Ia Ofo Mekasini i Lau Faiva
1, 2. Ua faapefea ona fesoasoani Le Olomatamata ma le Ala Mai! i olaga o tagata?
1 “E ese le manaia, e talafeagai, ma e faalaeiau ai.” “O ni mekasini e sili atu ona faalaeiauina ai ua faapea ona ou faitau ai.” O nei faamatalaga, ua manino lelei mai ai lagona o le ʻaufaitau i le lalolagi aoao, e uiga i Le Olomatamata ma le Ala Mai! O le mea moni, ua avea a tatou mekasini ma fesoasoani aogā i le faaooina atu o le tala lelei i “tagata uma lava.”—1 Timo. 2:4.
2 Na maua e se tagata faipisinisi se mekasini o le Ala Mai! sa iai se mataupu na faafiafiaina ai o ia. Mulimuli ane, sa ia faitauina foʻi ma le soa o le Ala Mai!, Le Olomatamata, lea sa iai se mataupu na uunaʻia ai o ia e iloiloina lona talitonuga ua leva ona iai i le Tasitolu. Na faaosofia ai lona fiafia i le tapuaʻiga moni. I le ono masina mulimuli ane, ae papatisoina loa o ia. O le isi tamāloa, sa masani ona ia maua mekasini, ae lē faitauina lava. Ae i le isi itu, o lana avā lea e teena Molimau, na te faitauina mekasini ia e tuu e lana tane. Sa faafiafiaina lona loto i folafolaga a le Tusi Paia e uiga i se lalolagi parataiso o le a mau ai tagata amiotonu. Ua latou auauna ma lana tama tama, ma lona uso iā Ieova.
3. O le ā le aogā o le ofo faatasi o mekasini e lua?
3 Ofo Faatasi Mekasini e Lua: E pei ona faaalia i faaaʻoaʻoga na, e tatou te lē mautinoa po o ai o le a faitauina a tatou mekasini, ma po o le ā foʻi o le a faaosofia ai lo latou fiafia i le feʻau o le Malo. (Fai. 11:6) O lea, e aogā ai le ofo faatasi o Le Olomatamata ma le Ala Mai!, e ui lava e masani ona tatou faamatilatila le mekasini e tasi i a tatou taulimaga. I nisi o tulaga, e talafeagai foʻi pe a ofo nisi o lomiga eseese o a tatou mekasini i se asiasiga.
4. E faapefea ona faia sa tatou faasologa i le galuega mekasini?
4 E aogā pe a faatulaga se aso se tasi, o vaiaso taʻitasi e faia ai sou sao i le galuega mekasini. I le 2005 Calendar of Jehovah’s Witnesses, e faatulaga ai Aso Toonai uma o le “Aso o Mekasini.” E moni, e eseese ou tulaga faapea le oganuu, ae ua atofa e isi se isi aso e uaʻi faapitoa atu ai i le tufaina o a tatou lomiga. Po o aofia lea galuega i lau faasologa faalevaiaso?
5. O ā avanoa e ao ona tatou mataala e tufa atu ai mekasini, ma o le ā e fesoasoani iā i tatou ina ia faia ai faapea?
5 Faatū Sou Lava Sini: O le faatū o sou lava sini o mekasini e ao ona tufaina atu i le masina, e fesoasoani iā i tatou e manatu mamafa ai i le tufaina atu o mekasini. O iai sau alāmekasini? Pe e te ofoina mekasini iā i latou tou te feiloaʻi i le talaʻiga? Pe e mafai ona e ofo mekasini i le galuega i ala tetele, i oganuu o pisinisi, ma i nofoaga faitele? Pe e te ave ni mekasini pe a e malaga, fai faatauga, pe alu foʻi e vaai se fomaʻi? Ia faaaogā avanoa talafeagai uma e fesoasoani ai i isi ia maua aogā mai Le Olomatamata ma le Ala Mai!
6. E faapefea ona tatou faaaogā lelei mekasini tuai?
6 E ao foʻi ona fai ma o tatou sini le tufa atu o ni mekasini tuai o iai. E tusa lava pe lē uma ona tufaina atu lomiga o se masina po o ni masina se lua, ae o loo aogā pea faamatalaga o loo iai i na lomiga. Tufa atu i tagata lotofiafia. Ua avea mekasini o Le Olomatamata ma le Ala Mai! i le faitau miliona o tagata, ‘o se upu ua fai faatatauina’ e fai atu i le taimi tatau. (Faata. 25:11) Seʻi o tatou faaaogāina na mekasini e fesoasoani ai i le isi faitau miliona ina ia oo ina iloa Ieova ma auauna iā te ia.