E Faaauilumaina e le Suesuega Tau Tusi a le Faapotopotoga Galuega Tau Aʻoaʻoga
1 Ua faia e le Suesuega Tau Tusi a le Faapotopotoga, se vaega tāua i le polokalama tau aʻoaʻoga a le faalapotopotoga a Ieova. Ua faia i ni nofoaga eseese suesuega tau tusi i vaega i le oganuu ina ia faafaigofie ai mo tagata uma ona auai. Atonu o le a matuā naunau ē loto fiafia e talia se valaaulia ina ia auai pe afai e iai se suesuega e tulata atu ia i latou.
2 Ua faia se taumafaiga ina ia faaitiitia tagata i vaega taitasi. I lenei tulaga o le a maua ai le avanoa o le faisuesuega e fesoasoani totino atu ai i tagata taitoatasi. E lē tutusa le vave e malamalama ai tagata uma. Pe a iai se tasi o faafaigata ona malamalama i se manatu e tusa lava pe sa ia suesueina muamua le mataupu, e mafai e le faisuesuega ona talanoaina atili pe a maeʻa le suesuega. E lē gata i lea, e tele avanoa i vaega toaitiiti e faia ai tali ma faia se sao i le faitauina o mau. Po o e saosaolaumea ea i le talanoaga e ala i le faia pea o ni tali? Po o e taumafai ea e tali i au lava upu? O lou naunau e faia sou sao e mafai ona aogā mo oe ma isi. A o e sauniuni, ia faaaogā lou lava mafaufau e iloiloina ai le auala e mafai ona e faatatau totino ai ni manatu patino o i le lesona.—Epe. 5:14.
3 I le matauina o auala tau aʻoaʻo atu sa faaaogā e le faisuesuega, e mafai ai ona e iloa le auala e te faia ai ni suesuega faale-Tusi Paia i aiga i se auala e sili ona faatupu fiafia ma aʻoaʻoina ai. A uma ona faitauina palakalafa e se uso agavaa, ona talanoaina lea o fesili. E faalaeiauina e le faisuesuega tagata uma ia faia se tali. Pe a lava le taimi, e taumafai o ia i le vaega ia fai atu ni manatu mai mau o i le palakalafa, e fesoasoani ai ia i tatou i le auala e faatatauina ai na mau. (Faatusatusa i le Neemia 8:8.) I nisi taimi e mafai ona ia faaopoopo mai se manatu puupuu e faamanino mai ai se mea pe fai foi ni fesili faaopoopo e maua ai le manatu autū. O se faataitaiga po o se tala faatusa e fesoasoani ia i tatou e iloa ai le auala e faatatau ai lena faamatalaga i o tatou olaga.
4 O ē auai i nisi Suesuega Tau Tusi a le Faapotopotoga e fai si paʻū maulalo. Po o e auai e lē aunoa? Afai e leai, ua e misia la se sauniuniga tāua. O le fuafuaga o le suesuega tau tusi, o se tasi lea o auala ua faaalia ai e Ieova lona manatu mai mo i tatou. (1 Pete. 5:7) E finagalo o ia ina ia agaʻi i luma lo tatou poto ma le atamai ina ia tatou malolosi ai faaleagaga. I le isi itu, e manao Satani ina ia solo i tua lo tatou tutupu aʻe faaleagaga ma faavaivaia i tatou ina ia itiiti ai so tatou aogā ia Ieova ma Lana faalapotopotoga. Ia aua lava neʻi tupu lenei mea! Ia avea le siomaga mafana ma le alofa, i lenei vaega vavalalata, e pāʻia ai lou loto, ma uunaia ai oe ina ia faaauau pea ona vivii ia Ieova.—Faatusatusa i le Salamo 111:1.
5 O faatasiga mo le auaunaga e fetaui mo tagata talaʻi ua fuafuaina i le tele o nofoaga o faia ai suesuega tau tusi. O nei faatasiga atonu e mo le ogatotonu o le vaiaso, le faaiuga o le vaiaso, po o le molimau atu i le afiafi. E ao i le faisuesuega ona faamautinoa o loo lava oganuu o iai ma ia iai se tasi e taitaia le vaega i le fanua. O faatasiga mo le auaunaga i le fanua e lē tatau ona umi atu i lo le 10-15 minute. Atonu e mafai ona talanoaina puupuu e lē o faafoeina le mau o le aso pe afai e fesootai ma la tatou galuega talaʻi, ma aumaia ni fautuaga patino mo le auaunaga i le fanua e tasi pe lua pe taulimaina foi se faataitaiga puupuu o le ofo o le masina.
6 E taumafai le faisuesuega a o faagasolo le taimi ina ia galulue ma tagata taitoatasi o lana vaega, ma avatu i ai le faalaeiauga ma le toleniga talafeagai.—Faatusatusa i le Mareko 3:14; Luka 8:1.