O le Tele e Lūlū, o le Tele Foʻi Lea o Faamanuiaga e Maua
1 O loo tatou vaavaai uma atu i le faataunuuga o folafolaga sili o loo i le Afioga a le Atua. E oo lava i le taimi nei, ua aumaia ai e Ieova le tele o faamanuiaga ua matuā faafiafiaina ai o tatou olaga. Ae peitaʻi, o le tele o aogā ia tatou te maua, e matuā faalagolago lava i le tele o taumafaiga o loo tatou faia. E pei ona faapea mai le aposetolo o Paulo, “o le ua tele ana e lulu, e tele foi ana e selesele mai.” (2 Kori. 9:6) Seʻi manatu i vala e lua e faatatau i ai lenei mataupu silisili.
2 O la Tatou Faiva: O le talaʻi atu o le tala lelei i tagata i so o se taimi e tatou te mafaia ai ona avatu o se molimau, e tatou te maua ai le tele o faamanuiaga. (Faata. 3:27, 28) E faamālō atu i le toʻatele o loo tele la latou lūlū e ala i le faateleina o le faia o so latou sao i le faiva, e aofia ai le paeonia lagolago po o le paeonia sauatoa. E tatou te mafaia uma lava ona lūlū mea e tele pe a toe foʻi atu e lē aunoa e atiina aʻe le naunau o tagata fiafia uma na maua, ma ofo atu i ai se suʻesuʻega faale-Tusi Paia i soo se taimi ua maua ai le avanoa. (Roma 12:11) O lo tatou faamalolosi i nei auala, e iʻu ai i ni mea e tutupu i le fanua e atiina aʻe ai ma faateleina ai lo tatou olioli i la tatou faiva.
3 Lagolagoina le Malo o le Atua: O le uiga o le tala a Paulo i le ‘tele o ana e lulu’ e faatatau lea i le foaʻiina atu o meafaitino. (2 Kori. 9:6, 7, 11, 13) I aso nei, e tele mea e mafai ona tatou faia e pei o le faaaogā o lo tatou malosi ma meafaitino e lagolagoina ai i le Malo. E mafai ona tatou fesoasoani i le fausiaina o Maota o le Malo ma Maota o Fonotaga. E mafai foʻi ona faaavanoa i tatou i le faia o se sao i le faamamāina ma le faaleleia o nei nofoaga mo le tapuaʻiga moni. E lē gata i lea, e mafai ona tatou saosaolaumea i le faia o foaʻi tau tupe e fesoasoani ai i tupe faaalu a le faapotopotoga, faapea le galuega talaʻi o le Malo ma le faia o soo i le lalolagi aoao. Pe a faia e i tatou uma lava se sao, maʻeu lo tatou matuā olioli e vaai atu i le anoanoaʻi o faamanuiaga a Ieova i lenei galuega ua ia tofia mai!—Mala. 3:10; Luka 6:38.
4 Ua apoapoaʻia i tatou e le Afioga a le Atua ina ia “agalelei atu, ia tamaoaiga i galuega lelei, ia mataalofa, ia [tatou] avatu fua a [tatou] mea.” A o tatou utagia lenā apoapoaʻiga, e tatou te olioli ai i le tele o faamanuiaga i le taimi nei. I le taimi e tasi, ua tatou “teua oloa mo i [tatou] lava, o le faavae lelei mo aso atali, . . . ma le ola moni lava” i le lumanaʻi.—1 Timo. 6:18, 19, LF.