Pusa Fesili

◼ O ā faamatalaga e tatau ona tuuina atu i faatasiga mo le auaunaga i le fanua?

O le fuafuaga o le faatasiga mo le auaunaga i le fanua, ina ia fesoasoani iā i tatou e tepa taulaʻi atu ai i le galuega lea o le a faia—le faiva. O lea la, e tatau i lē o taʻimua ona sauniuni lelei ma nofosauni e avatu se manatu e faalaeiau, e patino, ma aogā. Afai e fetaui lelei le mau o le aso ma le galuega talaʻi, e mafai ona faitauina ma ia talanoa puupuu i ai. Ae peitaʻi, o le faatasiga e tatau ona uaʻi muamua lava i le galuega lea o le a faia, e fesoasoani ai iā i latou uma o ē o le a ō i le galuega molimau atu ina ia sauniuni lelei mo le faataunuuina o le faiva i lenā aso.—2 Timo. 4:5.

E mafai ona talanoaina manatu talafeagai mai La Tatou Faiva o le Malo ina ia iloa ai e tagata uma le ofo o loo faia ma le auala e ofoina atu ai. I le Aso o Mekasini, e mafai ona faataʻitaʻi se taulimaga mai “Le Tala e Fai Atu e Uiga i Mekasini.” Mo isi tauiviga, e mafai ona faamatilatila se faatomuaga se tasi po o se lua e talafeagai ma lau oganuu mai le tamaʻitusi, Amata ma Faaauau ai Talanoaga. E mafai ona talanoaina pe faataʻitaʻi se vala o le faiva, e pei o le auala e faaaogā ai le Tusi Paia i le fale, le auala e taulimaina ai ni manatu e ono tulaʻi mai e mafai ona taofia ai se talanoaga, le auala e ofo atu ai se suʻesuʻega faale-Tusi Paia, po o le auala e toe asia ai tagata fiafia.

O faatasiga mo le auaunaga e lē tatau ona silia i le 10 i le 15 minute, lea e aofia ai ma le faamaopoopoina o vaega, tofiaina o oganuu, ma le faia o se tatalo. Pe a taape, e tatau i tagata uma o loo auai ona iloa po o ai a latou paga ma o fea foʻi o le a latou galulue ai, ma e tatau loa ona vave ō atu i le oganuu. Pe a fua atu i le puupuu o le feiloaʻiga, e tāua mo tagata uma ona taunuu tonu atu i le taimi. Pe afai e sosoo se feiloaʻiga mo le auaunaga i le fanua ma se sauniga a le faapotopotoga e pei o le Suʻesuʻega o Le Olomatamata, e tatau ona faapuupuu atili. E lē manaʻomia ona talanoaina le mau o le aso, talu ai ua māeʻa se talanoaga manaia faale-Tusi Paia.

E tatau ona tofia mamao se uso agavaa papatisoina e faia faatasiga taʻitasi mo le auaunaga. Afai e leai se tasi e avanoa e taʻimua i se aso, e ao i toeaina ona tofia po o ai tuafāfine papatisoina e mafai ona latou faia faapea pe a tulaʻi mai se manaʻoga. A o nofoi pea, e mafai ona amata e le tuafafine le talanoaina o le mau o le aso po o nisi manatu e fetaui ma le auaunaga i le fanua, ae ia faapuupuu ana faamatalaga. E tatau ona ufiufi lona ulu.

O faatasiga mo le auaunaga i le fanua, o ni avanoa sili ona lelei na mo i tatou e faalaeiauina ma faaauupegaina ai ina ia faia se sao i le faiva. O le sauniuni lelei o lē o le a taʻimua, o le a tele ai foʻi aogā e maua e tagata uma.