Fesoasoani i Isi ia Olioli i se Aiga Fiafia
1 Pe tatou te lagona e pei o le lagona na i le faisalamo ina ua ia faapea mai: “Ieova e, . . . o loo ia te oe le puna o le ola”? (Sala. 36:5, 9) E mafai faapefea e i tatou lava ia ona fesoasoani atu i isi ina ia talisapaia ma avatu ia Ieova le faaneeneega ona o ia o le puna o le olaga fiafia faaleaiga? E ala lea i le ofoina o le tusi Faia o Lou Olaga Faaleaiga ia Fiafia a o faagasolo Iuni. Ua matuā tulaga ese lenei tusi i le saunia ai o taiala aogā e talafeagai mo le olaga fiafia faaleaiga. O le mea moni, tatou te mananao i tagata uma lava ia latou iloa le auala e aumaia ai e le olaga o se aiga Kerisiano le faaneeneega ia Ieova le Atua.
2 O se taulimaga faigofie ma tuusaʻo lenei.
Pe a maeʻa ona faafeiloaia le tagata o le fale, fesili i ai:
◼ “E mafai faapefea ona tumau se faaipoipoga i taimi o vesiga? Ua faapea mai nisi e pau lava le mea o le avea o oe ma se tagata e lotu. Peitai, pe ua lava lena? O le ā sou manatu? [Faatali mo se tali.] Sa faatuina e lo tatou Alii o Iesu se manatu manaia lava i inei i le Mataio 7:24-27. [Faitau.] O lea, e lē lava ai le tau ina faalogo i fetalaiga a Iesu, ae e tatau foi ona tatou faatatauina. [Faaali i ai le ata i le itulau e 12.] Ua fuafuaina lenei tusi e fesoasoani ia i tatou ia faatatau mea ua fai mai ai le Tusi Paia e uiga i olaga faaleaiga. Ou te manao e ave ma oe le tusi ina ia mafai ai foi ona e maua aogā mai manatu o loo taʻua ai.”
3 Po o le uma ona e faafeiloai atu, atonu e te fai atu faapea:
◼ “I lenei lalolagi faigata, pe e talafeagai ea ona tatou talitonu faapea, e mafai ona tatou maua se olaga faaleaiga fiafia? O le ā sou manatu? [Faatali mo se tali.] E ui lava ina toaaga le toatele o tagata i lotu, ae o loo iai pea faafitauli i o latou aiga. Mātau le fetalaiga a Iesu i inei i le Tusi Paia. [Faitau le Ioane 13:17.] Pe e te lē ioe ea faapea e tele atu isi mea e manaomia mai ia i tatou na i lo o le tau ina ō i le lotu? Mātau le mea ua fai mai ai lenei tusi.” Faitau le palakalafa e 3 i le itulau e 11 o le tusi Olaga Faaleaiga ma talanoa i le ata i le itulau e 12 faatasi ai ma le Mataio 7:24-27. Pe afai e faaalia se naunau o le tagata o le fale ma ave le tusi, fai i ai o le isi taimi e te toe asiasi atu ai, o le a lua talanoa ai i le fesili, O le ā se faavae lelei mo se aiga fiafia?
4 O se isi faafeiloaiga atonu e te fai atu faapea:
◼ “O le asō o loo matou fesiligia ai o matou tuaoi, Pe mafai faapefea ona tatou aʻoaʻoina lelei a tatou fanau? O le ā sou manatu? [Faatali mo se tali.] E ui lava o le toatele o tagata ua latou faamamafa le tāua i aʻoaʻoga, ae ua latou faatuatuanai le aʻoaʻoga faaleagaga o a latou fanau. Mātau le mea sa faatonuina ai e le Atua ona tagata e fai i le Teuteronome 6:6, 7.” Pe a maeʻa ona faitau lenei mau ia tatai atu le manatu o le tagata o le fale i le palakalafa e 13 i le itulau e 120 o le tusi Olaga Faaleaiga ma otooto nisi o manatu tāua i lena palakalafa. Afai e talia e le tagata o le fale le tusi, faatū se fesili e mafai ona tali i le isi au asiasiga.
5 Po o e manao e fesoasoani i isi e aʻoaʻoina upu moni ofoofogia a le Tusi Paia i le faia o o latou olaga faaleaiga ia fiafia? E mafai e le tusi o le Olaga Faaleaiga ona fesoasoani ia te oe e faia faapea. Ua ia faaneeneeina Lē Sili na Foafoaina i tatou, le Alii Silisiliese o Ieova, i le viiviia o ana galuega ma faaalia le faapefea i tagata e oo lava i aso nei ona manuia mai ana fuafuaga alofa.