Talavou e, la Tautai ma le Poto o Outou Ala
1 E naunau patino mai lo tatou Tamā, o Ieova i le agaʻigaʻi i luma faaleagaga o talavou. O le faalogo atu ma le atamai i ana poloaiga alofa, o le a lē gata ina faafiafia ai lona finagalo e talavou, ae o le a faafouina ai foi o latou agaga. (Faata. 27:11; Mata. 11: 28-30) Ua latou tuu atu ia Ieova na te saunia ni faatonuga poto mo o latou ala.—Faata. 16:9.
2 Sa faataatia e Iesu Keriso se faaaʻoaʻoga a o talavou, i le avea ma sē na finagalo malie i ai le Atua ma fiafia i ai tagata. (Luka 2:52) E ao foi i talavou i aso nei ona tauivi ina ia faia lea lava mea. O le tautaiina ma le poto o ala o se talavou e ao ona faamaonia i lona tuliloaina o mea faaleagaga. Ina ua 12 tausaga o Iesu, sa lauiloa o ia i lona faanaunauga e tautala atu i isi e uiga ia Ieova. (Luka 2:46,47) Ua faaalia foi e talavou i aso nei se faanaunauga faapena, e faamatala atu lo latou faatuatua i isi.—w-E 7/1/90 itu. 29-30; w-E 12/1/87 itu. 21.
3 O le ā e mafai ona fai e outou talavou i le taimi lava lenei aemaise i masina o loo fotuai mai, ina ia “ava [ai] ia Ieova i lou oa”? (Faata. 3:9) Aiseā e le faatele ai le taimi e masani ona e faaalu i le galuega talaʻi ma le aʻoaʻo atu o le tala lenei, pe avea foi ma se paeonia lagolago? Atonu o le a e maofa i le faateleina o le olioli ma isi aogā e masani ona tafe mai, ona o le tele o se sao e faia i le faiva. O le a avatu ai foi ia te outou le avanoa e galulue faatasi ai i le auaunaga i le fanua ma se vaega e sili atu ona toatele o isi tagata talaʻi. E mafai foi ona e amata i le taimi nei e ala i le valaaulia o se tagata talaʻi e toatasi pe toalua ua lava le tomai ina ia tou galulue faatasi i le faaiʻuga o lenei vaiaso.
4 E mafai e mātua ona avatu le anoanoai o faalaeiauga ma fesoasoani i a latou fanau e ala i le faia o ni faataʻitaʻiga i nisi taimi, e faaopoopo atu i lo latou ō faatasi ma i latou i le faiva. E mafai e isi tagata taʻumatuaina i le faapotopotoga ona tausolomua i le fai atu i ē talavou ina ia latou galulue faatasi i le faiva i lea fale ma lea fale, ma le faia o toe asiga ma suesuega faale-Tusi Paia. O le aufaatasi vavalalata ma na tagata talaʻi malolosi faaleagaga o le a faalaeiauina ai ē talavou ma fesoasoani ia i latou ina ia ‘matuā oo atu i le taʻumatuaina.’—Epe. 6:1.
5 E manaomia i Kerisiano uma lava ona faaleleia o latou tomai i le aʻoaʻo atu. E aofia ai foi ma talavou. Po o sauniuni maeʻaeʻa ea outou talavou mo tofiga atonu e faaeaina ai outou e faia i le Aʻoga o le Faiva Faatiokarate? Po o iai ea sa outou faasologa e lē aunoa mo le faitau ma suesuega totino, atoa ma le mafaufau loloto i mea ua aʻoaʻoina? Po o tou nofo sauni ea e faatatau ia te outou lava le mataupu o loo tou talanoaina? Po o tou sauniuni lelei ea mo sauniga ina ia outou malamalama atoatoa ai i le mataupu ma sauni e fai atu i ai ni manatu? Po o tou faia ea ni faamaumauga o manatu tāua e faamatalaina i le sauniga ma taumafai e faaaogā manatu o loo aumai i La Tatou Faiva o le Malo?
6 Aua le ʻalo mai avanoa e saosaolaumea ai i le faamamāina o le Maota o le Malo ma ia fesoasoani atu i uso ma tuafāfine ua matutua po o ua mamaʻi i ni feau e fai po o nisi lava auala e aogā. Aua neʻi galo le faia e lē aunoa o ni a outou lava meaalofa ina ia fesoasoani ai i tupe faaalu mo le Maota o le Malo ma le galuega a le Sosaiete i le lalolagi aoao.
7 Afai e ‘leoleoina pea i tatou e tusa ai ma le afioga a Ieova’ ma tuu atu ia te ia na te tautaiina o tatou ala, ona ia taʻitaʻia lea o i tatou i le fiafiaga ma faaeaga faateleina o le auaunaga.—Sala. 119:9.