ona lelei mo le galue mai i lea fale i lea fale? Pe e ao ona faatulaga se taimi i le afiafi mo le galuega mai i lea fale i lea fale po o le faia o toe asiga? O faatulagaga uma e faatatau i le auaunaga i le fanua e ao ona faapipii i le laupapa o faamatalaga. O le faanaunauga o tagata talaʻi uma o le Malo ia māeʻaeʻa ona galueaʻiina le latou oganuu tofia ma ausia se tulaga e mafai ai foʻi ona tatou faapea atu e pei o le aposetolo o Paulo: “Ua lē o toe iai foʻi ni oganuu ou te leʻi talaʻi ai.”—Roma 15:23.
7. O ā tiute tauave o le tagata e tofia e taʻimua i le vaega mo le auaunaga i le fanua?
7 Le Faafoeina o Faatasiga mo le Auaunaga i le Fanua: E ao i le tagata e tofia e vaaia le faatasiga lenei ona faaalia le faaaloalo loloto mo lenei faatulagaga faale-Atua e ala i le sauniuni lelei. E tatau ona amata faatasiga nei i le taimi tonu ua faatulagaina, ia manino ona taʻu atu ai mea e ao ona fai ma ia pupuu, i le va o le 10 ma le 15 minute. E tatau i le taʻimua ona iā te ia le oganuu e galueaʻiina a o leʻi amataina le faatasiga. E ui e lē manaʻomia ona faatali i tagata e tuai mai pe a māeʻa le faatasiga mo le auaunaga i le fanua, o se mea lelei pe a tuu se faasilasilaga po o fea o galulue ai le vaega. E tatau i tagata uma ona agaʻi i le oganuu o le a galueaʻiina i le taimi lava e uma ai le faatasiga. A lelei ona faamaopoopo le faatasiga mo le auaunaga i le fanua ma manino ona taʻu atu ai le mea e fai, e mautinoa o le a iloa uma ai e tagata le mea e fai mo le faataunuuina o la latou faiva i lenā aso.—Faata. 11:14.
8. O ā auala e lagolago atu ai i latou e auai i le faatasiga mo le auaunaga i le fanua iā i latou e taʻimua?
8 Auai i Faatasiga mo le Auaunaga i le Fanua: E tāua tele le felagolagomaʻi. (Epe. 13:17) Pe a talafeagai, o le tagata e faamaopoopoina le vaega e fesoasoani i so o se tasi e manaʻomia se isi la te galulue faatasi. O se mea lelei pe a iai tagata talaʻi ua iai le poto masani ina ia fesoasoani i le vaavaaia o tagata talaʻi fou ma leai se poto masani. O i latou e loto malilie e tofi atu e galulue ma tagata eseese, mai i lea taimi i lea taimi, e tele mea lelei e mafai ona latou faataunuuina. (Faata. 27:17; Roma 15:1, 2) E ao i tagata uma ona taumafai malosi e tausi taimi aua le tuai. O lo tatou faaaloalo i lenei faatulagaga faale-Atua ma le manatu mamafa i o tatou uso ma tuafāfine Kerisiano, o le a uunaʻia ai i tatou e fai ni fetuutuunaʻiga talafeagai e tusa o lenei fuafuaga.—2 Kori. 6:3, 4; Fili. 2:4.
9. O ā ni auala aogā e lagolagoina ai e paeonia lenei fuafuaga?
9 Lagolago a Paeonia: E tāua tele le lagolago a paeonia i faatasiga mo le auaunaga i le fanua ma e faalaeiauina ai foʻi isi. E lē fesiligia le tele o tiute tauave o paeonia. E ese mai le faia o suʻesuʻega faale-Tusi Paia ma le faia o toe asiga, e ono aofia ai i a latou faasologa o mea e fai i aso taʻitasi le faia o tiute mo le tausia o le aiga ma se galuega totogi. E lē faatalitalia la paeonia ia iai i faatasiga uma lava mo le auaunaga i le fanua lea e faatulaga e le faapotopotoga, aemaise lava pe a fai i aso uma. Peitaʻi, e talafeagai mo paeonia ona lagolago i nisi o faatasiga mo le auaunaga i le fanua i vaiaso taʻitasi. E mafai ona avea faatasiga mo le auaunaga i le fanua o se toleniga mo sui o le faapotopotoga, ma e telē se sao o le malamalamaga i le Tusi Paia ma le poto masani o paeonia e fesoasoani ai i isi. O lo latou auai e lē aunoa i le faiva i le fanua ua latou maua ai le poto masani i le faiva. E mafai la ona faasoa atu nei tomai. O lo latou auai ma le maelega i le faiva ma faatasiga mo le auaunaga i le fanua ua avea ai i latou ma faaaʻoaʻoga lelei i isi. Ma e matuā talisapaia tele lo latou auai i faatasiga mo le auaunaga i le fanua.
10. Aiseā e tāua ai i tagata talaʻi uma o le Malo ona lagolago ma le lotoatoa i lenei faatulagaga?
10 E pei lava ona sa iai i le taimi o Iesu ma ona soo, o se vaega tele o la tatou galuega talaʻi o le Malo o loo faataunuuina e ala i le molimau atu mai i lea fale i lea fale. O le fuafuaga la o faatasiga mo le auaunaga i le fanua o le fetufaaʻi ai o faalaeiauga ma auala aogā mo le faatinoina o lenei galuega. E ao i tagata talaʻi uma o le Malo ona lagolagoina nei faatulagaga faale-Atua i le mea sili e mafai ai. (Galu. 5:42; 20:20) Tau ina ia tatou taʻitoʻatasi ma fai ni fetuutuunaʻiga e manaʻomia ina ia lagolagoina ai faatasiga mo le auaunaga i le fanua. O lo tatou faia faapea, e mautinoa lo tatou maua ai o le lagolago mai a Ieova ma e faafiafiaina ai le finagalo o le tatou Taʻitaʻi, o Iesu Keriso, a o tatou talaʻia le tala lelei o le Malo o le Atua.—Mata. 25:34-40; 28:19, 20.