E Faasilasila e Mekasini le Malo
1 Ona o ni Molimau a Ieova, ua lauiloa ai i tatou i lo tatou talaʻi atu ma le maelega le Malo o le Atua. O mekasini o Le Olomatamata ma le Ala Mai! ia tatou te tufatufaina atu, o loo faia se matafaioi malosi i le fesoasoani atu i le faitau miliona o tagata ia iloa fuafuaga a le Atua. O le feau o loo iai i mekasini o se tala lelei moni lava, auā o loo faasilasila atu ai le Malo faalelagi o le Atua ua na o lea le faamoemoe mo tagata.
2 Ua talafeagai lelei mekasini ma manaoga moni o tagata—i faalogona ootia, le olaga masani, ma le faaleagaga. I le paʻū maulalo o amioga tatau ma tulaga tāua faaleaiga i so o se mea i le lalolagi aoao, ua fesoasoani ai Le Olomatamata ma le Ala Mai! i tagata ina ia faaleleia le tulaga o loo ola ai o latou olaga e ala i le faailoa atu ia i latou o le auala e faatatauina ai mataupu silisili o le Tusi Paia. O le a avea o se fiafiaga ia i tatou le faatomuaina o mekasini ia Aperila ma Me.
3 E Matuā Faatosinaloto Lava Mekasini: Ua maua Le Olomatamata ma le Ala Mai! i gagana a le toetoe lava o tagata uma o le lalolagi. Ona o lenei mea, ua lauiloa ai a tatou mekasini. O nisi nei o mafuaaga ua tosina mai ai tagata i mekasini:
◼ Ona o ni mekasini e faamaoni ma o loo iai le upu moni, ua faaalia manino atu ai le eseesega i le va o le lelei ma le leaga.
◼ O loo aumaia ai i mekasini le faamoemoe e uiga i se parataiso amiotonu o loo fotuai mai, e faavae i le folafolaga a le Atua e aumaia le lalolagi i lalo o le pulega a lona Malo.
◼ O loo aumaia ai le anoanoai o mataupu talafeagai, e tosina atu i ai loto o tagata o so o se talaaga ma aganuu eseese.
◼ E tuusaʻo manatu o mataupu, e aʻoaʻoina ai, o ni mea moni, ma e lē faaituau pe faagutugutulua.
◼ O ata ua matagofie i le vaai e vave lava ona oso ai le naunau, ma le auala manino o loo tusia ai, ua faigofie ai ona faitauina mekasini.
4 Ia Matuā Tufatufa Atu Mekasini: O le uigā i le tufatufaina atu o mekasini, e faalagolago tele i lo tatou filigā i le sauniunia o a tatou taulimaga, le faia o se faasologa o o tatou taimi, ma le faamaopoopoina o la tatou galuega talaʻi. Sa aumaia ni fautuaga aogā i lomiga o La Tatou Faiva o le Malo o Setema 1995 ma Oketopa 1996, na e lelei pe a toe autaluina ma faatatauina.
5 Ia E Faamasani i Mekasini: A o e faitauina lomiga taitasi, mafaufau i se tasi o le a manao e ave se kopi. Vaavaai mo ni manatu patino po o ni mau patino e mafai ona e siiina atu i lau taulimaga. Mafaufau i se fesili e mafai ona e fesili atu ai e faamaite ai se talanoaga ma faagaee ai le fiafia i le mataupu.
6 Faafetaui Atu le Taulimaga i le Tagata: Ia sauni se taulimaga e faigofie, e mafai ona fetuutuunai mo se tamaloa, se fafine, se tagata ua matua, po o se talavou, e tusa lava pe e te masani ai po o se tagata ese.
7 Ia Mataalia e Ofo Le Olomatamata ma le Ala Mai!: Ona e faigofie ona ofi mekasini i se ato taʻitaʻi, sina tamai ato asoa po o le taga o le ofu, e mafai lava ona tatou aveina ni kopi pe a tatou faimalaga pe ō e faatau. Ofo mekasini pe a talanoa atu i tauaiga, tuaoi, tagata e faigaluega faatasi, ē e aʻoʻoga faatasi, po o faiaʻoga. Ia faataatia ese se aso i vaiaso taitasi mo le molimau atu e ala i mekasini.
8 Ia Faaalia le Talisapaia mo Mekasini: E tumau pea le aogā o mekasini. O le mavae atu o taimi e lē faaitiitia ai le tāua o le feau o loo iai. O le mea moni, afai tatou te faia se taumafaiga faapitoa ina ia tufaina atu mekasini uma o loo ia i tatou, ona lē faaputuina ai lea o mekasini tuai i luga o a tatou fata.
9 E Aogā le Molimau Atu i Ala Tetele: O se tasi lenei o auala e sili atu ona lelei e ofoina atu ai mekasini i se vaega toatele o tagata. O nisi tagata talaʻi e galulue e lē aunoa i fetaulaiga ala pisi i aso e fai ai faatauga.
10 E Fuatele Foi Oganuu o Pisinisi: Pe a molimau atu mai lea faleoloa i lea faleoloa, e laitiiti ai ni aiga e lē maua atu i ai ni tagata i le fale. O le tele lava o tagata faipisinisi e amio tausaafia, ma o le toatele e talia ma le fiafia mekasini. Ia faatomua mataupu na e fetaui lelei ma le pisinisi patino lea ua feiloai atu i ai.
11 E Aogā Foi Ālā Mekasini: Ona o mekasini e lomia faalua i le masina, e tatau ai lava la ona toe asiasi atu i tagata o latou faitauina ma avatu i ai isi lomiga e sosoo ai. E tatau ona tatou asiasi atu pea e lē gata ina ia tuuina atu mekasini ae ia atiina ae le fiafia o le tagata i le Tusi Paia. O ālā mekasini, o se auala sili lea ona lelei e maua ai ni suesuega faale-Tusi Paia i se taimi o lumanai.
12 Ia Faaaogā i se Auala Aupito Sili ia Aperila ma Me: Ua matuā talisapaia e le faitau miliona o tagata mea o loo latou faitauina mai mekasini o Le Olomatamata ma le Ala Mai! E aogā tele mekasini i le faasilasilaina o le Malo, e tatau ai ona avea ma o tatou sini le feaveai o ni mekasini ma ofo atu i so o se avanoa lava. Tau ina ia avea masina o Aperila ma Me o ni avanoa iloga mo le tufatufaina atu o mekasini!