Polokalame Fou mo le Aso Faapitoa o Fonotaga

“Ia Faia Mea Uma Ona o le Tala Lelei,” o le matua lena o le polokalame fou o le aso faapitoa o fonotaga lea o le a amata ia Setema. (1 Kori. 9:23, NW) O le tala lelei o le Malo, o se tala aupito sili lea ona tāua ua faalogoina i aso nei. O le a fesoasoani le polokalame ia i tatou e talisapaia le faaeaga tutasi ua tatou maua i le avea o ni ē talaʻia atu lenei tala lelei matagofie. O le a faamalosia atili ai foi i tatou e folafola atu ma le lē mapu le tala lelei.—Galu. 5:42.

O le a faailoa mai ai ia i tatou e le polokalame le auala e faaaogā atoatoa ai lo tatou toleniga faatiokarate ina ia mafai ai ona tatou faataunuuina le tele o mea i le faiva. O le a tatou faalogologo ai i nisi o i latou o ē na faia ni fetuutuunaiga ina ia faalautele atu ai la latou auaunaga, e aofia ai ma tagata talavou o ē o loo faia a latou taumafaiga silisili ina ia faalautele atili atu ai le tala lelei.—Faatusatusa i le Filipi 2:22.

O le lauga autū, o le a fofogaina atu e se failauga asiasi mai, o le a faamamafaina ai le manaoga ina ia tumau ona ‘taʻuagavaaina ina ia tausia faamaoni le tala lelei.’ (1 Tesa. 2:4) O le a tatou maua le fesoasoani ina ia iloa ai, afai tatou te mananao e taofimau i le faaeaga o le faia o se sao i le tufaina atu o le tala lelei i isi, e tatau la ona faaauau ona tatou ausia mea e manaomia ma tapulaa a le Atua, e tusa ai ma o tatou mafaufauga ma amioga. O le a faamatilatilaina ai foi faamanuiaga e tatou te mauaina mai le faia o lenei mea.

Aua neʻi misia lenei polokalame tāua. O tagata fou ua uma ona tuuina atu o ē mananao ia papatisoina i le aso faapitoa o fonotaga, e tatau ona faailoa atu loa i le ovasia taimua. Ia valaaulia tagata uma o ē o loo tou suesue ina ia auai. Seʻi tuu atu ia Ieova na te faamalosia i tatou ina ia faia mea uma mo le tala lelei, ma i lea ua faaiuina ai le galuega aupito sili ona telē a o lei oo mai Amaketo.