Polokalama Fou o le Fonotaga o le Aso Faapitoa

¹ Aisea e ao ai ona tatou folafola atu le tala lelei ma le lē mapu? O ā mea manaomia ia agavaa ai e avea o se tagata talaʻi o le tala lelei? E mafai faapefea e oo lava i tagata matamumuli ona tausolomua i le tufaina atu o le tala lelei i isi? O nei fesili ma isi fesili faatupu manatu o le a taliina i le polokalama o le fonotaga o le aso faapitoa lea o le a amata ia Setema, o le matua, “Taʻuagavaaina o ni Faifeau o le Tala Lelei.”—Faatusatusa i le 2 Korinito 3:5.

² Ona o i tatou o tagata o Ieova, e ao ai ona tatou faaeteete i a tatou amio. O ni mea na tutupu e faalaeiau ai, o le a faamatalaina e ni talavou e uiga i le auala na mafai ai ona latou tetee atu i omiga mai a latou tupulaga. O le a saunia mo mātua ni faalaeiauga alofa e faatatau i le manaomia ona toleni a latou fanau e avea o ni faifeau a le Atua. O le a fesoasoani ia i tatou uma ina ia talisapaia le manaoga e tatau ona talaʻi faapea ma faamanuiaga o le a maua e i tatou faapea ma i latou o ē e faalogo mai ia i tatou.—1 Timo. 4:16.

³ Ma le mautinoa, o le papatisoga o le a avea ma tumutumuga o le aso. A o lei faia le papatisoga, o le a fofogaina ai se lauga e faavae mai i le Tusi Paia, e faasino saʻo atu lava i tagata fou ua tuuina atu. O le mea moni, o i latou uma lava e auai o le a mananao e faalogologo lelei a o talanoaina le mataupu i le papatisoga ma faamaninoina mai lona uiga. O nisi o le a mananao e papatisoina i le fonotaga o le aso faapitoa, e tatau ona faailoa mamao atu i le ovasia taʻimua ina ia lava ai lona taimi e faia ai se fuafuaga mo ni toeaina e talanoaina fesili ua fuafuaina ma sui o le a papatiso.

⁴ O le isi tumutumuga o le aso, o le lauga autū o le a fofogaina e se failauga asiasi. O le matua, “Taʻuagavaaina ma Faaauupegaina o ni Faifeau a le Atua.” E fa ni sauniuniga autū e faaauupegaina ai i tatou e avea o ni faifeau o le a talanoaina, ma o le a aofia ai i le lauga ni tala i ni mea na tutupu e faatupuina ai le faatuatua.

⁵ Ia fuafua nei ina ia auai i le polokalama atoa. Ia mautinoa ua valaaulia tagata loto fiafia ma tagata aʻoga o le Tusi Paia ina ia maua ai foi e i latou aogā i lenei aso o aʻoaʻoga faatiokarate. I lenei auala ua mafai ai ona tatou mautinoa “ua matuā taʻuagavaaina” i tatou e avea o ni faifeau o le tala lelei.