Faaaogā Mekasini e Tufa atu ai le Upu Moni
1 O le tāua o faamatalaga moni ma le faamaoni, ua tele ina lē faatauaina i le sosaiete o tagata i aso nei, ona o le soona faamamafa naʻuā o faasalalauga, folafolaga taufaasese a le au faipolotiki, ma faamatalaga taufaaʻoleʻole faavaomalo. Ua tutasi ai Le Olomatamata ma le Awake! auā e na o le pau ia o mekasini o faailoaina le upu moni e uiga i le Malo o le Atua, ma faamatala atu ai le mea e tatau i tagata uma ona faia ina ia olioli ai i faamanuiaga e faavavau o le a aumaia e lea malo.
2 I se tasi atunuu, sa talisapaia ai e se tasi o alii ofisa o mataupu tau i faamatalaga le tāua o nei mekasini e lua, ma sa fiafia e fesoasoani ina ia maua le faatagaga mo le tufatufaina atu o nei mekasini. Na faapea mai o ia: “Ua ou iloaina o Le Olomatamata o se tasi lea o mekasini e silisili ona lelei; Ou te matuā fiafia tele e fesoasoani atu.” O lo tatou faaeaga le fesoasoani atu i isi, e ala i le tufatufaina atu o nei mekasini auā e mafai ona mauaina ai le poto e maua ai le ola. (Ioa. 17:3) O le a faapefea ona e ofoina atu nei mekasini aogā a o faagasolo Me? Atonu o le a fesoasoani fautuaga o loo mulimuli mai.
3 Afai o loo e faatomuaina mataupu amata i “Le Olomatamata” o Me 15, atonu e te faapea atu:
◼ “O loo matou talanoa i tagata e uiga i le tusi e silisili ona alumia i le lalolagi. Pe e te silafia o le ā lena tusi? [Faatali mo se tali.] O loo matou talanoa e uiga i le Tusi Paia. E tatau lava ona iai se mafuaaga lelei tele ua faatau ai e le toatele o tagata le Tusi Paia. O loo maua lea mafuaaga i le 1 Timoteo 3:16.” A maeʻa ona faitau le mau, ia faamatilatila ni manatu fetaui o i se tasi o mataupu.
4 Po o le uma foi o se faafeiloaiga puupuu, e mafai ona e fai atu se faamatalaga faapenei:
◼ “Atonu sa e matauina i tausaga ua mavae, ua faatuputupulaia le popole o le lalolagi aoao i faafitauli o fesagai ma fanau. O ā ni faafitauli o fanau o e vaaitino i ai i lou vaipanoa, ma e te manatu mamafa foi i ai?” Faatali mo se tali. Faasino i ai nisi o faafitauli toatuga o loo feagai ma fanau i le lalolagi atoa e pei ona talanoaina i mataupu amata o le Awake! o Me 8, ma tataʻi atu i le vaifofo o loo ofoina mai e le Malo o le Atua.
5 I lau lisi o toe asiga, atonu o loo iai foi i latou sa muai faaalia sina naunau itiiti, peitai e leʻi fua mai ai ni iuga. Talu ai e foliga mai o loo itiiti sina naunau, atonu ua e manatu ai e te lē toe foi i ai. Peitai, atonu e mafai ona e faaaogā lenei lisi e atiina aʻe ai se ālā mekasini. Pe a e iloa se mataupu e te lagona e ono tosina mai ai lena tagata, ia mautinoa lou toe asia o lena tagata ma ofo i ai le mekasini.
6 Talaʻi Lē Fuafuaina: O le auala lelei tele lena e atiina aʻe ai le naunau o tagata i mekasini. O le faaalia atu ma le faautauta o faavaa faatosina mata, ua lava lea e amata ai se talanoaga. Sa tuu e se tasi tuafafine mekasini i luga o lana laulau ina ia mafai ona vāai i ai isi o le aufaigaluega o loo feoai solo; ma sa mafai ona ia tufaina atu ai ni mekasini. Ia fai ma masani le ave o ni kopi, ma ia tausolomua i le ofoina o mekasini i lenei masina pe a e alu e te faatau, alu i le aʻoga, malaga i le pasi, pe e te fetaui foi i ni tagata i so o se mea.
7 Ua tatou maua tali i fesili aogā e uiga ia Ieova ma lana tapuaiga ona o le fesoasoani a Le Olomatamata ma le Awake! Tatou te mananao e faaaogā nei mekasini i so o se auala talafeagai, e fesoasoani ai i isi ina ia latou iloa “Ieova le Atua o le upu moni.”—Sala. 31:5, NW.