Le Olomatamata ma le Awake!—O ni Mekasini o le Upu Moni
1 Ua faamanatu mai ia i tatou e Le Olomatamata o Ianuari 1, 1994, i le itulau e 22 e faapea, ua lomia e a tatou mekasini ni “mataupu e fetaui lelei ma puea ai manaoga moni o tagata.” Tatou te mananao e faatele le tufaina o nei mekasini. Ia Aperila ma Me, o le a faatomua ai e Le Olomatamata ma le Awake! le ofo mo na masina ma so o se polosiua seʻi vaganā ai le polosiua o le Aʻoga.
2 O le galuega mai lea fale i lea fale ua tatou maua ai le avanoa sili e tuuina atu ai nei mekasini. O talaʻiga lē fuafuaina uigā, ma toe asiga, e iu foi i le tuuina atu e lē aunoa o mekasini. O galuega i magaala ma asiasiga i fale faigaluega i a tatou oganuu, ua avea foi o ni auala aogā e faatele ai le tufatufaina atu o lomiga.
3 Mataupu e Talanoaina: O Le Olomatamata o Aperila 1 o loo iloiloina ai mataupu “Se Lalolagi e Sili atu ona Lelei—Pe ua na o se Miti?” ma “Se Lalolagi e Sili atu ona Lelei—Ua Lata Mai!” Ua mautinoa o lenei lomiga ua tausisi atu i le autū o mekasini o le faasilasilaina lea o le Malo o le Atua. Ua faaiu mai le mataupu lona lua i le faaalia mai o le auala e avea ai le parataiso e faavavau ma mea moni i lalo o le pulega a Iesu Keriso.—Luka 23:43.
4 “O Fea e Mafai ona E Maua ai Taiala Maufaatuatuaina?” o le fesili ua talanoaina i le lomiga o Aperila 15. O le a faalautele e lomiga o Me lenei mataupu, i mataupu “Po o Faamalieina e Lotu Ou Manaoga?” ma “Aisea e Faitau ai le Tusi Paia?” E mafai ona tatou amata ni talanoaga faigofie ma ē ua lagona le leai o se uiga ma se faamoemoe o o latou olaga.
5 Faateleina Mekasini e Tuuina Atu: Na aumai e Le Olomatamata o Ianuari 1 ni fautuaga se fa e faateleina ai mekasini e tuuina atu. Ua faalaeiauina i tatou (1) ia naunau i mekasini. Pe a faitauina mekasini, e ao ona tatou mafaufau i ni mataupu e fiafia tele i ai tagata o la tatou oganuu. E lē gata i lea, afai e masani ona tatou ō ma ave mekasini, atonu la o le a mafai ona tatou tuua i a tatou uo i galuega, o tatou tuaoi, faiaoga, uo i le aʻoga, po o tagata foi e faatau.
6 Sa toe faamanatu mai foi ia i tatou (2) ia faafaigofie a tatou taulimaga. Ia fili se manatu tāua ona faapuupuu atu lea i au lava upu. A mafai ona e tuua se mekasini i se aiga, o le a mafai e le mekasini ona faia le “talanoaga” i le tagata sa e feiloai i ai po o isi foi tagata o le aiga.
7 O le isi manaoga (3) ia fetuutuunai. E lelei lou manatua o ni mataupu eseese e talanoa i ai—o se tasi mo talavou, se isi mo tamaloloa, ma se isi foi mo fafine.
8 Ma mulimuli, e manaomia ona tatou (4) faatū se sini totino mo a tatou mekasini e tuuina atu. Talu ai e leai se numera faatapulaaina e faatuina e le faapotopotoga, o lea, e mafai lava e i tatou taitoatasi ona faatutu o tatou lava sini. O le a aumaia ai e lenei mea ia i tatou le matuā tinou ma le maelega i le ofoina o mekasini. Afai e fai ni a tatou ota tumau mo mekasini e manaomia, atonu o le a uunaia ai i tatou e taumafai atili.
9 Tatou te mananao ia iloa e isi le Malo o le Atua. Ia tatou faaaogā atoatoa fesoasoani aogā ua saunia e mekasini e faalautele ai le feau o le Malo.—Mata. 10:7.