Ovasia o Loo Taimua—O Faisuesuega o Suesuega Tautusi a le Faapotopotoga
1 O se faaeaga mataina mo se toeaina po o se auauna o le faiva agavaa ona auauna e avea o se faisuesuega o Suesuega Tautusi a le Faapotopotoga. O le vaavaaia o manaoga faaleagaga o i latou i lana vaega, o se tiute tauave tāua. E tolu vaega o ona tiutefai.
2 Tomai e Aʻoaʻo: E manaomia ai sauniuniga maeʻaeʻa a le faisuesuega o Suesuega Tautusi a le Faapotopotoga ina ia tuuina atu le malamalama i lana vaega i vaiaso taitasi. E saili o ia ina ia faateleina le talisapaia e lana vaega o mataupu o loo suesueina. Na i lo o le faia e ia lava o le tele o faamatalaga a o faagasolo le suesuega, ae pe a tatau ai, e na te lāgā ni fesili faaopoopo tuusaʻo ina ia tatala mai ai ni manatu tāua mai le lesona. O lona sini, o le faia lea o le suesuega o se mea e naunau i ai ma ia maua ai ni aogā ma ia faaaofia ai tagata uma i le talanoaga. O lona sini o le atiina ae lea faaleagaga, ia faamatilatila le tāua ma le aogā o le suesuega, ma ia pāʻia mafaufau ma loto i le mataupu lea o loo suesueina.—1 Tesa. 2:13.
3 Asiasiga Aogā Faaleoleo Mamoe: O le faisuesuega o le Suesuega Tautusi a le Faapotopotoga ua “pei o se lafitaga i le matagi, ma se mea e malu ai i le afā.” (Isa. 32:2) E manatu mamafa moni o ia i tagata uma o lana vaega ma na te faamautinoa ua saunia le fesoasoani faaleagaga pe afai ua tau faavāivai se tasi o i lalo o lana vaavaaiga.—Eseki. 34:15, 16; 1 Tesa. 2:7, 8.
4 Fai Evagelia Maelega: O le faisuesuega o le Suesuega Tautusi a le Faapotopotoga e mataalia i le faia o fuafuaga aogā mo i latou uma i lana vaega ina ia faia se sao atoatoa i le faiva i le fanua. E taimua o ia i le galuega faaevagelia, i le iloa faapea, o le auai e lē aunoa, le maelega, ma le aasa ua ia faaalia mo le auaunaga, o le a atagia mai i le vaega atoa. (Kolo. 4:17; 2 Tesa. 3:9) I se taimi, e taumafai ai o ia ina ia galulue i le auaunaga ma tagata taitoatasi o lana vaega. Afai tatou te mananao e faamaai o tatou tomai e talaʻi ma aʻoaʻo atu ai i le faiva, e mafai ona fesoasoani le faisuesuega o Suesuega Tautusi a le Faapotopotoga ia i tatou ina ia ausia lo tatou sini.—1 Timo. 4:16; 2 Timo. 4:5.
5 Ua faamanuiaina moni lava i tatou i nei meaalofa i tagata o ē o loo nofo sauni e tuuina mai ia i tatou le fesoasoani faaleagaga ma le lagolagosua alofa. (1 Tesa. 5:14) Tau ina ia tatou faaalia le talisapaia mo nei sauniuniga matagofie mai ia Ieova e ala i lo tatou auai e lē aunoa i le suesuega tautusi ma lo tatou faamaoni e lagolagosua i le galuega faaevagelia.—Epe. 10:25.