Polokalama Fou mo le Aso Faapitoa o le Fonotaga
1 O la tatou suesuega o le tusi The Greatest Man Who Ever Lived ua faateleina ai lo tatou talisapaia o Iesu Keriso. Ua talafeagai ai la le polokalama mo le aso faapitoa o le fonotaga e amataina ia Setema, lea o le a talanoaina ai le matua “Ia Mulimulitui i Lo Tatou Faaaoao Sili,” e fesoasoani ia i tatou e matuā malamalama atili ai i le uiga o le mulimuli atu ia te ia.
2 Po o le ā lava le matua po o le umi talu ona iai i le upu moni, ae o ē uma e auai i le fonotaga o le a faalaeiauina ina ia matuā faapei o Keriso. O se tasi o vaega o le polokalama o le a faatomua ai fautuaga e patino mo talavou. O le a faaauupegaina ai i latou ina ia fesagai ma lui i tulaga o aʻoaʻoga, i faafiafiaga, ma le matapeapea i meafaitino. O le a iai lauga, o tala i mea tutupu, ma faataitaiga e faamatilatila ai le auala e teena ai taaʻiga a le lalolagi ae tatou faataitai atu ia Keriso.—1 Pete. 2:21.
3 O le a iai foi i tagata fou ua tuuina atu le avanoa e faailoa faalauaitele atu ai e ala i le papatisoga, o i latou o soʻo o Keriso. O le a faia muamua se lauga aasa faale-Tusi Paia e talanoaina ai lea mataupu a o leʻi faia le faatofuina. O i latou o loo faanaunau ina ia papatiso i le aso faapitoa o le fonotaga e ao ona faailoa atu lo latou manaoga i lo latou ovasia taʻitaʻi, ina ia lava ai se taimi na te fuafuaina ai ni toeaina e autaluina fesili ma tagata o le a papatiso.
4 O le a tauaaoina e le failauga o le a avea ma malo i le fonotaga, le lauga autū o lona matua “Mulimuli atu i Lo Tatou Faaaoao Sili—O le ā ua Taitaiina atu i ai i Tatou?” Ia mautinoa ua valaaulia tagata fiafia uma mo lenei polokalama e faalaeiau ma faamalosia ai le faatuatua. E leai lava se isi ala e sili ma tele atu sona faamanuiaina, na i lo o le mulimuli atu i lo tatou Faaaoao Sili, o Iesu Keriso.—Mata. 19:27-29.