Po o Tele ea Lau Lūlū?
1 E iai se faaupuga e faapea: “O le tele o le malosi e te faaalu i se mea, o le tele foi lena o mea e te maua mai ai.” E matuā saʻo lelei lenei manatu ae maise lava i la tatou tapuaiga. O le tele o taimi ma taumafaiga tatou te faaalu i le sauniuni mo sauniga, talaʻia o le feau o le Malo, ma le faaalia o le alofa mo o tatou uso, o le tele foi lena o mea o le a tatou maua i le tuputupu aʻe faaleagaga. E matuā saʻo foi lava le tuufaafeagai o lena mea. Afai tatou te faapelepele ia i tatou lava, pe faalotolotolua i mea tatou te faia, pe mafai moni ea ona tatou faatalitalia ni iuga e faamalieina ai?
2 Na lelei ona taʻua e le aposetolo o Paulo le mataupu silisili i le 2 Korinito 9:6: “O le ua itiiti ana saito e lulu, e itiiti foi ana e selesele mai; a o le ua tele ana e lulu, e tele foi ana e selesele mai.” Po o tele ea lau lūlū?
3 Suesuega Totino Faale-Tusi Paia: Ina ia avea ma faifeau e fuatele mai, e ao ona tele le lūlū muamua i a tatou suesuega totino. Ia tatou naunau mo meaai faaleagaga. (Sala. 119:97, 105; Mata. 5:3) O le tausia o mea o le olaga nei o omia ai i tatou, e ō faatasi ma se taumafaiga mataalia e atiina aʻe se naunau moni i o tatou manaoga faaaleagaga. O le toatele o i tatou e manaomia ona “faaaogā tatau le taimi.” (Efe. 5:16, NW) Ua fuafua nisi e alapo i ni aso patino e fai ai a latou suesuega totino. O isi ua faaavanoa ni afiafi mo lena fuafuaga. I le ā le auala tatou te selesele mai ai mea e tele? Tatou te maua ai se faatuatua malosi, se faamoemoe pupula, se mafaufau mautinoa ma sili atu ona olioli.—Roma 10:17; 15:4; 1 Pete. 1:13.
4 Sauniga a le Faapotopotoga: I le Salamo 122:1, na taʻua e Tavita: “Na ou fiafia ina ua latou fai mai ia te au, Tatou te o i le fale o Ieova.” Pe faapena lou lagona? O le tele o le lūlū, o le auai lea e lē aunoa i a tatou sauniga faalevaiaso e lima. Ia faia lau faaiuga e aua neʻi avea le lē lelei o le tau e taofia ai oe mai sauniga. E masani lava, o le tele o faafitauli tatou te foia, o le sili atu foi lena ona tele o faamanuiaga tatou te maua.
5 Ia vave taunuu ma ia faatuatuai ona ō ese pe a maeʻa le sauniga ina ia e auai i talanoaga e atiina aʻe ai ma o tatou uso. Ia faalautele atu au aumea ia faaaofia ai le toatele o tagata eseese pe a mafai ai. Ia sauniuni lelei mo le Suesuega o Le Olomatamata ma isi sauniga e mafai ai ona tele lau lūlū i au tali pe a maua lou avanoa. E ala i lou “faasūsū” o isi i sauniga, o le a “faasūsūina” ai foi oe.—Faata. 11:25.
6 Faiva i le Fanua: Atonu e leai lava se isi mea e moni ai lenei mataupu silisili o le tele o le lūlū na i lo o le faiva i le fanua. O le tele o taimi tatou te tuutoina atu i le fanua, o le tele foi lena o mea e tutupu e fiafia ai, o toe asiga e fuatele mai, ma ni suesuega faale-Tusi Paia e aogā tatou te seleseleina mai ai.
7 O le tele o le lūlū i le faiva i le fanua e aofia ai le faia ia lelei faapea foi ma le tele e mafai ai. O se fesoasoani sili e aogā mo i tatou e faaleleia ai le faia ia lelei o la tatou faiva o le tusi Reasoning. I itulau e 9 e oo i le 15 ua lisi mai ai le sili atu i le 40 faatomuaga ua ufitia ai mataupu e 18 e fesoasoani i le faagaeeina o le naunau i aiga. Afai e te maua se tagata fiafia, ia mautinoa ua fai ai ni au faamaumauga ina ia mafai ona e toe asia ma selesele mai ai fua o lau luluga. E faamoemoe o au taumafaiga o le a taitaiina atu ai i se suesuega faale-Tusi Paia, ma mafai ai ona e aʻoaʻo se isi tagata i le auala e tele ai le lūlū.
8 Afai e tele la tatou lūlū, e mafai ona tatou faatalitalia le tele o faamanuiaga mai ia Ieova.—Mala. 3:10.