Ia Maua Aogā Mai i Faatasiga mo le Auaunaga i le Fanua

1. E faapefea ona aogā iā i tatou faatasiga mo le auaunaga i le fanua?

¹ Afai e lelei ona faatulaga faatasiga mo le auaunaga i le fanua, e mafai ona saunia ai faalaeiauga ma taʻiala aogā a o tatou leʻi auai atu i le faiva. E maua ai avanoa tatou te galulue faatasi ai ma isi tagata talaʻi i le molimau atu, e tatou te fefaasoaaʻi ai ma lagolago le tasi i le isi mo lo tatou toleniga. (Faata. 27:17; Fai. 4:9, 10) O le ā e mafai ona tatou fai ina ia aogā atoatoa ai iā i tatou nei faatasiga?

2. O ā nisi o mea e ao i lē o taʻimua ona mafaufauina?

² O Lē e Taʻimua: E lē masani ona muaʻi faailoa maia ni manatu maʻoti e talanoaina i faatasiga nei. O le mea lea e manaʻomia ai sauniuniga lelei pe afai o oe e taʻimua. Aua le talanoaina le mau o le aso i taimi uma, ae mafai ona e faaaofia i nisi taimi i le talanoaga pe afai o fesootaʻi atu i le faiva. Ia manatunatu i fautuaga aogā e mafai ona e avatu iā i latou o le a talaʻi i lenā aso. Mo se faaaʻoaʻoga, e te ono talanoaina pe faataʻitaʻi se taulimaga. E te ono filifili e autalu se manatu mai le tusi Reasoning, le tamaʻi tusi Le Auala e Amata ma Faaauau ai Talanoaga Faale-Tusi Paia, le tusi Aʻoga o le Faiva, po o se vaega na talanoaina i se Sauniga o le Auaunaga talu ai nei. I nisi taimi, e te ono talanoaina le auala e taulima ai se faafitauli e tulaʻi mai i le fanua, ia pe e te talanoaina foʻi le auala e ati aʻe ai le fiafia ma amata ai ni suʻesuʻega faale-Tusi Paia, aemaise pe afai e toʻatele nisi o le a ō e fai toe asiga. Po o le ā lava le mea o le a talanoaina, ae ia naunau ma faalaeiau atu.

3. O le ā le umi o le faatasiga lenei, ma o ā mea e ao ona māeʻa uma i le taimi lenā?

³ Ia amata le faatasiga i le taimi saʻo, e tusa lava pe e te iloa o loo ō mai nisi ae e leʻi taunuu mai. Ia lelei le faautaga i le faatulagaina o le ʻautalaʻi, ma saunia se oganuu mo i latou e manaʻomia. O le umi o le faatasiga ia lē sili atu i le 10 i le 15 minute po o le faapuupuu foʻi pe afai e sosoo mai ai ma se sauniga a le faapotopotoga. A o leʻi faaiʻuina le faatasiga, ua tatau ona iloa e tagata uma po o ai la te galulue ae po o fea foʻi e galulue ai. E ao ona faaiʻu le faatasiga i se tatalo.

4. O le ā e mafai ona fesoasoani i tagata uma ina ia maua aogā mai faatasiga mo le auaunaga i le fanua?

⁴ E Mafai Ona Outou Fesoasoani: E pei lava o sauniga a le faapotopotoga, tatou te faaalia le faaaloalo mo Ieova ma le manatunatu i isi e ala i le taunuu a o leʻi amataina le faatasiga. Ia fai se sao i le talanoaga. E mafai ona tuu i lē o taʻimua e tofia se tasi lua te galulue, ia po o le muaʻi faatulaga o au lava fuafuaga a o leʻi oo i le aso o le faatasiga. Afai e te manatu e fai au lava fuafuaga, taumafai malosi ia “tatala” pe faalautele atu, e ala i le galulue ma tagata talaʻi eseese, na i lo le galulue ma au uō i taimi uma lava. (2 Kori. 6:11-13) A māeʻa loa le faatasiga, ʻalofia le toe sui o le faatulagaga ua iai, ma ia vave ona agaʻi atu i le oganuu.

5. O le ā le fuafuaga o faatasiga mo le auaunaga i le fanua?

⁵ O le fuafuaga o faatasiga mo le auaunaga i le fanua e tutusa lava ma sauniga a le faapotopotoga. Ua faatulaga ina ia tatou ‘manatunatu ai le tasi i le tasi ma taufaatupu ai le alofa ma galuega lelei.’ (Epe. 10:24, 25) Afai tatou te taumafai malosi ia maua aogā mai nei faatasiga, o le a fesoasoani iā i tatou i le faia o la tatou faiva, lea e mautinoa lava o se ‘galuega lelei’!